డిజిటల్‌ పైరసీపై పోరాటం

హైదరాబాద్‌ను చలనచిత్ర కార్యకలాపాలకు ప్రపంచ కేంద్రంగా మార్చాలనే తెలంగాణ ముఖ్యమంత్రి అనుముల రేవంత్‌ రెడ్డి సంకల్పం అందరికీ తెలిసిందే. జపాన్‌కి చెందిన కంటెంట్‌ ఓవర్సీస్‌ డిస్ట్రిబ్యూషన్‌ అసోసియేషన్‌ (కోడా) నుండి జపాన్‌ ఫిల్మ్‌, యానిమేషన్‌ పరిశ్రమ ప్రతినిధి బృందం తెలంగాణ ఉప ముఖ్యమంత్రి మల్లు భట్టి విక్రమార్కని శనివారం కలిసింది. డిజిటల్‌ పైరసీని ఎదుర్కోవడానికి చిత్ర పరిశ్రమకు పూర్తి మద్దతును అందిస్తామని భట్టి విక్రమార్క హామీ ఇచ్చారు. ఈ నేపథ్యంలో తెలుగు ఫిల్మ్‌ ఛాంబర్‌ ఆఫ్‌ కామర్స్‌తో ఈ బృందం ఒక అవగాహన ఒప్పందంపై సంతకం చేసింది. కంటెంట్‌ ఓవర్సీస్‌ డిస్ట్రిబ్యూషన్‌ అసోసియేషన్‌ ప్రతినిధి డైరెక్టర్‌ టకేరో గోటో, అంతర్జాతీయ వ్యవహారాల డిప్యూటీ సీనియర్‌ డైరెక్టర్‌ తత్సుయ ఓట్సుకా తెలుగు ఫిల్మ్‌ ఛాంబర్‌ ఆఫ్‌ కామర్స్‌ను సందర్శించి ఈ ఎంఓయు పై సంతకం చేశారు. డిజిటల్‌ పైరసీకి వ్యతిరేకంగా బెస్ట్‌ ప్రాక్టీసెస్‌, వ్యూహాలు, ఉమ్మడి ప్రచారాలపై నాలెడ్జ్‌ని పంచుకోవడానికి ఈ ఒప్పందం రూపొందించబడింది.
ఆ తర్వాత ఈ బందం ఫిల్మ్‌ ఛాంబర్‌లో ఉన్న యాంటీ వీడియో పైరసీ సెల్‌ ఉపయోగించే పద్ధతులు, సాఫ్ట్‌వేర్‌ సాధనాలను పరిశీలించింది.

పైరసీని ఎదుర్కోవడంలో తెలుగు ఫిల్మ్‌ ఇండిస్టీ అనుసరిస్తున్న విధానాన్ని ప్రశంసించింది. ఇటీవలి కాలంలో డిజిటల్‌ పైరసీ ఒక అంతర్జాతీయ క్రైమ్‌గా మారింది. చట్టవిరుద్ధమైన బెట్టింగ్‌, ఐడెంటిటీ థెఫ్ట్‌, ఆన్‌లైన్‌ మోసం, మాల్వేర్‌ వ్యాప్తి, చాలా వైవిధ్యమైన స్వభావం గల సైబర్‌ నేరాలు డిజిటల్‌ పైరసీతో ముడిపడి ఉన్నాయి. ఈ పరిస్థితిని సమర్థవంతంగా ఎదుర్కోవడానికి ప్రపంచవ్యాప్తంగా పరిశ్రమలు, సంస్థలు, ప్రభుత్వాలు ద్వైపాక్షిక, బహుళ-పాక్షిక ఒప్పందాలు చేసుకోవాల్సిన అవసరం ఎంతైనా ఉంది. కోడాతో చేసుకున్న ఒప్పందంతో జపనీస్‌ ఫిల్మ్‌, యానివమేషన్‌ పరిశ్రమతో ఈ రకమైన అధికారిక సహకారాన్ని కలిగి ఉన్న భారతదేశంలో మొట్టమొదటి చిత్ర పరిశ్రమగా తెలుగు చిత్ర పరిశ్రమ నిలవడం విశేషం. ఈ కార్యక్రమంలో టీఎఫ్‌సీసీ సెక్రటరీ కె.ఎల్‌.దామోదర్‌ ప్రసాద్‌, రామానాయుడు స్టూడియోస్‌ మేనేజింగ్‌ డైరెక్టర్‌ సురేష్‌ బాబు దగ్గుబాటి, అన్నపూర్ణ స్టూడియోస్‌ ఎగ్జిక్యూటివ్‌ డైరెక్టర్‌ సుప్రియ యార్లగడ్డ, యాంటీ వీడియో పైరసీ సెల్‌ టీఎఫ్‌సీసీ చైర్మన్‌ రాజ్‌కుమార్‌ ఆకెళ్ల, ఏవీపీసీ ఆపరేషన్స్‌ హెడ్‌ వై.మనీంద్ర పాల్గొన్నారు.