ఎస్టిఎఫ్ ఐ జాతీయ ప్రధాన కార్యదర్శి చావ రవి
నవతెలంగా – భువనగిరి
2010 పూర్వము నియామకమైన సర్విస్ ఉపాధ్యాయులకు టెట్ నిబంధన నుండి మినహాయింపు ఇవ్వాలని ఎస్టిఎఫ్ఐ జాతీయ ప్రధాన కార్యదర్శి చావరవి విజ్ఞప్తి చేశారు. శనివారం టీఎస్ యుటిఎఫ్ జిల్లా కమిటీ ఆధ్వర్యంలో భువనగిరి ఎంపీ చామల కిరణ్ కుమార్ రెడ్డికి ఆయన నివాసంలో కలిసి వినతి పత్రం అందజేశారు. పార్లమెంటులో చట్ట సవరణ ద్వారా సీనియర్ టీచర్లకు టెట్ నుండి మినహాయింపు ఇవ్వాలన్నారు. వారి ఉద్యోగాలకు రక్షణ కల్పించాలని కోరారు. అవసరమైన సందర్భంలో విద్యాహక్కు చట్టంలోని సెక్షన్ 23న సవరించేలా ప్రాతినిధ్యం చేయాలని పార్లమెంటు సభ్యులు చామల కిరణ్ కుమార్ రెడ్డి ని కోరారు.
భువనగిరి పార్లమెంటు సభ్యులు (లోకసభ) చామల కిరణ్ కుమార్ రెడ్డి మాట్లాడుతూ.. పాతిక, ముప్పై సంవత్సరాల సర్వీసు చేశాక ఇప్పుడు అర్హత పరీక్ష వ్రాయాలనటం అర్థరహితమన్నారు. కేంద్ర ప్రభుత్వంతో చర్చించి మినహాయింపు కోసం తనవంతు కృషి చేస్తానని హామీ ఇచ్చారు. ఈ కార్యక్రమంలో టీఎస్ యుటిఎఫ్ రాష్ట్ర ప్రధాన కార్యదర్శి ఆదిమూలం వెంకట్, యాదాద్రి భువనగిరి జిల్లా అధ్యక్షులు ముక్కెర్ల యాదయ్య, డిటిఎఫ్ జిల్లా అధ్యక్ష,ప్రధాన కార్యదర్శులు ఎన్ లక్ష్మీనరసింహారెడ్డి, మైలారం సత్తయ్య, జిల్లా కార్యదర్శి కే రాజగోపాల్, ఎస్ సుధర్మారెడ్డి, కంచి రవికుమార్ పాల్గొన్నారు.
