90వ పడిలో పంచాయతీకి పోటీ

తిరువనంతపురం : అక్షరాస్యత, మానవ వికాస సూచీల్లో అగ్రస్థానంలో ఉన్న కేరళలో ఆసక్తికర అంశాలకు కొదవ ఉండదు. వచ్చే నెలలో రాష్ట్రంలో జరగనున్న స్థానిక సంస్థల ఎన్నికల బరిలో 90 ఏండ్ల వయస్సున్న నారాయణ్‌ నాయర్‌ స్వతంత్ర అభ్యర్థిగా పోటీ చేస్తుండటం జాతీయ మీడియా దృష్టిని ఆకర్షించింది. విశ్రాంత ప్రభుత్వ ఉద్యోగి అయిన నారాయణ్‌ అశమన్నూర్‌ గ్రామ పంచాయతీ రెండో వార్డు నుంచి ఈ ఎన్నికల్లో స్వతంత్ర అభ్యర్థిగా పోటీకి దిగుతున్నారు. తెల్ల చొక్కా, ధోతీ ధరించిన నారాయణ్‌ వణుకుతున్న స్వరంతోనే ఓట్లను అభ్యర్థిస్తున్నారు. ఈ వయసులో ఎన్నికల్లో పోటీకి దిగడంపై ఓ విలేకరి ప్రశ్నించగా ఆయన బదులిస్తూ.. వయసు దేనికీ అడ్డుకాదన్నారు. వార్డు అభివృద్ధి చెందాలని కోరుకుంటున్నానని, ఇందుకోసం ఎన్నికల్లో పోటీ చేస్తున్నానన్నారు. నారాయణ్‌ గుర్తు కెటిల్‌. ఈ ఎన్నికల్లో తాను విజయం సాధిస్తాననే నమ్మకం తనకు ఉందని.. నారాయణ్‌ ధీమా వ్యక్తంచేశారు. ఇక, కేరళలో రెండు దశల్లో స్థానిక ఎన్నికలు జరగనున్నాయి. డిసెంబరు 9, 11 తేదీల్లో పోలింగ్‌ జరనుండగా..13న ఫలితాలు వెలువడనున్నాయి.