అమలుకు బీజేపీయేతర రాష్ట్రాల విముఖత
బీజేపీ పాలిత రాష్ట్రాల్లోనూ నిరసనలు, ఎఫ్‌ఐఆర్‌ల బనాయింపు
యూపీ, గుజరాత్‌లో బీఎల్‌ఓల ఆగ్రహం
తీవ్ర పని ఒత్తిడి.. అధికారుల బెదిరింపులు కారణం
మహిళా బీఎల్‌ఓలకూ తప్పని వేధింపులు
రాత్రి వేళల్లో ఫోన్‌ కాల్స్‌ వస్తున్నాయని ఆందోళన
ఓటర్ల జాబితా ప్రత్యేక సమగ్ర సవరణ (సర్‌) ప్రక్రియపై ఇప్పటికీ ఎన్నో అనుమానాలు..మరెన్నో సందేహాలు వ్యక్తమవుతున్నాయి. బీజేపీ రిమోట్‌తో కేంద్రఎన్నికల సంఘం(సీఈసీ) పనిచేస్తోందన్న విమర్శలు వెల్లువెత్తుతున్నాయి. బీహార్‌ అసెంబ్లీ ఎన్నికల్లో కదిలించిన తేనెతుట్టెను మిగతా రాష్ట్రాల్లోనూ అమలుచేసి… తమకు అనుకూలమైన ఓటర్లు ఉండేలా చేయాలన్నదే మోడీ సర్కార్‌ యోచన అని రాజకీయపరిశీలకులు విశ్లేషిస్తున్నారు. లక్షలాది ఓట్లను తీసేయటానికి బూత్‌స్థాయి అధికారుల్ని వెంటాడి వేధిస్తున్న తీరుపై సర్వత్రా ఆందోళనవ్యక్తమవుతోంది.
గాంధీనగర్‌ : దేశవ్యాప్తంగా పలు రాష్ట్రాల్లో జరుగుతోన్న ఓటర్ల జాబితా ప్రత్యేక సమగ్ర సవరణ (సర్‌) ఇప్పటికే తీవ్ర వ్యతిరేకతను మూటగట్టుకున్నది. దీనిపై పలు ప్రతిపక్షపార్టీలు విమర్శలు గుప్పించాయి. ఇప్పుడు ఈ సర్‌ ప్రక్రియ.. అందులో భాగస్వాములైన బూత్‌ స్థాయి అధికారులకు (బీఎల్‌ఓలు) శాపంగా మారింది. దేశవ్యాపంగా పలు రాష్ట్రాల్లో నమోదవుతోన్న బీఎల్‌ఓల మరణాలు ఈ ప్రక్రియ తీరుకు అద్దం పడుతున్నాయి. తీవ్ర పని ఒత్తిడి, నిర్దేశిత టార్గెట్‌ను చేరుకోవాలంటూ అధికారుల నుంచి బెదిరిం పులు, గుర్తుతెలియని వ్యక్తుల నుంచి వేధింపులు బీఎల్‌ఓ లను ఆందోళనకు గురి చేస్తున్నాయి. ఉత్తరప్రదేశ్‌లో సర్‌ ప్రక్రియలో ఉన్న బీఎల్‌ఓలపై ఎఫ్‌ఐఆర్‌లు నమోదవుతున్నాయి.
మరోవైపు గుజరాత్‌లోని సర్‌లో భాగంగా విధులు నిర్వర్తిస్తున్న బీఎల్‌ఓల పరిస్థితి కూడా ఇదే విధంగా ఉన్నది. అహ్మదాబాద్‌లోని ఖోఖ్రా డేటా అప్‌లోడింగ్‌ సెంటర్‌ వద్ద దాదాపు 250 మంది బీఎల్‌ఓలు తమ పనిని నిలిపివేసి మరీ ధర్నాకు దిగారు. సర్‌ పనుల్లో భాగంగా తాము తీవ్ర ఒత్తిడికి గురవు తున్నామని ఆరోపించారు. మరోపక్క తాము ఎదుర్కొనే సమస్యలకు పరిష్కారం చూపకుండా అధికారులు బెదిరిం పులకు దిగుతున్నారని ఆరోపించారు. ప్రాథమిక పాఠశాల ఉపాధ్యాయులైన ఈ బీఎల్‌ఓలు అధికారుల తీరుపై అసంతృప్తిని వ్యక్తం చేస్తున్నారు. సరైన మార్గదర్శకత్వం ఇవ్వకుండానే కఠినమైన గడువులను పెడుతున్నారని తమ బాధను వెళ్లగక్కారు. ముఖ్యంగా మహిళా బీఎల్‌ఓల ఫోన్‌నెంబర్లు బహిర్గతం కావటంతో రాత్రి వేళల్లో కాల్స్‌ వస్తున్నాయనీ, దీంతో తాము వేధింపులకు గురవుతున్నామని వారు చెప్పారు.
సర్వర్‌ సమస్యలు.. అర్ధరాత్రుల్లోనూ పని చేయాల్సిన పరిస్థితులు
ఎక్కువ పని గంటల పట్ల కూడా బీఎల్‌ఓలు ఆందోళన వ్యక్తం చేశారు. ఉదయం 7 గంటలకు సెంటర్‌కు చేరి మధ్యాహ్నం వరకు ఫీల్డ్‌ వర్క్‌ చేసి, తిరిగి అప్‌లోడింగ్‌ పనులకు రావటంతో తాము తీవ్రమైన ఒత్తిడికి గురవుతున్నామని వివరించారు. సర్వర్‌ సమస్యలతో రాత్రి వేళల్లోనూ పని చేయాల్సి వస్తోందని చెప్పారు. ”అర్ధరాత్రి 12, 1 గంటల సమయాల్లోనూ అధికారులు ఫోన్‌ చేసి సర్వర్‌ పని చేస్తే వెంటనే డేటా ఎంట్రీ చేయాలని చెప్తారు. మూడు వారాల నుంచి నాకు కుటుంబంతో గడిపే సమయమే లేదు” అని ఓ మహిళా బీఎల్‌ఓ వాపోయింది.
ప్రజలకు అవగాహన కల్పించకపోవటం ప్రభుత్వం చేసిన తప్పు
ఇటీవల కె.కె శాస్త్రి కాలేజీలో ఎన్నికల అధికారులతో జరిగిన వాగ్వాదం తర్వాత 246 మంది అహ్మదాబాద్‌ మునిసిపల్‌ కార్పొరేషన్‌ స్కూల్‌ బోర్డ్‌ బీఎల్‌ఓలు విధులు నిర్వర్తించేందుకు నిరాకరించారు. ”ఈ పని 20 రోజుల్లో పూర్త య్యేది కాదు, కనీసం 60 రోజులు కావాలి. ఇది ఒక్క అమ్రైవాడి నియో జకవర్గం సమస్యే కాదు.. మొత్తం అహ్మదాబాద్‌లోని అన్ని నియోజకవర్గాల సమస్య” అని ఒక బీఎల్‌ఓ తెలిపారు. 2002 ఓటర్ల జాబితాలో ఓటర్ల పేర్లను దొరకబట్టడం బీఎల్‌ఓలకు పెద్ద సమస్యగా మారింది. అయితే ఈ విషయంలో అధికారులు తమకు ఎలాంటి పరిష్కారాన్ని చూపకుండానే టార్గెట్‌ను చేరుకోవాలని ఒత్తిళ్లు పెడుతు న్నారని మరొక బీఎల్‌ఓ చెప్పారు. ఓటర్‌ ఫారమ్‌లను ఏఎస్‌డీ (ఆబ్సెంట్‌, షిఫ్టెడ్‌, డెత్‌)గా చూపించడం నుంచి ప్రతి ఓటరునూ మ్యాపింగ్‌ చేయడం వరకు.. బీఎల్‌ఓ లపై నిరంతర ఒత్తిడి, బెదిరింపులు ఉంటున్నాయి. ఒకవైపు అధికారులు, మరోవైపు గుర్తుతెలియని వ్యక్తుల నుంచి వేధింపులు.. ఇలా రెండు వైపుల నుంచీ ఉపాధ్యాయులు వేధింపులను ఎదుర్కొంటున్నారు. అయితే ప్రజలకు అవగాహన కల్పించకపోవడం ప్రభుత్వం చేసిన పెద్ద తప్పు అని ఓ బీఎల్‌ఓ తెలిపారు.
బెదిరింపులు ఆందోళనకరం
బీఎల్‌ఓలు ఎంత కష్టపడినప్పటికీ… వారిని బెదిరించటం, ఒత్తిళ్లకు గురి చేయటం ఏ మాత్రమూ సరికాదని అహ్మదాబాద్‌ మునిసిపల్‌ టీచర్స్‌ అసోసియేషన్‌ అధ్యక్షుడు మను పటేల్‌ అన్నారు. బీఎల్‌ఓలకు సాంకేతిక సిబ్బంది, అదనపు సహాయక సిబ్బంది అవసరమని సూచించారు. గుజరాత్‌లో ప్రస్తుతం 50,963 మంది బీఎల్‌ఓలు విధుల్లో ఉన్నారు. రాష్ట్రంలో ఓటర్ల సంఖ్య 5.08 కోట్లు. సర్‌ లెక్కింపు ప్రక్రియ డిసెంబర్‌ 4న మొదలవుతుంది.
మెడికల్‌ లీవ్‌లు నిరాకరణ
ఎన్నికల కమిషన్‌ స్పెషల్‌ ఇంటెన్సివ్‌ రివిజన్‌ (సర్‌) ప్రక్రియలో పాల్గొన్న బీఎల్‌ఓ ఆత్మహత్య చేసుకున్నట్టు వచ్చిన నివేదికల నడుమ యూపీ లోనూ అరాచకం సాగుతోంది.
అత్యధిక సంఖ్యలో ఓటర్లు కలిగి ఉన్న యూపీలో ఈ ఘటన చోటు చేసుకోవటం గమనార్హం. మొత్తం 50 కోట్ల మంది ఓటర్లలో, 15 కోట్ల మంది యూపీకి చెందినవారే. ఎన్నికల కమిషన్‌ నవంబర్‌ 26 బులెటిన్‌లో, ఫారమ్‌లను డిజిటలైజ్‌ చేసింది. ఇతర రాష్ట్రాల కంటే యూపీ వెనుకబడి ఉండటాన్ని గమనించిన అధికారులు బీఎల్‌ఓలపై ఒత్తిడిని పెంచారు. ఇలా అనేక కారణాలతో యూపీలోనూ వారికి పనిభారమవుతోంది.
‘గుండె శస్త్రచికిత్స అవసరం, కానీ వైద్య సెలవు లేదు’
”వారు మాకు వైద్య సెలవులు కూడా ఇవ్వడం లేదు, ‘ఎవరికీ టైఫాయిడ్‌ లేదు’ అని , ఎవరైనా అనారోగ్యంతో ఉన్నారని చెబితే, వారిపై ఎఫ్‌ఐఆర్‌ దాఖలు చేస్తామని చెబుతున్నారు. నాకు అధిక రక్తపోటు.. థైరాయిడ్‌ సమస్యలు ఉన్నాయి, కానీ ఎవరూ వినడానికి సిద్ధంగా లేరు. మేము తెల్లవారుజామున 2 గంటలకు మా ఇండ్లకు చేరుకుంటున్నాము. వారు రాత్రి 10 గంటలకు సమావేశాలు నిర్వహిస్తారు” అని ఓ బీఎల్‌ఓ చెప్పారు.
ఈసీ, యూపీ సీఎంకు ఉపాధ్యాయ సంఘాల లేఖ
ఉత్తరప్రదేశ్‌ ప్రాథమిక శిక్షా సంఫ్‌ు (యూపీ ఉపాధ్యాయ సంఘం) నవంబర్‌ 24న రాష్ట్ర ఎన్నికల కమిషన్‌, ముఖ్యమంత్రి, జిల్లా మేజిస్ట్రేట్‌ లకు ఒక లేఖ రాసింది. ఈ సర్‌ కారణంగా ఉపాధ్యాయులు ”మానసిక వేధింపుల” బారిన పడుతున్నారనీ, ఉద్యోగాలకు రాజీనామా చేస్తున్నారని వివరించింది. అందువల్ల ఈ ప్రక్రియను ఆపాలని డిమాండ్‌ చేసింది. బీఎల్‌ఓలపై పడిన విపరీతమైన ఒత్తిడి ఇప్పటికే అనేక ప్రాణాలను తీసుకున్నది. వారు తీవ్ర పని భారం, తగిన విశ్రాంతి, రక్షణ చర్యలు లేని వాతావరణంలో పని చేస్తున్నారు. ఇవి యాదృచ్ఛిక ఘటనలు కావు.. బాధ్యతారహితమైన, అమానుష పరిపాలనా తీరు ప్రత్యక్ష ఫలితాలు.
ఎన్నికల కమిషన్‌ తన స్వంత డూప్లికేట్‌-ఓటర్‌ గుర్తింపు సాఫ్ట్‌వేర్‌ను ఉపయోగించకపోవడం ఆశ్చర్యకరం. కచ్చితత్వాన్ని పెంచడం, మానవ శ్రమను తగ్గించడానికి ప్రత్యేకంగా రూపొందించిన ఈ టూల్‌ను ఉపయోగించక పోవడం వెనుక నిజమైన ఉద్దేశ్యంపై తీవ్రమైన సందేహాలు వ్యక్తమవుతున్నాయి. ఇంకా బీఎల్‌ఓలు, ఫారాలు అప్‌లోడ్‌ చేయాల్సిన సామాన్య పౌరులు.. ఇంటర్నెట్‌, సర్వర్‌ సమస్యలు, తరచూ వచ్చే సాంకేతిక లోపాలతో తీవ్ర ఇబ్బందులు పడుతున్నారు. పేదలు, గ్రామీణ ప్రజలకు ఒక సాధారణ ఫారం అప్‌లోడ్‌ చేయడం కూడా కష్టం కావటంతో వారు ఎన్నికల జాబితాలో ఓటరుగా చేరటం కష్టంగా మారుతోంది. లోపభూయిష్టమైన ఈ ప్రక్రియను ఎన్నికల కమిషన్‌ వెంటనే నిలిపివేయాలి. పెద్ద సంఖ్యలో ప్రజలు ఓటు హక్కు కోల్పోవడాన్ని ఆపాలి.
యాప్‌ కష్టాలు
యాప్‌ పని తీరు కూడా బీఎల్‌ఓలకు చాలా ఇబ్బందికరంగా మారింది. కొన్నిసార్లు హ్యాంగ్‌ అవుతుందని ఓ బీఎల్‌వో వివరించారు. తన నియోజక వర్గంలో ఒక బీఎల్‌ఓ 100 ఫారమ్‌లను డిజిట లైజ్‌ చేయగలిగితే, మరొకరు కూడా అలాగే చేయ గలగాలని అధికారులు ఆదేశిస్తున్నారని తెలిపారు. డిజిటలైజేషన్‌ ప్రయత్నంలో వెనుకబడటానికి ప్రధాన కారణం ఈసీ జాతీయ మొబైల్‌ అప్లికేషన్‌లో సాంకేతిక లోపాలుండటమేనని అంటున్నారు.
సర్‌ లోపభూయిష్టమమైన ప్రక్రియ తీవ్రంగా వ్యతిరేకిస్తున్నాం : సీపీఐ(ఎం)
దేశవ్యాప్తంగా జరుగుతున్న సర్‌ ప్రక్రియ లోపభూయిష్టమైన ప్రక్రియనీ, దీన్ని తీవ్రంగా వ్యతిరేకిస్తున్నట్టు సీపీఐ(ఎం) పునరుద్ఘాటించింది. లోపాలతో కూడుకున్న ఈ ప్రక్రియను ఆపాలని డిమాండ్‌ చేసింది. ఈ మేరకు సీపీఐ(ఎం) పొలిట్‌బ్యూరో ఒక ప్రకటనను విడుదల చేసింది. దీని ప్రకారం.. ఒక సాధారణ, పారదర్శక, ప్రజల భాగస్వామ్యంతో జరగాల్సిన ఈ ప్రక్రియ అస్తవ్యస్తమైన, ఏకపక్ష ప్రక్రియగా మారింది. ఇది ఓటర్ల జాబితా సమగ్రతకు, ఆ పనిని చేపట్టడానికి వచ్చిన సిబ్బంది భద్రతనూ ప్రమాదంలోకి నెట్టేస్తున్నది. ఈ మొత్తం ప్రక్రియ తొందరలో, సరైన ప్రణాళిక లేకుండా జరుగుతోంది. బీఎల్‌ఓలకు ఇంటింటి వెరిఫికేషన్‌ను పూర్తి చేయడానికి అసాధ్యమైన గడువులు పెట్టారు. ఈ తొందరపాటుతో కొన్ని ప్రాంతాల్లో బీఎల్‌ఓలు కొన్ని పార్టీ కార్యాలయాల్లో కూర్చొని ఓటర్లు అక్కడికే రావాలని చెప్తున్నట్టు ఫిర్యాదులు వచ్చాయి. ఇవన్నీ భారీ ఎత్తున ఓటర్ల తొలగింపునకు, పొరపాట్లకు దారి తీస్తాయి.
ఏడు రాష్ట్రాలు..20 రోజులు.. 26 మంది బీఎల్‌ఓలు మృతి
దేశవ్యాప్తంగా బీఎల్‌ఓల మరణాలు ఆందోళనకరంగా మారాయి. ఇటీవల ఏడు రాష్ట్రాల్లో ఇలాంటి ఘటనలు నమోదయ్యాయి. కేవలం 20 రోజుల్లో 26 మంది బీఎల్‌ఓలు మరణించారని ఈసీ గణాంకాలను ఉటంకిస్తూ పలు కథనాలు వెలువడ్డాయి. దీంతో ఎస్‌ఐఆర్‌ ప్రక్రియలో బీఎల్‌ఓలు ఎదుర్కొంటున్న ఒత్తిళ్లు, వేధింపుల గురించి ప్రతిపక్షాలు సైతం తీవ్ర ఆందోళనను వ్యక్తం చేశాయి. ఎస్‌ఐఆర్‌ ప్రక్రియను తీవ్రంగా వ్యతిరేకిస్తున్నాయి. ఈ ప్రక్రియలో దళితులు, బీసీలు, పేదలు, మైనారిటీల ఓట్లను తొలగిస్తున్నారని ఆరోపిస్తున్నాయి. ఎన్నికల సంఘం ప్రస్తుతం దేశవ్యాప్తంగా 12 రాష్ట్రాలు, కేంద్ర పాలిత ప్రాంతాల(యూటీ)ల్లో సర్‌ ప్రక్రియను నిర్వహిస్తున్నది. ఇందులో భాగంగా 51 కోట్ల మందికి పైగా ఓటర్ల వివరాలను వెరిఫై చేసేందుకు 5.32 లక్షల మంది బీఎల్‌ఓలు విధుల్లో ఉన్నారు. వీరిలో అధికం స్కూల్‌ టీచర్లే కావటం గమనార్హం.
