అఖిల్‌ రాజ్‌, తేజస్విని జంటగా నటించిన సినిమా ‘రాజు వెడ్స్‌ రాంబాయి’. ఈటీవీ విన్‌ ఒరిజినల్స్‌ ప్రొడక్షన్‌ ప్రేక్షకుల ముందుకు తీసుకొస్తోంది. డా.నాగేశ్వరరావు పూజారి సమర్పణలో డోలాముఖి సుబల్టర్న్‌ ఫిలింస్‌, మాన్‌ సూన్స్‌ టేల్స్‌ బ్యానర్స్‌ పై వేణు ఊడుగుల, రాహుల్‌ మోపిదేవి నిర్మించారు. సాయిలు కంపాటి దర్శకత్వం వహించారు. ఈనెల 21న ఈ సినిమాను వంశీ నందిపాటి ఎంటర్‌టైన్‌ మెంట్స్‌, బన్నీ వాస్‌ వర్క్స్‌ బ్యానర్స్‌ పై వంశీ నందిపాటి, బన్నీ వాస్‌ గ్రాండ్‌ థియేట్రికల్‌ రిలీజ్‌కు తీసుకొస్తున్నారు. ఈనేపథ్యంలో బుధవారం ప్రొడ్యూసర్‌ సాయి కృష్ణ మీడియాతో సినిమా విశేషాలను షేర్‌ చేసుకున్నారు.
ఓటీటీ అంటే పెద్దలు మాత్రమే చూడగలిగే కంటెంట్‌ ఉంటుందనే అభిప్రాయం ఉంది. మేము ఆ ట్రెండ్‌ను బ్రేక్‌ చేస్తూ ఈటీవీ విన్‌లో సకుటుంబంగా చూసే సినిమాలను, సిరీస్‌లను అందిస్తున్నాం. ఆ క్రమంలోనే ’90’ఎస్‌ ఎ మిడిల్‌ క్లాస్‌ బయోపిక్‌, ఎయిర్‌, అనగనగ, లిటిల్‌ హార్ట్స్‌’ వంటి మూవీస్‌ చేశాం. అప్పట్లో ఉషాకిరణ్‌ మూవీస్‌ సకుటుంబంగా చూసే సినిమాలు నిర్మించేది. ఆ బ్యానర్‌కు మోడరన్‌ ఎక్స్టెన్షన్‌లా ఈటీవీ విన్‌ను తీర్చిదిద్దుతున్నాం. మన దేశంలో మిడిల్‌ క్లాస్‌ ప్రజలు ఎక్కువ. వారికి కనెక్ట్‌ అయ్యేలా మన చుట్టూ జరుగుతున్న స్టోరీస్‌నే నిర్మిస్తున్నాం. ఈ సినిమా స్క్రిప్ట్‌ విన్నప్పుడు కూడా ఇది మన నేటివ్‌ కథ అనిపించింది.
మేము ఒరిజినల్‌ క్లైమాక్స్‌ ఉంటేనే బాగుంటుందని తీసుకున్నాం. దర్శకుడు సాయిలు సినిమాను రూపొందించిన విధానం చూస్తే, ఈ మూవీలో ఇలాంటి దుర్ఘటనను తెరకెక్కించారా అని అనిపించదు. కొన్ని డైలాగ్స్‌ మరీ ఆ ఊరు, ఆ చుట్టుపక్కల వాళ్లకే అర్థమయ్యేలా ఉన్నాయనే భావనతో అందరికీ అర్థమయ్యే మాటల్ని పెట్టించాం. దర్శకుడు సాయిలులో ఉన్న నిజాయితీ, ఇన్నోసెన్స్‌, ఫ్యూరిటీ వల్లే ఈ సినిమా ఇంత బాగా వచ్చింది. సినిమా చూస్తున్నంతసేపు మనం ఒక ఊరిలో కూర్చుని చూస్తున్నట్లు ఉంటుంది. దర్శకుడిగా అతనికి పూర్తి క్రియేటివ్‌ ఫ్రీడమ్‌ ఇచ్చాం. ఈ సినిమాకు అనుకున్నదాని కంటే కొంత ఎక్కువ బడ్జెట్‌ అయ్యింది. ఎక్కువ భాగం ఊరిలోనే చేయడంతోపాటు దాదాపు అంతా కొత్తవాళ్లే మా సినిమాకి వర్క్‌ చేశారు.
రాజు పాత్రలో అఖిల్‌ పర్పెక్ట్‌గా నటించాడు. అతనొక మంచి యంగ్‌ హీరోగా పేరు తెచ్చుకుంటాడనే నమ్మకం ఉంది. తేజస్వినీ రాంబాయి క్యారెక్టర్‌కు పూర్తి న్యాయం చేసింది. రాంబాయి తండ్రి వెంకన్న పాత్రలో చైతన్య జొన్నలగడ్డ ఆకట్టుకునేలా నటించాడు. వంశీ నందిపాటి, బన్నీవాస్‌తో మా అసోసియేషన్‌ సక్సెస్‌ఫుల్‌గా సాగుతోంది. ‘లిటిల్‌ హార్ట్స్‌’ సక్సెస్‌ తర్వాత మా కాంబినేషన్‌కు ఈ సినిమా మరో హిట్‌ ఇస్తుందని ఆశిస్తున్నాం. దర్శకుడు వేణు ఊడుగులతో ఈ ప్రాజెక్ట్‌ గురించి డిస్కస్‌ చేసినప్పుడు, ఎలాంటి డిలే లేకుండా త్వరగా ఓకే అయ్యింది. ఈటీవీ విన్‌ ద్వారా డిసెంబర్‌లో ‘కనకమహాలక్ష్మి 2’ వెబ్‌ సిరీస్‌ వస్తోంది. అలాగే తిరువీర్‌ సినిమా ఒకటి స్ట్రీమింగ్‌ చేయబోతున్నాం.
వరంగల్‌, ఖమ్మం జిల్లా మధ్య ఉండే ఓ ఊరిలో జరిగిన ఘటన నేపథ్యంగా ఈ సినిమా ఉంటుంది. ఈ ఘటన గురించి నేను కూడా విన్నాను. దర్శకుడు సాయిలు స్క్రిప్ట్‌ చెప్పాక డెమో షూట్‌ చేయమన్నాం. ఆయన చేసిన కొన్ని సీన్స్‌ చూసి మూవీ బాగా చేయగలడు అనే నమ్మకం కలిగింది. ఏడాదిన్నర కిందట ఈ చిత్రాన్ని ప్రారంభించాం. వాతావరణ పరిస్థితుల వల్ల కొంత షూటింగ్‌ ఆలస్యమైంది. అలాగే ఆ ఊరి ప్రజలు షూటింగ్‌కు నిరాకరించారు. మళ్లీ వాళ్లను ఒప్పించి చిత్రీకరణ చేశాం.
