చారకొండ మండలంలో డిసెంబర్ 17న పంచాయతీ ఎన్నిక
సర్పంచ్‌గా పోటీ చేసేందుకు పలువురు ఆసక్తి
పంచాయతీ బరిలో యువత
నవతెలంగాణ – చారకొండ
స్థానిక’ సంస్థల ఎన్నికల సందడి మొదలైంది. ఎన్నికలు నిర్వహించేందుకు రాష్ట్ర ఎన్నికల సంఘం సమాయత్తమైంది. చారకొండ మండలంలో మూడవ విడత డిసెంబర్ 17న 17 పంచాయితీలు,142 వార్డులకు ఎన్నికలు జరగనున్నాయి.దీంతో ఆశావహుల్లో సరికొత్త ఉత్సాహం నెలకొన్నది. ‘పంచాయతీ’ బరిలోకి దిగేందుకు యువత ఆసక్తి చూపుతున్నది. పోటీ కోసం యువ నాయకత్వం రంగం సిద్ధం చేసుకుంటున్నది. ఒకవైపు, ప్రజల్లో ఉంటూ, వారి సమస్యల పరిష్కారానికి యువ నాయకులు చొరవ చూపుతున్నారు. మరోవైపు గ్రామలలోని ముఖ్య నాయకులు పంచాయతీ ఎన్నికల్లో సర్పంచ్ గా బరిలో దిగేందుకు యత్నిస్తున్నారు. చారకొండ మండలంలో రిజర్వేషన్లు అనుకూలించిన వారు సర్పంచ్ స్థానాన్ని కైవసం చేసుకునేందుకు ఆశావహులు ఏర్పాట్లు చేసుకుంటున్నారు.
స్థానికంగా ఉన్న వ్యక్తే సర్పంచ్
గ్రామాలు అభివృద్ధి చెందాలంటే గ్రామ సర్పంచ్ కీలకం. అలాంటి సర్పంచ్ నిత్యం ప్రజలకు,పాలన అందుబాటులో ఉండాలి. అలాంటి సర్పంచ్ స్థానికేతరులు కాకుండా స్థానికంగా ఉన్న వ్యక్తిని పంచాయతీ ఎన్నికల్లో సర్పంచ్ గా ఎన్నుకోవాలని ప్రజలు,యువత మొగ్గు చూపుతున్నారు.
ప్రజల దృష్టిని ఆకర్షించేందుకు ప్రయత్నం..
ఓటర్లను ఆకర్షించేందుకు రాజకీయ నాయకులు, ఆశవాహులు నిత్యం జనంలో ఉంటూ ప్రజా సమస్యల పరిష్కారంపై దృష్టి సారించారు. ప్రజల్లో గుర్తింపు పొందేందుకు శతవిధాలుగా ప్రయత్నిస్తున్నారు. మరోవైపు, పల్లెల్లోని సీనియర్‌ నాయకులు, మాజీ సర్పంచులు, ఓటర్లను ప్రభావితం చేసే నేతలను కలుస్తున్నారు. సర్పంచ్ ఎన్నికల్లో బరిలో ఉండాలనుకునే నాయకులు ప్రజల మద్దతు కోసం ప్రయత్నాలు ముమ్మరం చేశారు
యువత ఉత్సాహం..
రాజకీయాలంటే పెద్దగా ఆసక్తి చూపని యువత ధోరణిలో ప్రస్తుతం మార్పు కనిపిస్తున్నది. రాజకీయాల్లోకి రావడానికి మక్కువ చూపుతున్నది. అందుకు పంచాయతీ ఎన్నికలను అవకాశంగా మలుచుకోవాలని ఎంతో మంది యువకులు భావిస్తున్నారు.పోటీకి ఆసక్తి చూపుతున్న యువకులు ఇప్పటికే కదనరంగంలోకి దూకేశారు. అటు రాజకీయ హోదాను అనుభవించేందుకు, అదే సమయంలో ఇటు ప్రజా సేవ చేయొచ్చన్న ఆలోచనతో చాలా మంది యువ నేతలు పంచాయతీ ఎన్నికలకు సన్నద్ధమవుతున్నారు. ఊరిలో అధికారం చెలాయించవచ్చనే భావనతో ఎంతో మంది సర్పంచ్ పీఠంపై కన్నేశారు. దీంతో స్థానిక సంస్థల ఎన్నికల్లో యువకులదే హవా స్పష్టంగా కనిపించే అవకాశముంది.
చారగొండ గ్రామం పట్ల పూర్తి అవగాహన ఉండి, అందరికీ అందుబాటులో ఉన్న వ్యక్తి, ముఖ్యంగా స్థానికంగా ఊరిలో ఉన్న వ్యక్తినే సర్పంచ్ ఎన్నుకోవాలి. మన గ్రామంలోని ప్రజా సమస్యల పైన, అవినీతి అక్రమాల పైన కొట్లాడుతూ, మన గ్రామ అభివృద్ధి లక్ష్యంగా పని చేసే వారినే సర్పంచ్ గా ఎన్నుకుందాం.. కన్నా మోగిళ్ళ , చారకొండ.
