పోలింగ్ కేంద్రాలను తనిఖీ చెసిన ఎఫ్ఎస్ టి బృందం 

నవతెలంగాణ -పరకాల 
గ్రామ పంచాయతీ ఎన్నికలకు సంబంధించి పరకాల మండలంలోని పోలింగ్ కేంద్రాలలో కనీస సౌకర్యాల ఏర్పాట్లను ఫ్లయింగ్ స్క్వాడ్ టీమ్ (ఎఫ్ఎస్ టి) బృందం శుక్రవారం క్షుణ్ణంగా పరిశీలించింది. ఎన్నికల సంఘం మార్గదర్శకాలకు అనుగుణంగా ఏర్పాట్లు ఉన్నాయా లేవా అని నిర్ధారించుకోవడానికి ఈ బృందం వివిధ గ్రామాల్లోని పోలింగ్ బూత్‌లను సందర్శించింది.ముఖ్యంగా నాగారం,పైడిపల్లి,మలకపేట,వెంకటాపురం,లక్ష్మీపురం పోలింగ్ కేంద్రాలను శనివారం పరిశీలించారు.
సౌకర్యాలపై అధికారుల ఆదేశాలు
ఎఫ్ఎస్‌టీ బృందం పర్యటన సందర్భంగా, ముఖ్యంగా ఓటర్లకు అవసరమైన కనీస సౌకర్యాలపై అధికారులు ప్రత్యేక దృష్టి సారించారు. పోలింగ్ కేంద్రాలలో విద్యుత్ సరఫరా, తాగునీటి సౌకర్యం, మరుగుదొడ్లు  సక్రమంగా ఉండాలని ఆదేశించారు. అంతేకాక, దివ్యాంగులైన ఓటర్ల సౌలభ్యం కోసం ప్రతి కేంద్రంలో వీల్ చైర్ తప్పనిసరిగా అందుబాటులో ఉంచాలని స్పష్టం చేశారు.
ప్రచార సామగ్రి తొలగింపుపై సూచనలు
ఈ సందర్భంగా, ఎఫ్‌ఎస్‌టీ అధికారి నాగరాజు ఆయా పంచాయతీ కార్యదర్శులతో మాట్లాడారు. పోలింగ్ కేంద్రాల పరిసరాల్లో వాల్ రైటింగ్ (గోడ రాతలు), ఎన్నికల ప్రచారానికి సంబంధించిన ఫ్లెక్సీలు ఎట్టి పరిస్థితుల్లోనూ ఉండకూడదని, వాటిని తక్షణమే తొలగించాలని ఆదేశించారు. ఎన్నికల ప్రవర్తనా నియమావళిని కచ్చితంగా పాటించాలని కార్యదర్శులకు సూచించారు.ఈ తనిఖీల్లో ఎఫ్‌ఎస్‌టీ అధికారి నాగరాజు, పోలీస్ అధికారి నాగరాజు, కెమెరామెన్ భాస్కర్ పాల్గొన్నారు. ఎన్నికలు సజావుగా, ప్రశాంతంగా జరిగేందుకు అన్ని ఏర్పాట్లు చేస్తున్నట్లు అధికారులు తెలిపారు