అఖండ దీపాలు

కొందరంతే!
అఖండ దీపంలా వెలుగుతూ జ్ఞాపకమై వెంట నడుస్తుంటారు
గుండె గోడకు కొట్టిన మేకుకు ప్రతి ఛాయా చిత్రాలై వేలాడుతుంటారు.
కొందరు పేర్లు కూడా గుర్తుండవు
వాళ్లు నేర్పిన అక్షరాలు మాత్రం గుర్తుంటాయి.
వాళ్లు పూసుకున్న అత్తరు వాసన పెదవులపై విరబూసిన చిరునవ్వు.
మాటల్లో వొలికిన అమత ధార
వాళ్ల నడకను అనుసరించిన స్మృతులు
మేఘాల్లో చటుక్కున మెరిసిన మెరుపులై
తళుక్కున కళ్ళ ముందు మెదిలి మాయమౌతుంటారు
చాలామంది… కొందరు అపరిచితులు కూడా
మనసు తెరపై అమాంతం ప్రత్యక్షమై
మరో నిమిషంలో అంతర్ధానం
మిట్ట మధ్యాహ్నం వీపుకు చురకలెంటించిన సూర్యుడు
వున్నపళంగా మేఘాల చాటుకెళ్ళి
చప్పున ఆకాశం రోడ్డుపైకి వచ్చేసినట్టు
ఏదో బ్రేకుల్లేని వాహనం
నడుస్తున్న మన పక్కనుండి సర్రున వెళ్లిపోయినట్టు
స్వాతి వానలా కురిసి ఆగిపోతుంటారు.
కొందరు మాత్రం చిన్నప్పటి చెరువు ఈతలో
దోసిలిలో చిక్కి జారిపోయిన చేప పిల్లల్లా
గుర్తుకొచ్చినట్టే వచ్చి తెరచాటు కెళిపోతుంటారు.
గుండెలపైన ఆడించి పెంచిన వాళ్ళు మాత్రం
ఎడారిలో నడుస్తున్నా పున్నమి వెన్నెల రాత్రుల్లో మన పక్కనే నడిచే
మన నీడలా మనసు తోటలో మనతో పాటే మసులుతుంటారు!
కష్టాల్లో నైనా నష్టాల్లో నైనా కన్నీటి కెరటాల్లోనైనా!!

• ఈతకోట సుబ్బారావు, 9440529785