ఇదో క్రూరత్వం..!

‘నోర్మూయ్‌… నేను మగాడ్నే కాదు, మోగుడ్ని కూడా.. ఏందే రెచ్చిపోతున్నావ్‌! తిరుగుతానే.. తిరుగాను… ఒక్క దానితో కాదు, వంద మందితో తిరుగుతా. ‘ఆడది తిరిగి చెడింది, మగాడు తిరగక చెడ్డాడు’ అంటారు. దీని అర్థం ఏంటే? మగాళ్లు తిరుగుబోతులుకమ్మని చెప్పటమే. మరి ఆడోళ్లకు తిరగడం అనేదే ఆలోచనకు రాకూడదు. మన పురాణాల విషయం నీవు మర్చిపోతే ఎలా..?
జమదగ్ని-రేణకా ఎల్లమ్మ కథ తెలియందా ఏంటే. పాపం రేణుక అట్టా ఆలోచించింది కనుకే ఇట్టా పరుశురాముడు తల్లి తలను గొడ్డలితో నరికేశాడు.
తిరుగుబోతుతనం మగాడి హక్కే. యస్‌! ఆడోళ్లకో నీతి, మగాళ్లకో నీతి. ఈ దేశంలో ఇంకా మీ ఆడోళ్లకు బుద్ది రాకపోతే నేనేం చేసేది.
ఏంది.. నేను తిరుగుబోతుననే అనుమానంతో నా దగ్గరకి రావా? ఎంత పొగరేనీకు? అసలు భార్య అంటే ఏమనుకున్నావే. భరించేది, మొగుడు కోపిష్టి అయినా, రోగిష్టి అయినా భరించాలే.. కాపురం చేయాలే.. సతీసుమతి సినిమా చూళ్లేదా? కుష్టు భర్తను తట్టలో పెట్టుకుని వ్యభిచారి కొంపకు తీసుకపోలేదా ఏంటే? భర్త అవసరాలు తీర్చడమే పతివ్రతా ధర్మం.. గీదేశంలో.
ఏందే ఇంకా నసుగుతున్నావ్‌. స్త్రీ స్వేచ్ఛ-సమానత్వం ఈ మాటలు పేపర్లో చదువుకోడానికి, మీటింగుల్లో వినడానికి బావుంటాయి. ఒకవేళ స్త్రీ ఉద్యోగం చేసి, లేదా ఏదైనా పని చేసి తన కాళ్లపై తాను నిలబడితే… అలాంటోళ్లకు ఆ మాటలు పనికొస్తాయి.
భర్త మీద ఆధారపడే నీకెందుకు స్వేచ్ఛ, సమానత్వం! అదిగొ.. ఆ చూపేంది! లాగి కొట్టానంటే ఊపిరాడక చస్తావ్‌. పోవాలనుకుంటే పో. ఉండాలనుకుంటే ఉండు. ఉండాలంటే మాత్రం భర్త చెప్పుకింద తేలులా పడివుండు. అర్థమయిందా..?
మాలాగే ఆలోచించేవాళ్లు దేశంలో కోకొల్లలు. బొంబాయి హైకోర్టు తాజా తీర్పు చూడు. పెద్ద పెద్ద హెడ్డింగులతో వచ్చింది. తాపీగా కూర్చొని చదువుకో… ‘భర్తతో శృంగారానికి నిరాకరించడం క్రూరత్వమే’.
– శాంతారావు, 9959745723