నేడు బెంగళూరులో ఆర్సీబీ విక్ట‌రీ ప‌రేడ్

న‌వ‌తెలంగాణ‌-హైద‌రాబాద్‌: రాయల్‌ ఛాలెంజర్స్‌ బెంగళూరు (ఆర్సీబీ) జట్టు 18 ఏళ్ల సుదీర్ఘ నిరీక్షణకు తెరదించుతూ తమ మొట్టమొదటి ఐపీఎల్‌ ట్రోఫీని కైవసం చేసుకుంది. ఈ చారిత్రక విజయాన్ని పురస్కరించుకుని, జట్టు యాజమాన్యం ఈరోజు బెంగళూరు నగరంలో భారీ విజయోత్సవ యాత్రను నిర్వహించనుంది. ఈ విజయోత్సవ పరేడ్‌ బుధవారం మధ్యాహ్నం 3:30 గంటలకు కర్ణాటక శాసనసభ భవనమైన విధాన సౌధ వద్ద ప్రారంభమవుతుంది. అక్కడి నుంచి ఆర్సీబీ హోమ్‌ గ్రౌండ్‌ అయిన ఎం. చిన్నస్వామి స్టేడియం వరకు ఈ యాత్ర కొనసాగుతుంది. వేలాదిగా అభిమానులు ఈ వేడుకల్లో పాలుపంచుకోనున్నారు. ఈ అపూర్వ విజయోత్సవ యాత్రను దేశవ్యాప్తంగా ఉన్న అభిమానులు వీక్షించేందుకు వీలుగా స్టార్‌ స్పోర్ట్స్‌ ఛానెల్‌లో ఉదయం 8:30 గంటల నుంచే ప్రత్యక్ష ప్రసారం చేయనున్నారు. పరేడ్‌ ముగిసిన అనంతరం, సాయంత్రం 6 గంటల తర్వాత ఎం. చిన్నస్వామి స్టేడియంలో వేడుకలు కొనసాగుతాయి.