రాష్ట్రాభివృద్ధే లక్ష్యం : సిఎం చంద్రబాబు
టిడిపి కార్యాలయంలో ప్రజల నుంచి వినతుల స్వీకరణ
అమరావతి : రాష్ట్రంలో మూడు ప్రాంతాల అభివృద్ధే లక్ష్యంగా రాష్ట్ర ప్రభుత్వం పనిచేస్తోందని టిడిపి అధినేత, ముఖ్యమంత్రి చంద్రబాబు నాయుడు వెల్లడించారు. టిడిపి కార్యాలయం ఎన్‌టిఆర్‌ భవన్‌లో శనివారం ఆయన ప్రజల నుంచి అర్జీలు స్వీకరించారు. ఈ సమయంలో తనను కలిసిన మీడియా ప్రతినిధులతో చంద్రబాబు కొంతసేపు మాట్లాడారు. అభివృద్ధి ఏ ఒక్క ప్రాంతానికే పరిమితం కాకుండా అన్ని ప్రాంతాల సమగ్రాభివృద్ధికి కృషి చేస్తున్నామని చెప్పారు. అందుకనుగుణంగా రాష్ట్రంలో మూడు ప్రాంతీయ జోన్లు ఏర్పాటు చేస్తామని వెల్లడించారు. రాజధాని అమరావతి పరిధిలో ఉన్న సమస్యలను దశలవారీ పరిష్కరిస్తామని చెప్పారు. రైతుల సమస్యల పరిష్కారంలో తొలుత కొంత గ్యాప్‌ ఉందని, తనతో వారు సమావేశమైన తరువాత అన్నింటిపైనా స్పష్టత వచ్చిందన్నారు. రెండో దశ భూ సమీకరణ వల్ల రైతులకే ఉపయోగమని, ఈ అంశాన్ని వారికి వివరించానని తెలిపారు. అమరావతి మున్సిపాల్టీగా మిగిలిపోకుండా మహానగరంగా అభివృద్ధి చెందితే ఎలాంటి ఫలితాలు ఉంటాయో రైతులు అర్థం చేసుకున్నారని తెలిపారు.
రైతులు కోరిన క్యాపిటల్‌ గెయిన్స్‌ మినహాయింపు అంశాన్ని కేంద్ర ఆర్థికశాఖ మంత్రి నిర్మలా సీతారామన్‌కు వివరించానని తెలిపారు. దీనిపై కేంద్రం చర్చించి నిర్ణయం తీసుకుంటుందని తెలిపారు. రైతుల సమస్యల పరిష్కారం కోసం నియమించిన త్రిసభ్య కమిటీ నిరంతరం వారితో సంప్రదింపులు జరుపుతోందన్నారు. రాజధాని రైతులంతా అమరావతి ప్రాంత అభివృద్ధి అసోసియేషన్‌ కింద అంతా ఒకే జెఎసిగా ఏర్పడితే వారితో సంప్రదిస్తూ అన్ని సమస్యలూ పరిష్కరిస్తామన్నారు. రాజధాని చుట్టుపక్కల ప్రాంతాల్లో లేఅవుట్లకు అనుమతుల సమస్యను త్వరలోనే పరిష్కారం చేస్తానని తెలిపారు. రాజధాని ప్రాంత అభివృద్ధి సంస్థ (సిఆర్‌డిఎ) అధికారులు, సిబ్బందిపై వస్తున్న ఫిర్యాదులపై విచారణ జరిపి చర్యలు తీసుకుంటామని చెప్పారు. భూములు త్యాగాలు చేసిన రైతుల సమస్యలు పరిష్కరించకుండా లంచం డిమాండ్‌ చేస్తే కఠిన చర్యలు ఉంటాయని హెచ్చరించారు. పోలవరం ప్రాజెక్టును గోదావరి పుష్కరాల నాటికి పూర్తిచేసే దిశగా కృషి చేస్తున్నామని చెప్పారు.
2029 ఎన్నికల అజెండాగా శిక్షణ తరగతులు
పార్టీ కార్యకర్తలకు డిసెంబర్‌ 1వ తేదీ నుంచి నిర్వహించే శిక్షణ తరగతులు 2029 ఎన్నికల అజెండాగా ఉండాలని చంద్రబాబు చెప్పారు. గ్రీవెన్స్‌ అనంతరం పార్టీ కార్యాలయంలో అందుబాటులో ఉన్న నేతలతో ఆయన సమావేశమయ్యారు. కొత్తతరం నాయకుల్ని తయారు చేయాలని చెప్పారు. ప్రత్యర్థుల ఎత్తుగడల్ని ముందే పసిగట్టే విధంగా యంత్రాంగం తయారు కావాలని చెప్పారు. పార్టీ ప్రధాన కార్యదర్శి లోకేష్‌ దిశానిర్దేశం తర్వాత పార్టీ కార్యకర్తల సమావేశాలు, ప్రజావేదికల్లో 5 శాతం పురోగతి కనిపించిందని తెలిపారు. కుప్పం, మంగళగిరి, వినుకొండ, పాలకొల్లు, గజపతినగరం నియోజకవర్గాల్లో అమలవుతున్న క్యాడర్‌ ఎంపవర్‌మెంట్‌ విధానం అన్ని నియోజకవర్గాల్లో అమలు కావాలని ఆదేశించారు. అభివృద్ధి, సంక్షేమం సమపాళ్లల్లో తీసుకెళ్తున్నప్పుడు వనరుల సృష్టి అవసరమని చెప్పారు.
పోలవరం వంటి ప్రాజెక్టులు పూర్తయితే సాగునీటి లభ్యత పెరిగి సాగు విస్తీర్ణం పెరుగుతుందని తెలిపారు. భవిష్యత్తులో వ్యవసాయ, అనుబంధ పంటలకు మార్కెటింగ్‌ సమస్యలు తలెత్తకుండా ఇప్పటి నుంచే ప్రణాళికలు రూపొందించుకోవాలని తెలిపారు. తిరువూరు ఎమ్మెల్యే కొలికపూడి వ్యవహారంపై త్వరలో తానే స్వయంగా మాట్లాడతానని తెలిపారు. గిరిజన సంక్షేమశాఖ మంత్రి గుమ్మడి సంధ్యారాణి పిఎ వ్యవహారంపై ఈ సందర్భంగా చర్చకు వచ్చినట్లు సమాచారం. మహిళల విషయంలో నేతలు, పార్టీ శ్రేణులు, మంత్రులు, సిబ్బంది జాగ్రత్తగా ఉండాలని చెప్పారు. మహిళలకు సంబంధించిన విషయంలో ఆరోపణలు వచ్చిన వ్యక్తిని నిజనిర్ధారణ అయ్యేవరకూ పక్కనపెట్టాలని తెలిపారు. ఈ సమావేశంలో ఆ పార్టీ రాష్ట్ర అధ్యక్షులు పల్లా శ్రీనివాస్‌, పొలిట్‌బ్యూరో సభ్యులు వర్ల రామయ్య, కార్యాలయ కార్యదర్శి పి అశోక్‌ బాబు తదితరులు పాల్గొన్నారు.
