కరేబియన్‌ సముద్ర జలాల్లో బోటుపై అమెరికా దాడి

ఆరుగురు మృతి
వాషింగ్టన్‌ : కరేబియన్‌ సముద్ర జలాల్లో ప్రయాణిస్తున్న బోటుపై అమెరికా దాడి చేసిందని, ఈ దాడిలో ఆరుగురు మరణించారని అమెరికా రక్షణ మంత్రి పీట్‌ హెగ్‌సెత్‌ శుక్రవారం తెలిపారు. ఈ ప్రాంతంలో సెప్టెంబరు మాసంలో ట్రంప్‌ ప్రారంభించిన మాదకద్రవ్యాల నిరోధక ప్రచారంలో భాగంగా ఈ దాడులు జరిగినట్లు ఆయన చెప్పారు. మాదకద్రవ్యాలను ఆ బోటు తీసుకెళుతోందని, మరణించిన ఆ ఆరుగురు నార్కో టెర్రరిస్టులని ఆయన పేర్కొన్నారు. ఈ మేరకు ఆయన ఎక్స్‌లో పోస్టు పెట్టారు. ఆ బోటులో ఏం తీసుకెళుతున్నారనడానికి ఎలాంటి సాక్ష్యాధారాలను హెగ్‌సెత్‌ చూపలేదు. సముద్ర జలాల్లో వున్న బోటుపై ఒక క్షిపణితో దాడి చేయడం వెంటనే అది పేలిపోవడం కనిపిస్తోన్న 20 సెకన్ల వీడియోను ఆయన పోస్టు చేశారు.