Monday, December 1, 2025
E-PAPER
Homeఆటలుటీమిండియా ఘనవిజయం

టీమిండియా ఘనవిజయం

- Advertisement -

పోరాడి ఓడిన దక్షిణాఫ్రికా
రాణించిన విరాట్‌, రోహిత్‌, కెఎల్‌ రాహుల్‌
మూడు వన్డేల సిరీస్‌లో 1-0 ఆధిక్యంలో భారత్‌

రాంచీ : విరాట్‌ వీరవిహారం.. రోహిత్‌ మెరుపులు.. కెఎల్‌ రాహుల్‌ అద్భుత ఇన్నింగ్స్‌.. వెరసి తొలి వన్డేలో టీమిండియా అదరగొట్టింది. ఆదివారం దక్షిణాఫ్రికాతో జరిగిన మ్యాచ్‌లో ఘన విజయం సాధించింది. మూడు వన్డేల సిరీస్‌లో భాగంగా రాంచీలో జరుగుతున్న తొలి వన్డేలో తొలుత దక్షిణాఫ్రికా టాస్‌ గెలిచి బౌలింగ్‌ ఎంచుకుంది. దీంతో బ్యాటింగ్‌కు దిగిన టీమిండియా భారీ స్కోరు సాధించింది. టీమిండియా స్టార్‌ క్రికెటర్‌, కింగ్‌ కోహ్లీ (120 బంతుల్లో 135) సూపర్‌ సెంచరీ సాధించాడు. రోహిత్‌ శర్మ, కెప్టెన్‌ కెఎల్‌ రాహుల్‌ అర్ధశతకాలు చేశారు. దీంతో టీమిండియా నిర్ణీత 50 ఓవర్లలో 8 వికెట్లు కోల్పోయి 349 పరుగులు చేసింది. అనంతరం బాటింగ్‌కు దిగిన సౌతాఫ్రికా 49.2 ఓవర్లలో 332 పరుగులు చేసి ఆలౌట్‌ అయింది. తొలుత భారత్‌ ఇన్నింగ్స్‌లో 25 పరుగుల వద్ద జైస్వాల్‌ (18) ఔట్‌ కాగా.. వన్‌ డౌన్‌ లో వచ్చిన విరాట్‌ కోహ్లీ .. ఆది నుంచే దూకుడుగా ఆడాడు. రోహిత్‌, కోహ్లీ ఇద్దరూ నువ్వానేనా అన్నట్లు పరుగులు రాబట్టడంలో పోటీ పడ్డారు. ఈ క్రమంలో 57 పరుగుల వ్యక్తిగత స్కోర్‌ వద్ద రోహిత్‌ శర్మ ఔట్‌ అయ్యాడు. వీరిద్దరూ రెండో వికెట్‌కు 134 పరుగులు జోడించారు. రోహిత్‌ ఔటైన తర్వాత కూడా విరాట్‌ నిలకడగా ఆడి సెంచరీ సాధించాడు.

120 బంతుల్లో 7 సిక్స్‌లు, 11 ఫోర్లుతో 135 పరుగులు చేశాడు. కోహ్లీకి వన్డే కెరీర్‌లో ఇది 52వ సెంచరీ. అలాగే అతడు దాదాపు రెండేళ్ల తర్వాత చేసిన సెంచరీ ఇది. విరాట్‌ ఇంతకు ముందు చివరిసారిగా 15 నవంబర్‌ 2023లో వన్డే వరల్డ్‌కప్‌ టోర్నీలో ఆస్ట్రేలియా మీద 117 పరుగులు చేశాడు. చివర్లో కెఎల్‌ రాహుల్‌ (60) అర్ధశతకం సాధించాడు. రవీంద్ర జడేజా (20 బంతుల్లో 32 పరుగులు) వేగంగా పరుగులు చేశాడు. రుతురాజ్‌ గైక్వాడ్‌ (8), వాషింగ్టన్‌ సుందర్‌ (13), అర్ష్‌దీప్‌ సింగ్‌ (0) విఫలమయ్యారు. ఓపెనర్‌ యశస్వి జైస్వాల్‌ క్రీజులోకి వచ్చీరాగానే ఫోర్‌తో ఖాతా తెరిచాడు. క్రీజులో ఉన్నంత సేపు మంచి రిథమ్‌లోనే కనిపించాడు. కానీ దూకుడుగా ఆడే ప్రయత్నంలో జైస్వాల్‌ (18) నాండ్రే బర్గర్‌ బౌలింగ్‌లో వికెట్‌ కీపర్‌ డికాక్‌కు క్యాచ్‌ ఇచ్చి వెనుదిరిగాడు. రవీంద్ర జడేజా (32) సమయోచిత ఇన్నింగ్స్‌ ఆడాడు. దక్షిణాఫ్రికా బౌలర్లలో ఓట్నీల్‌ బార్ట్‌మన్‌, నాండ్రే బర్గర్‌, మార్కో యాన్సెన్‌, కోర్బిన్‌ బాష్‌ తలో రెండు వికెట్లు తమ ఖాతాలో వేసుకున్నారు.
అనంతరం బ్యాటింగ్‌కు దిగిన సౌతాఫ్రికా దూకుడుగా ఆడే ప్రయత్నం చేసింది.

ఈ క్రమంలో రెండు ఓవర్లకే రెండు వికెట్లు కోల్పోయి కష్టాల్లో పడింది. హర్షిత్‌ రాణా బౌలింగ్‌లో ఓపెనర్‌ రికెల్టన్‌ క్లీన్‌ బౌల్డ్‌ అయ్యాడు. అనంతరం బ్యాటింగ్‌కు వచ్చిన డికాక్‌ కీపర్‌ కెఎల్‌ రాహుల్‌కు క్యాచ్‌ ఇచ్చి వెనుదిరిగాడు. అర్ష్‌దీప్‌ వేసిన ఐదో ఓవర్‌లో మార్క్రమ్‌(7) మూడో వికెట్‌గా ఔటయ్యాడు. అనంతరం కుల్దీప్‌ బౌలింగ్‌లో జార్జ్‌(39) ఎల్‌బిడబ్ల్యూగా ఔటయ్యాడు. అనంతరం హర్షిత్‌ రాణా వేసిన 24 ఓవర్‌లో బ్రెవిస్‌ (37) రుతురాజ్‌కు క్యాచ్‌ ఇచ్చి వెనుదిరిగాడు. ఈ తరుణంలో దూకుడుగా ఆడుతూ అర్ధశతకం పూర్తిచేసుకున్న యాన్సన్‌(70) కుల్దీప్‌ బౌలింగ్‌లో ఔటయ్యాడు. ఈ క్రమంలోనే ఆచితూచి ఆడుతూ పరుగులు వరద పారిస్తున్న మాథ్యూ 72 పరుగుల వద్ద కోహ్లీకి క్యాచ్‌ ఇచ్చి పెవిలియన్‌కు చేరాడు. మాథ్యు, యాన్సన్‌ వంటి కీలక వికెట్లను కుల్దీప్‌ పడగొట్టి సౌతాఫ్రికాను కష్టాల్లోకి నెట్టాడు. సుబ్రయెన్‌ (17)ను కూడా కుల్దీప్‌ 39వ ఓవర్‌లో ఔట్‌ చేశాడు. అనంతరం అర్ష్‌దీప్‌ బౌలింగ్‌లో రాహుల్‌కు క్యాచ్‌ ఇచ్చి బర్గర్‌ (17) కూడా పెవిలియన్‌కు చేరాడు. దూకుడుగా ఆడిన బాష్‌(67) చివరి వికెట్‌గా వెనుదిరిగాడు.

- Advertisement -
RELATED ARTICLES
- Advertisment -

తాజా వార్తలు

- Advertisment -