రాహుల్‌ గాంధీ, కాంగ్రెస్‌..బీజేపీ బీ-టీమ్‌

కేరళ సీఎం పినరయ్ విజయన్‌
ఎర్నాకుళం (కేరళ) : రాహుల్‌గాంధీ, ఆయన పార్టీ కాంగ్రెస్‌ బీజేపీకి బీ-టీమ్‌ అని కేరళ ముఖ్యమంత్రి పినరయ్ విజయన్‌ గురువారం విమర్శించారు. కాంగ్రెస్‌ పార్టీ తన సొంత తప్పుల నుండి పాఠాలు నేర్చుకోకుండా, అధికార పార్టీ వైఖరులను అనుకరిస్తోందని విజయన్‌ అన్నారు. గురువారం ఎర్నాకుళంలో జరిగిన మీడియా సమావేశంలో విజయన్‌ మాట్లాడుతూ.. ‘రాహుల్‌ గాంధీ ఒక జాతీయ నాయకుడు. అయినప్పటికీ కేరళలోని ఒక సాధారణ స్థానిక కాంగ్రెస్‌ కార్యకర్తకు ఉండే ప్రాథమిక అవగాహన కూడా ఆయనకు లేదు.

అతను అనుభవాల నుండి లేదా తప్పుల నుండి నేర్చుకోవడానికి అస్సలు ఇష్టపడరు. అతనికి పతనం ఎలా సంభవిస్తుందో అర్థం చేసుకోవడం కష్టం. దేశంలో రాహుల్‌ గాంధీ, అతని పార్టీ కాంగ్రెస్‌ బీజేపీకి బి-టీమ్‌ లాంటివి. అయినప్పటికీ దాని వైఖరినే భారతదేశం అంతటా అనుసరిస్తున్నారు’ అని ఆయన అన్నారు. కాగా, బుధవారం కేరళ కొజికోడ్‌లో జరిగిన ఎన్నికల ప్రచారంలో ముఖ్యమంత్రి విజయన్‌పైనా, ఎల్‌డీఎఫ్‌ ప్రభుత్వంపైనా రాహుల్‌ తీవ్ర విమర్శలు చేశారు. ఎల్‌డీఎఫ్‌, బీజేపీల మధ్య భాగస్వామ్యం ఉందని, ఈ రెండూ ప్రజలను విభజిస్తున్నాయని రాహుల్‌ వ్యాఖ్యానించారు. రాహుల్‌ వ్యాఖ్యలకు విజయన్‌ స్పందించారు.