ఇండోనేషియాలో వరద ముప్పు

248 మందికి చేరిన మృతుల సంఖ్య
జకార్తా : ఇండోనేషియా ప్రకృతి విపత్తులతో అతలాకుతలమైంది. ఆ దేశంలో ఇటీవల సంభవించిన సునామీ, వరదలు, భూకంపాల వల్ల వందలాది మంది మృతి చెందారు. మృతుల సంఖ్య 248కి చేరిందని, మరింత పెరిగే అవకాశం ఉందని అధికారులు శనివారం వెల్లడించారు. ప్రభావిత ప్రాంతాల నుంచి మృతదేహాలను వెలికితీసేందుకు రెస్క్యూ సిబ్బంది తీవ్ర ప్రయత్నాలు చేస్తున్నారు. ప్రకృతి ప్రకోపానికి రోడ్లు పూర్తిగా ధ్వంసమయ్యాయి. కమ్యూనికేషన్‌ లైన్లు తెగిపడిపోయాయి.

ఉత్తర సుమత్రా ప్రావిన్స్‌లోని సెంట్రల్‌ తపనులి జిల్లాకు, ఇతర ప్రాంతాలకు విమానాల ద్వారా అధికారులు సహాయాన్ని అందిస్తున్నారు. దెబ్బతిన్న వంతెనలు, రోడ్లు, భారీ పరికరాలు లేకపోవడం వల్ల సహాయక చర్యలకు ఆటంకం ఏర్పడింది. పశ్చిమ సుమత్రాలోని అగామ్‌ జిల్లాలో సహాయక సిబ్బంది ఎక్కువ మృతదేహాలను వెలికి తీశారు. మృతుల సంఖ్య 248కి పెరిగింది. వందమందికిపైగా గల్లంతయ్యారని జాతీయ విపత్తు నిర్వహణ సంస్థ తెలిపింది.కాగా, గతవారం రోజులుగా కురుస్తున్న వర్షాల కారణంగా ఉత్తర సుమత్రా ప్రావిన్స్‌లో నదులు పొంగిపొర్లాయి. దీంతో వందలాది ఇండ్లు నీటమునిగాయి. దాదాపు మూడు వేల మంది నిరాశ్రయులయ్యారు. వీరంతా ప్రభుత్వం ఏర్పాటు చేసిన సహాయక శిబిరాల్లో తలదాచుకుంటున్నారు.