మెట్రో జోన్‌లో అండర్‌ గ్రౌండ్‌ విద్యుత్‌ కేబుళ్లు

రూ.4,051 కోట్ల ప్రతిపాదనలకు ఆమోదం
ఇందన శాఖ ఉత్వర్వులు జారీ

నవతెలంగాణ బ్యూరో – హైదరాబాద్‌
హైదరాబాద్‌లోని మెట్రో జోన్‌ (బంజారా హిల్స్‌, సికింద్రాబాద్‌, హైదరాబాద్‌ సెంట్రల్‌, హైదరాబాద్‌ సౌత్‌) సర్కిళ్లలో ఓవర్‌హెడ్‌ లైన్‌ను అండర్‌గ్రౌండ్‌ కేబుల్‌గా మార్చే ప్రతిపాదనకు సర్కార్‌ గ్రీన్‌ సిగల్‌ ఇచ్చింది. ఈ మేరకు శనివారం ఇందన శాఖ ముఖ్య కార్యదర్శి నవీన్‌ మిట్టల్‌ ఉత్తర్వులు జారీ చేశారు. రూ.4,051 కోట్ల అంచనా వ్యయంతో ఎస్పీడీసీఎల్‌ ప్రతిపాదించిన డిటేయిల్‌ ప్రాజెక్ట్‌ రిపోర్ట్‌ (డీపీఆర్‌)ను ఆమోదించినట్టు ఉత్తర్వులో పేర్కొన్నారు. విద్యుత్‌ సరఫరాలో నాణ్యత, విశ్వసనీయతను వినియోగదారులకు అందించేందుకు ఈ నిర్ణయం తీసుకున్నట్టు పేర్కొంది. క్షేత్రస్థాయి పరిస్థితుల మేరకు అంచనా వ్యయంలో హెచ్చతగ్గులుంటాయని తెలిపింది. సర్కార్‌ ఆదేశాల మేరకు ఎస్పీడీసీఎల్‌ సీఎండీ తదుపరి చర్యలు తీసుకోవాలని ప్రభుత్వం ఆదేశించింది.