ఆకలి శిల..!

చదవలేని మనసు పుస్తకం నేను!
ప్రతి అక్షరం వెనుక
ఉరితీయబడ్డ గాథలే నావి!
సమాజపు అమానుష రాక్షస క్రీడలో
బంతిలా విసిరేయబడ్డ విసర్జాన్ని!
గుడిమెట్లపై బాల్యం పాఠాలు నేర్చి
పలక బలపం ఎరుగని
అంటరాని ఒంటరివాడిని!
ఆనాధ ఆవిటీతనం నాలో నాటింది
మరణం కూడా నన్ను మరచిపోయింది
ఆకలికేక దండోరా వేసింది
న్యాయం అన్యాయం తెలుసుకోలేని
పాపం పుణ్యం ఎరగక
ఉదరంలో పేగు కుహరాల మంటలు
దావాల దండిస్తుంటే
నర నరాన పాకుతూ ఉంటే
ఉప్పెనలా ఉద్రేకం ఊపిరై
నోటికో ముద్ద కోసం
రహదారులపై చేతులు చాచేను…!
ఏ వయస్సు మనసు కరగలే!
ఏ తలుపు తెరచి చూడలే!
ఏ మనిషి మనిషిగా నన్ను ఆదరించలే
ఏ చేతులు కూడా కూడు పెట్టలే
గూడులేక గుడ్డలేక
ఆకలి దాహార్తిని తీర్చే దారి కానరాక
అలమటించి అలమటించి
నిరసన దేహం కూలిపోయో…
ఏ రెండు ప్రేమ కలయికలతోనో
భువిపై విసిరేయబడ్డ
మాంసపు ముద్దను నేను
ఊరు పేరులేని ప్రపంచంలో
మూలలను తెలియని
పేదరిక పాన్పుపై ఒదిగే
ఆకలి శిలను నేను


డా|| పగిడిపల్లి సురేందర్‌,
80748 46063