నవతెలంగాణ రాజేంద్రనగర్: స్థానిక పోలీస్ స్టేషన్ పరిధిలో ఏడో తరగతి చదువుతున్న ఒక బాలిక కిడ్నాప్‌కు గురైన ఘటన స్థానికంగా తీవ్ర కలకలం రేపింది. ఉదయం ఎప్పటిలాగే పాఠశాలకు వెళుతున్నానని ఇంట్లో చెప్పి బయటకు వెళ్లిన ఆ విద్యార్థిని,సాయంత్రం ఎంతసేపటికీ తిరిగి ఇంటికి రాలేదు. దీంతో తీవ్ర ఆందోళనకు గురైన తల్లిదండ్రులు చుట్టుపక్కల ప్రాంతాల్లో వెతకడమే కాకుండా, తమ బంధువులకు ఫోన్లు చేసి వాకబు చేశారు.అయినప్పటికీ బిడ్డ ఆచూకీ లభించకపోవడంతో, కన్నీరుమున్నీరుగా విలపిస్తూ వారు రాజేంద్రనగర్ పోలీసులను ఆశ్రయించారు.
ఓ మహిళ బాలికకు మాయమాటలు చెప్పి, ఒక యువకుడితో పంపించిందనే ఆరోపణలు రావడంతో పోలీసులు ఆ మహిళను అదుపులోకి తీసుకుని విచారిస్తున్నారు. ఈ ఘటనపై కిడ్నాప్ కేసు నమోదు చేసిన పోలీసులు,స్థానికంగా ఉన్న సీసీటీవీ ఫుటేజీలను క్షుణ్ణంగా పరిశీలిస్తూ బాలికను తీసుకెళ్లిన యువకుడి కోసం ముమ్మరంగా గాలింపు చర్యలు చేపట్టారు.
కామెంట్‌లు (0)