రేషన్ డీలర్ల సమస్యలను ప్రభుత్వం వెంటనే పరిష్కరించాలని మిడ్జిల్ మండల రేషన్ డీలర్ల సంఘం అధ్యక్షులు మార్కండేయ డిమాండ్ చేశారు. మంగళవారం మండల కేంద్రంలో ఆయన నవ తెలంగాణతో మాట్లాడుతూ, ఎన్నికల సమయంలో డీలర్లకు ఇచ్చిన హామీలను తక్షణమే అమలు చేసి తమను ఆదుకోవాలని ఆయన ప్రభుత్వాన్ని కోరారు. ప్రభుత్వానికి, ప్రజలకు మధ్య తాము అరిటాకులా నలిగిపోతున్నామని ఆవేదన వ్యక్తం చేశారు. మూడు నెలలకు ఒకసారి అందుతున్న చాలీచాలని కమిషన్లతో తమ కుటుంబాలు గడవడం కష్టంగా మారిందని తెలిపారు.

ఉపాధి హామీ కూలీల కన్నా డీలర్ల బతుకులు అధ్వానంగా తయారయ్యాయని అన్నారు. ప్రతీ క్వింటాల్ బియ్యానికి మూడు కిలోల వరకు తరుగు వస్తుండటంతో డీలర్లు తీవ్రంగా నష్టపోతున్నారని పేర్కొన్నారు. రేషన్ సరుకుల హమాలీ ఖర్చులను ప్రభుత్వమే భరించాలని ఆయన డిమాండ్ చేశారు. ప్రభుత్వం ఇప్పటికైనా స్పందించి రేషన్ డీలర్ల న్యాయమైన సమస్యలను పరిష్కరించాలని విజ్ఞప్తి చేశారు. తక్కువ కోటా ఉన్న గ్రామాల రేషన్ డీలర్లు కుటుంబాలను పోషించలేక అప్పుల పాలవుతున్నారని, ప్రభుత్వానికి డీలర్లకు పారితోషికంతో పాటు గౌరవ వేతనం చెల్లించాలని కోరారు. 40 క్వింటాళ్ల లోపు సరుకులు వస్తున్న 8 గ్రామాల డీలర్లకు వచ్చే చాలీచాలని కమిషన్‌తో ఇల్లు గడవడం కష్టంగా మారిందని ఆవేదన వ్యక్తం చేశారు.

ఆదాయం లేక, దుకాణాల నిర్వహణ ఖర్చులు భరించలేక డీలర్లు తీవ్రంగా అప్పుల పాలవుతున్నారు. కేవలం కమిషన్‌పై ఆధారపడకుండా ప్రభుత్వానికి డీలర్లకు స్థిరమైన పారితోషికంతో పాటు గౌరవ వేతనం అందించాలని డిమాండ్ చేశారు.

ఎన్నికలలో ఇచ్చిన హామీలను అమలు చేసి ప్రభుత్వం మాట నిలబెట్టుకోవాలని కోరారు. ప్రభుత్వానికి, ప్రజలకు మధ్య వారధిగా పనిచేస్తున్న డీలర్లను ఆదుకోవడానికి ప్రభుత్వం తక్షణమే స్పందించి గౌరవ వేతనం ప్రకటించాలని మండల డీలర్ల తరఫున ప్రభుత్వాన్ని కోరుతున్నట్లు చెప్పారు.