సత్తుపల్లిలోని జలగం వెంగళరావు ప్రభుత్వ డిగ్రీ కళాశాల స్థాపించి 50 సంవత్సరాలైన సందర్భంగా ఆ కళాశాల స్వర్ణోత్సవాలను డిసెంబర్ నెలలో ఘనంగా నిర్వహించేందుకు పూర్వ విద్యార్థుల సంఘం సమాయత్తమవుతోంది. ఈ నేపథ్యంలో శుక్రవారం పూర్వ విద్యార్థుల సంఘ బాధ్యులు, ఆ సంఘ అధ్యక్షుడు, రాష్ట్ర కాంగ్రెస్ నాయకులు డాక్టర్ మట్టా దయానంద్ విజయకుమార్‌ను స్థానిక ద్వారకాపురిలోని ఎమ్మెల్యే అధికారిక క్యాంప్ కార్యాలయంలో కలిశారు.

ఈ సందర్భంగా స్వర్ణోత్సవాల నిర్వహణ, ఏర్పాట్ల అంశాలపై సుదీర్ఘంగా చర్చించారు. ఈ నెల 18న (ఆదివారం) డిగ్రీ కళాశాలలో పూర్వ విద్యార్థుల సంఘం ముఖ్య సమావేశం జరుగుతుందని సంఘ అధ్యక్షుడు డాక్టర్ దయానంద్ విజయకుమార్ తెలిపారు. ఆదివారం జరిగే ఈ సమావేశానికి పూర్వ విద్యార్థులు అధిక సంఖ్యలో హాజరై స్వర్ణోత్సవ సంబరాలను విజయవంతం చేయడానికి తమ వంతు సూచనలు, సలహాలు ఇవ్వాలని ఆయన కోరారు. ఈ కార్యక్రమంలో పూర్వ విద్యార్థుల సంఘ బాధ్యులు దారా కృష్ణారావు, గాదె నరసింహారెడ్డి, దొడ్డా కృష్ణయ్య, ఫయాజ్, ఉడతనేని అప్పారావు, కమల్ పాషా, గుడ్ల వెంకట రమణ, బాల నాగేశ్వరరావు, గుండ్రోతు నరసింహారావు, జి. వెంకటరెడ్డి, మలిరెడ్డి మురళీరెడ్డి పాల్గొన్నారు.