పచ్చి మామిడితో బోలెడు లాభాలు?

వేసవి వచ్చిందంటే అందరికీ గుర్తొచ్చేది మామిడి.. పిల్లల నుంచి పెద్దలవరకూ అందరికీ ఇష్టమైన మామిడితో రుచి మాత్రమే కాదు.. ఎన్నో ఆరోగ్య ప్రయోజనాలున్నాయని నిపుణులు అంటున్నారు. పచ్చి మామిడిలో విటమిన్‌ సి, విటమిన్‌ ఏ, బి-కాంప్లెక్స్‌, ఫైబర్‌, కాల్షియం, పొటాషియం, మాంగనీస్‌, యాంటీ ఆక్సిడెంట్లు అధికంగా ఉన్నాయి. ఇందులోని నాచురల్‌ యాసిడ్‌ల వల్ల దీనికి ప్రత్యేకమైన రుచి వస్తుంది, అదే యాసిడ్‌లు శరీరాన్ని పలు విధాలుగా శక్తివంతం చేస్తాయి.
పచ్చి మామిడి ప్రయోజనాలు
పచ్చి మామిడిలో విటమిన్‌ సి పుష్కలంగా ఉంటుంది. ఇది శరీరంలోని తెల్ల రక్తకణాల ఉత్పత్తిని మెరుగుపరచి రోగ నిరోధక వ్యవస్థను బలోపేతం చేస్తుంది. ఇది గాయాలను నయం చేయటంలో, చర్మ ఆరోగ్యాన్ని మెరుగుపరచడంలో ఎంతో ఉపయోగ పడుతుంది.
జీర్ణవ్యవస్థకు మేలు
పచ్చి మామిడిలో ఫైబర్‌, పెక్టిన్‌ అనే సహజ పదార్థాలు అధికంగా ఉండటం వల్ల పేగుల పనితీరును మెరుగుపరుస్తాయి. మలబద్దకం, అజీర్ణం, ఆమ్లత్వం వంటి సమస్యలకు ఇది స్వభావసిద్ధమైన పరిష్కారంగా పనిచేస్తుంది. ప్రతి రోజూ కొద్ది మోతాదులో పచ్చి మామిడిని తీసుకుంటే జీర్ణక్రియ చక్కబడి, ఆహారం పూర్తిగా జీర్ణమవుతుంది. వేసవి తీవ్రత పెరిగే సమయంలో శరీరం లోపల వేడి పెరగడం, డీహైడ్రేషన్‌ కావడం సహజం. పచ్చి మామిడిలో ఉండే సహజ ఎలక్ట్రోలైట్లు ముఖ్యంగా సోడియం, పొటాషియం శరీరంలోని నీటి శాతాన్ని సమతుల్యంగా ఉంచడంలో కీలకపాత్ర పోషిస్తాయి. వేసవి మంట కారణంగా వచ్చే తలనొప్పులు, విరేచనాలు వంటి సమస్యలు తగ్గుతాయి.
గుండె ఆరోగ్యానికి మేలు
పొటాషియం శరీరంలోని ద్రవాల సమతుల్యతను కాపాడుతుంది. ఇది రక్తపోటు నియంత్రణలో కీలకపాత్ర పోషిస్తుంది. పచ్చి మామిడిలో ఉండే యాంటీ ఆక్సిడెంట్లు గుండెను రక్షించడంలో సహాయపడతాయి.
బరువు తగ్గించడంలో సహాయం
పచ్చి మామిడిలో కేలరీలు తక్కువగా ఉండటంతో పాటు కొవ్వు కూడా చాలా తక్కువగా ఉంటుంది. ఇది డైట్‌లో భాగంగా తీసుకోవచ్చు. జీర్ణక్రియ మెరుగవ్వడం వల్ల శరీరంలోని కొవ్వు కరిగే ప్రక్రియ వేగవంతమవుతుంది.