ముక్కు బ్లాక్‌ అయిందా?

ముక్కు దిబ్బడ అనేది సాధారణమైన శ్వాస సమస్య. ఇది శ్వాస తీసుకోవడంలో ఇబ్బందితో పాటు, నిద్రకు కూడా అంతరాయం కలిగిస్తుంది. సమస్య తీవ్రతను బట్టి రోజువారీ పనులపైనా ప్రభావం చూపుతుంది. ఎంతో ఇబ్బందిపెట్టే ఈ సమస్య నుంచి ఉపశమనం కోసం కొన్ని ఇంటి చిట్కాలు మీ కోసం…

వేప లేదా యూకలిప్టస్‌ నూనె
యూకలిప్టస్‌ లేదా వేప నూనెతో ముక్కు దిబ్బడను తగ్గించుకోవచ్చు. ఈ నూనెలను ఆవిరి పట్టడం వల్ల శ్వాసనాళాల్లో ఉండే శ్లేష్మాన్ని కరిగించి, శ్వాస మార్గాలను సాఫీగా చేస్తాయి.
గోరువెచ్చని నీటిలో 2-3 చుక్కల యూకలిప్టస్‌ నూనె లేదా వేప నూనె వేయాలి. ఈ నీటి నుంచి వచ్చే ఆవిరిని దుప్పటి కప్పుకుని ముక్కు ద్వారా, నోటి ద్వారా పీల్చుకోవాలి.

ఆవిరి పట్టడం
ఆవిరి పట్టడం ద్వారా ముక్కులోని శ్లేష్మాన్ని సులభం గా కరిగించి, దిబ్బడను తగ్గించుకోవచ్చు. ఒక పాత్రలో వేడి నీటి ఆవిరిని దుప్పటి కప్పుకుని శ్వాసగా తీసుకోవాలి. దీని వల్ల ముక్కులో ఉండే శ్లేష్మం త్వరగా కరుగుతుంది.

గోరువెచ్చని నీరు తాగడం
వేడినీరు లేదా గోరువెచ్చని నీళ్లు లేదా ఇతర పానీయాలు తాగడం ద్వారా ముక్కులో ఏర్పడిన అదనపు శ్లేష్మాన్ని తగ్గించుకోవచ్చు. ఇది శరీరానికి తేమను అందించి శ్వాస మార్గాలను తెరిచి, ముక్కులో నెమ్మదిగా శ్వాస తీసుకోవడంలో సహాయపడుతుంది.

తేనె, అల్లం
అల్లం రసానికి తేనె కలిపి తీసుకుంటే ముక్కు దిబ్బడ తగ్గుతుంది. అల్లం కషాయం వెచ్చగా తాగినా మంచి ఫలితం ఉంటుంది. అల్లం లోని యాంటీ ఇన్‌ఫ్లమేటరీ గుణాలు శ్వాస మార్గాలను సాఫీ చేస్తాయి.
ఒక టీ స్పూన్‌ అల్లం రసం, ఒక టీ స్పూన్‌ తేనె కలిపి తాగడం ద్వారా ఉపశమనం పొందవచ్చు.

తగినంత విశ్రాంతి
విష్రాంతి తీసుకోవడం శరీరానికి శక్తి సంతరించు కుని వ్యాధిని ఎదుర్కోవడానికి సమాయత్తం అవుతుంది. శరీరానికి తగినంత విశ్రాంతి ఇవ్వడం వలన ఇన్ఫెక్షన్‌ త్వరగా తగ్గుతుంది. శ్వాస సమస్యలను తట్టుకోవడానికి మెరుగైన సామర్థ్యం పొందుతుంది.