లవంగంతో ప్రయోజనాలు

వంటింట్లోని పదార్థాలతో చాలా రోగాలను దూరం చేసుకోవచ్చు. అయితే వీటిలో ముఖ్యంగా చెప్పుకోవాల్సింది లవంగం గురించే. ఒక్క పంటినొప్పికే కాదు.. ఇంకా దీనితో చాలా ఉపయోగాలున్నాయి.
రోగనిరోధక శక్తిని పెంచుతుంది
లవంగం ఇన్ఫెక్షన్లతో పోరాడుతుంది. తెల్ల రక్త కణాల పెరుగుదలను ప్రోత్సహించే సమ్మేళనాన్ని కలిగి ఉంటుంది. ఈ కణాలు వివిధ ఇన్ఫెక్షన్ల నుంచి శరీరాన్ని రక్షించడానికి బాధ్యత వహిస్తాయి. పడుకునే ముందు రెండు లవంగాలను నమలి.. గోరువెచ్చని నీరు తాగితే.. రోగనిరోధక శక్తిని బలోపేతం చేయవచ్చు.
కాలేయాన్ని బలంగా చేస్తుంది
లవంగాల్లో యాంటీఆక్సిడెంట్లు పుష్కలంగా ఉంటాయి. ఇవి కాలేయాన్ని దెబ్బతీసే ఫ్రీ రాడికల్స్‌తో పోరాడతాయి. అంతే కాదు కాలేయ కణాల పునరుత్పత్తిని ప్రేరేపించే హెపాటోప్రొటెక్టివ్‌ లక్షణాలు కూడా ఇందులో పుష్కలంగా ఉన్నాయి. అంతేకాకుండా ప్రతిరోజూ లవంగాలను నమలడం వల్ల లిపిడ్‌ ప్రొఫైల్‌ను మెరుగుపరుచుకోవచ్చు.
దగ్గు నుంచి ఉపశమనం కోసం..
శ్వాసకోశ వ్యాధులను లవంగం నివారిస్తుంది. ముఖ్యంగా కోవిడ్‌ వ్యాప్తి తర్వాత ప్రజలు ఎక్కువగా శ్వాసకోశ వ్యాధుల బారిన పడుతున్నారు. అయితే లవంగం దగ్గు, స్వరపేటికవాపు, గొంతు నొప్పి వంటి వాటిని ఎదుర్కోవడానికి సహజంగా పనిచేస్తుంది.
కీళ్ల నొప్పులను తగ్గిస్తుంది
కీళ్లను రిలాక్స్‌ చేసే యాంటీ ఇన్‌ఫ్లమేటరీ గుణాలు లవంగంలో పుష్కలంగా ఉన్నాయి. దీనిలో ఉండే యూజీనాల్‌ కీళ్లనొప్పుల ప్రమాదాన్ని తగ్గిస్తుంది. దీని కోసం రోజూ గోరువెచ్చని నీటిలో లవంగం పొడి కలిపి తాగవచ్చు.
జీర్ణక్రియను మెరుగుపరుస్తుంది
ఈ రోజుల్లో జీర్ణ సమస్యలు సర్వసాధారణం. అపానవాయువు, వికారం, పొట్టలో పుండ్లు, అజీర్తి మనల్ని ఇబ్బంది పెట్టే జీర్ణ సంబంధిత రుగ్మతలు. అయితే లవంగాలను రోజూ తీసుకోవడం వల్ల ఇలాంటి అనారోగ్యాలను దూరం చేసుకోవచ్చు.