జూన్‌ నాటికి యుద్ధానికి తెర

రష్యా-ఉక్రెయిన్‌ ఘర్షణపై అమెరికా ఆకాంక్ష

కీవ్‌ : జూన్‌ నాటికల్లా రష్యా-ఉక్రెయిన్‌ ఘర్షణ ముగిసిపోవాలని అమెరికా కోరుకుంటోందని ఉక్రెయిన్‌ అధ్యక్షుడు వ్లాదిమిర్‌ జెలెన్‌స్కీ తెలిపారు. ఈ వేసవి ప్రారంభం నాటికి ఉభయపక్షాలు ఈ యుద్ధాన్ని ఆపాలని అమెరికన్లు కోరుకుంటున్నారు. ఈ టైమ్‌టేబుల్‌కు అనుగుణంగానే వారు ఆ పక్షాలపై ఒత్తిడిని పెంచే అవకాశం వుంది.” అని జెలెన్‌స్కీ విలేకర్లతో వ్యాఖ్యానించారు. ఈ ప్రతిపాదిత గడువు అమెరికన్‌ కాంగ్రెస్‌ ఎన్నికల ప్రచారంతో ముడిపడి వుందని ఆయన వ్యాఖ్యానించారు.

ప్రస్తుతానికి, ఈ యుద్ధం ముగిసిపోయిన తర్వాత ఉక్రెయిన్‌కు భద్రతా హామీలివ్వడానికి ప్రాతిపదికగా నాలుగు డాక్యుమెంట్లు వున్నాయని జెలెన్‌స్కీ చెప్పారు. ఆ నాలుగింటిలో ఉక్రెయిన్‌, అమెరికా మధ్య కుదిరిన భద్రతా హామీల ఒప్పందం, సుముఖంగా వున్నవారితో కూటమి ఏర్పాటుచేయడానికి ఒప్పందం, యురోపియన్‌ యూనియన్‌లో ఉక్రెయిన్‌ సభ్యత్వానికి గల అవకాశాలపై పత్రం, పై మూడింటింతో ముడిపెట్టేలా ఒక ఫ్రేమ్‌వర్క్‌ను రూపొందించేందుకు డాక్యుమెంట్‌ వున్నాయని తెలిపారు.