విద్యుత్‌ ప్రయివేటీకరణ ప్రమాదకరం

అదానీకి లాభం… ప్రజలకు తీవ్ర నష్టం
రైతులు, వినియోగదారులకు సబ్సిడీ రద్దయ్యే అవకాశం
విద్యుత్‌ సవరణలకు వ్యతిరేకంగా దేశవ్యాప్త ఉద్యమం
తెలంగాణలో కొత్త డిస్కం ప్రతిపాదన ఉపసంహరించుకోవాలి
టారిఫ్‌ల పేరుతో ట్రంప్‌ చేస్తున్న దాష్టీకాన్ని ప్రతిఘటించాలి : సీపీఐ(ఎం) పొలిట్‌బ్యూరో సభ్యులు బీవీ రాఘవులు పిలుపు
బీసీ రిజర్వేషన్లపై అఖిలపక్షం నిర్వహించాలి
జూబ్లీహిల్స్‌ ఉప ఎన్నికపై త్వరలో నిర్ణయం : జాన్‌వెస్లీ
నవతెలంగాణ బ్యూరో – హైదరాబాద్‌
దేశంలో విద్యుత్‌రంగాన్ని ప్రయివేటుపరం చేసేందుకు కేంద్రంలోని బీజేపీ ప్రభుత్వం కుట్రలు చేస్తున్నదనీ, ఇది దేశానికే ప్రమాదకరమని సీపీఐ(ఎం) పొలిట్‌బ్యూరో సభ్యులు బీవీ రాఘవులు అన్నారు. ప్రయివేటీకరణతో అదానీకి లాభం కలుగుతుందనీ, ప్రజలు, రైతులు, వినియోగదారులు, విద్యార్థులు తీవ్రంగా నష్టపోతారని ఆందోళన వ్యక్తం చేశారు. ప్రభుత్వాలు అమలు చేస్తున్న విద్యుత్‌ సబ్సిడీలు రద్దయ్యే అవకాశముందనీ, కేంద్రం ప్రతిపాదించిన విద్యుత్‌ సవరణలకు వ్యతిరేకంగా దేశవ్యాప్త ఉద్యమం చేపట్టాలని పిలుపునిచ్చారు. సోమవారం హైదరాబాద్‌లోని సీపీఐ(ఎం) రాష్ట్ర కార్యాలయం ఎంబీ భవన్‌లో జరిగిన విలేకర్ల సమావేశంలో సీపీఐ(ఎం) రాష్ట్ర కార్యదర్శి జాన్‌వెస్లీ, కేంద్ర కమిటీ సభ్యులు టి జ్యోతితో కలిసి రాఘవులు మాట్లాడారు. విద్యుత్‌ సవరణ చట్టం-2025 పేరుతో ఈనెల తొమ్మిదిన కేంద్ర ప్రభుత్వం ప్రతిపా దనలను విడుదల చేసిందన్నారు. 30 రోజులపాటు అభ్యంతరాలను తెలపాలంటూ గడువు విధించిందని చెప్పారు. 2021లో విద్యుత్‌ చట్టానికి సవరణలను ప్రతిపాదిస్తే తీవ్ర ప్రతిఘటనతో వెనక్కి తగ్గిందని అన్నారు. 2022లో మళ్లీ సవరణలు తెస్తే ప్రతిపక్షాలు వ్యతిరేకించాయనీ, దాన్ని జాయింట్‌ పార్లమెంటరీ కమిటీ (జేపీసీ)కి అప్పగించారనీ, అది చట్టరూపం దాల్చలేద న్నారు. పాత అంశాలతోపాటు కొత్తవి జోడించి విద్యుత్‌ సవరణ చట్టం ప్రతిపాదనలను అత్యంత దుర్మార్గంగా, ప్రమాదకరంగా రూపొందించారని ఆందోళన వ్యక్తం చేశారు. కేంద్ర ప్రభుత్వం ప్రతిపాదించిన సవరణలు అమల్లోకి వస్తే విద్యుత్‌రంగమంతా ప్రయివేటీకరణ అయ్యి, పూర్తిగా అదానీ ఆధీనంలోకి వెళ్తుందన్నారు. విద్యుత్‌ పంపిణీ సంస్థలు ప్రయివే టుపరమ వుతాయనీ, రైతులు, విద్యార్థులు, బలహీన వర్గాలకు వర్తించే విద్యుత్‌ సబ్సిడీలు రద్దవుతాయని తెలిపారు. విద్యుత్‌ రంగం రాష్ట్రాల పరిధిలో ఉన్నా, వాటికి హక్కు లేకుండా కేంద్రం సవరణలు చేస్తున్నదని విమర్శించారు. ఇది కచ్చితంగా ఫెడరలిజంపై దాడేనని స్పష్టం చేశారు. తెలంగాణలో వ్యవసాయానికి ఉచిత విద్యుత్‌ అమలు చేయడం వల్ల రైతాంగానికి మేలు కలుగుతున్నదని వివరించారు. విద్యుత్‌ సవరణలు అమలైతే ఉచిత విద్యుత్‌ ఉండబోదనీ, రైతులు విద్యుత్‌ బిల్లులు చెల్లించాల్సి ఉంటుందనీ, లేదంటే విద్యుత్‌ కనెక్షన్‌ను తొలగించాల్సి ఉంటుందన్నారు. విద్యుత్‌ చార్జీలు, వినియోగదారులకు సంబంధించిన నిర్ణయంపై ఈఆర్సీకి కొంత వెసులుబాటు ఉండేదని గుర్తు చేశారు. కొత్త చట్టం ప్రకారం ఖర్చుకు అదనంగా లాభం జోడించి విద్యుత్‌ చార్జీలను నిర్ణయిస్తారని తెలిపారు. వినియోగదారులపై విద్యుత్‌ చార్జీల భారం పెరుగుతుందన్నారు. ఈఆర్సీలు రబ్బర్‌స్టాంపులుగా మారిపోయే ప్రమాద ముందని హెచ్చరించారు. విద్యుత్‌ చార్జీలను సవరించాలంటే ప్రస్తుతం ఈఆర్సీ నోటిఫికేషన్‌ ఇచ్చి ప్రజల నుంచి అభ్యంతరాలను స్వీకరిస్తాయని గుర్తు చేశారు. కొత్త చట్టం వస్తే సుమోటోగా ఏప్రిల్‌ ఒకటి నుంచి విద్యుత్‌ చార్జీల పెంపు అమల్లోకి వచ్చేలా మార్పులు చేస్తున్నారని వివరించారు. ఈ ప్రమాదకరమైన మార్పులకు వ్యతిరేకంగా రాజకీయ పార్టీలు, ప్రభుత్వాలు, ప్రజలు, రైతులు, సంఘాలు ముందుకు రావాలనీ, కేంద్రం తీరుకు నిరసనగా ఉద్యమించాలని ఆయన పిలుపునిచ్చారు. స్మార్ట్‌ మీటర్లు కూడా ఈ దోపిడీలో భాగమేనన్నారు. కేంద్రం నిర్ణయాలను సీపీఐ(ఎం) తీవ్రంగా వ్యతిరేకిస్తున్నదని చెప్పారు. విద్యుత్‌ కూడా నిత్యావసర వస్తువుగా మారిందనీ, ప్రభుత్వాలు విద్యుత్‌రంగాన్ని ప్రజలకు సేవ సంస్థలుగా చూడాలని సూచించారు. ప్రభుత్వరంగంలో విద్యుత్‌ రంగం ఉండాలనీ, కేంద్రం నిర్ణయానికి వ్యతిరేకంగా దేశవ్యాప్త ఉద్యమానికి సన్నద్ధం కావాలని పిలుపునిచ్చారు.

కేంద్రం కుట్రలో రాష్ట్రం భాగస్వామ్యం కావొద్దు
తెలంగాణలో ప్రస్తుతం సీపీడీఎల్‌, ఎన్‌పీడీసీఎల్‌ రెండు డిస్కంలు ఉన్నాయని రాఘవులు వివరించారు. కొత్త డిస్కం తేవాలంటూ సీఎం రేవంత్‌రెడ్డి భావిస్తున్నారని చెప్పారు. వ్యవసాయానికి ఉచిత విద్యుత్‌, ప్రజలకు 200 యూనిట్లలోపు ఉచిత విద్యుత్‌, ప్రభుత్వ విద్యాసంస్థలకు ఉచిత విద్యుత్‌ అమలవుతున్నాయని గుర్తు చేశారు. సబ్సిడీ వినియోగించే వినియోగదారులను కొత్త డిస్కం పరిధిలోకి తెచ్చేలా రాష్ట్ర ప్రభుత్వం ప్రయత్నాలు చేస్తున్నదని వివరించారు. కొత్త విద్యుత్‌ సవరణ చట్టం అమల్లోకి వస్తే ఉచిత విద్యుత్‌ అమలయ్యే అవకాశం లేదన్నారు. విద్యుత్‌ రంగం ప్రయివేటుపరం అవుతుందని విమర్శించారు. సీపీడీసీఎల్‌, ఎన్‌పీడీసీఎల్‌ కాకుండా కొత్త డిస్కం ప్రతిపాదనలను రాష్ట్ర ప్రభుత్వం ఉపసంహరించుకోవాలని డిమాండ్‌ చేశారు. కేంద్రం కుట్రలో రాష్ట్ర ప్రభుత్వం భాగస్వామ్యం కావొద్దని చెప్పారు. దేశంలోని ప్రజలు, రైతులు, కార్మికులు, విద్యార్థులు విద్యుత్‌ సవరణలను ప్రతిఘటించాలని పిలుపునిచ్చారు.

బీహార్‌లో ఎంఐఎం కక్షసాధింపు పోటీ వద్దు
బీహార్‌లో మహాకూటమిలో చేరేందుకు నిరాకరిస్తున్నందుకే వంద సీట్లలో పోటీ చేయాలని ఎంఐఎం నిర్ణయం తీసుకున్నట్టు అసదుద్దీన్‌ఒవైసీ ప్రకటించారని రాఘవులు చెప్పారు. రాజకీయ బలం ఉంటే పోటీ చేయొచ్చనీ, చెప్పినట్టు వినలేదు కాబట్టి నచ్చినట్టు పోటీ చేస్తామనడం సరైంది కాదన్నారు. బీహార్‌ తూర్పు ప్రాంతంలో వామపక్షాలు బలమైన శక్తిగా ఉన్నాయనీ, ఎక్కువ స్థానాల్లో పోటీ చేసేందుకు అవకాశముందని చెప్పారు. కానీ బీజేపీని ఓడించడం కోసం తాము అవసరం మేరకే పోటీ చేస్తున్నామని వివరించారు. ఫాసిస్టు ధోరణితో ఉన్న బీజేపీ ఎక్కువ కాలం అధికారంలో ఉంటే రాజ్యాంగానికి, దేశానికి తీవ్ర నష్టమని అన్నారు. ఒవైసీ కూడా అలాంటి పద్ధతి అనుసరిస్తే బీజేపీని ఓడించడం సులభమవుతుందన్నారు. లేదంటే పరోక్షంగా బీజేపీ గెలుపునకు సహకరించిందన్న అపవాదు మూటగట్టుకోవాల్సి వస్తుందని చెప్పారు. లద్దాఖ్‌లో వాంగ్‌చుక్‌ అరెస్టు అప్రస్వామికమని విమర్శించారు. ఆయన్ను వెంటనే విడుదల చేయాలని డిమాండ్‌ చేశారు. సమస్యలను వెంటనే పరిష్కరించాలనీ, రాష్ట్ర ప్రతిపత్తి హామీని నెరవేర్చాలని కోరారు.

భారత్‌పై ట్రంప్‌ కక్ష
భారత్‌పై అమెరికా అధ్యక్షులు డోనాల్డ్‌ ట్రంప్‌ విధిస్తున్న టారిఫ్‌లతో తీవ్ర నష్టం కలుగుతుందని రాఘవులు చెప్పారు. చైనా మీద వంద శాతం టారిఫ్‌లను పెంచిందన్నారు. ఇరాన్‌లో చమురు దిగుమతి చేసుకుంటున్నారనే పేరుతో ట్రంప్‌ కొత్త టారిఫ్‌ జాబితాను విడుదల చేశారని అన్నారు. హెచ్‌-1బీ వీసా దరఖాస్తు రుసుమును పెంచారని వివరించారు. భారత్‌పై ట్రంప్‌ కక్ష పెంచుకున్నారని విమర్శించారు. ట్రంప్‌ పెత్తనాన్ని, దాష్టీకాన్ని ప్రతిఘటించాలని పిలుపునిచ్చారు. అందుకోసం ప్రజలను చైతన్యం చేయాలన్నారు. ట్రంప్‌ విధించే టారిఫ్‌లో వ్యవసాయరంగంపై తీవ్ర ప్రభావం పడుతుందనీ, దేశంలో ఆ రంగాన్ని రక్షించుకోకుంటే భవిష్యత్‌లో తీవ్ర నష్టం కలుగుతుందన్నారు. అలాగే దిగుమతి సుంకాలను రద్దు చేస్తే భారత్‌ తీవ్రంగా నష్టపోతుందన్నారు. సోయాబీన్‌, మొక్కజొన్న, పత్తి, పాల ఉత్పత్తుల రైతులు నష్టపోతారని చెప్పారు. మందులు, ఐటీ పరిశ్రమలు ఇబ్బందులు ఎదుర్కొంటాయనీ, ఆయా పరిశ్రమలను రక్షించుకోవడానికి మోడీ ప్రభుత్వంపై రాష్ట్ర ప్రభుత్వం ఒత్తిడి తేవాలని డిమాండ్‌ చేశారు.

బీసీ రిజర్వేషన్లకు కేంద్రమే అడ్డు : జాన్‌వెస్లీ
బీసీలకు 42 శాతం రిజర్వేషన్లను కేంద్రంలోని బీజేపీ ప్రభుత్వం అడ్డుకుంటున్నదని సీపీఐ(ఎం) రాష్ట్ర కార్యదర్శి జాన్‌వెస్లీ విమర్శించారు. రాష్ట్ర ప్రభుత్వం కులగణన చేసి అసెంబ్లీలో బిల్లు ఆమోదించి కేంద్రానికి పంపిందని గుర్తు చేశారు. కేంద్రం ఆమోదించకుంటే ఆర్డినెన్స్‌ తెచ్చి గవర్నర్‌కు పంపిస్తే దాన్ని కూడా కేంద్రానికి పంపారని చెప్పారు. రాష్ట్ర ప్రభుత్వం బీసీ రిజర్వేషన్ల కోసం విడుదల చేసిన జీవో నెంబర్‌ తొమ్మిదిపై సుప్రీం కోర్టును ఆశ్రయించి, కేంద్రంపై కూడా ఒత్తిడి తేవాలని అన్నారు. బీసీ రిజర్వేషన్లను తొమ్మిదో షెడ్యూల్‌లో చేర్చేలా చూడాలనీ, దానికోసం రాష్ట్ర ప్రభుత్వం అఖిలపక్ష సమావేశాన్ని ఏర్పాటు చేయాలని డిమాండ్‌ చేశారు. బీసీ రిజర్వేషన్లపై రాష్ట్రంలోని కేంద్ర మంత్రులకు చిత్తశుద్ధి ఉంటే మోడీ సర్కార్‌పై ఒత్తిడి తేవాలనీ, లేదంటే వారి పదవులకు రాజీనామా చేయాలని డిమాండ్‌ చేశారు. జూబ్లీహిల్స్‌ ఉప ఎన్నికల్లో బీజేపీని ఓడించాలని ఆయన పిలుపునిచ్చారు. పోటీపై నగర పార్టీతో చర్చిస్తామన్నారు. పోటీ చేయకుంటే బీజేపీని ఓడించే పార్టీకి మద్దతిస్తామనీ, త్వరలోనే దీనిపై చర్చించి నిర్ణయం తీసుకుంటామని తెలిపారు. ఆర్‌ఆర్‌ఆర్‌ నిర్వాసితులకు సంబంధించి రైతుల ఆమోదం లేకుండా భూమిని తీసుకోవద్దని డిమాండ్‌ చేశారు. 2013 భూసేకరణ చట్టం ప్రకారం పరిహారం చెల్లించాలని కోరారు. రైతులతో చర్చలు జరపాలని సూచించారు.