పోలీసుల వేధింపుల వల్లే రాజేశ్‌ మృతి

సిట్టింగ్‌ జడ్జితో సమగ్ర విచారణ జరపాలి : కేవీపీఎస్‌ రాష్ట్ర ప్రధాన కార్యదర్శి టి.స్కైలాబ్‌ బాబు

నవతెలంగాణ-కోదాడ టౌన్‌
కోదాడ, చిలుకూరు పోలీసుల వేధింపుల వల్లే దళిత యువకుడు కర్ల రాజేష్‌ మృతిచెందాడని, ఈ కేసుపై సిట్టింగ్‌ జడ్జితో సమగ్ర విచారణ జరిపించాలని కేవీపీఎస్‌ రాష్ట్ర ప్రధాన కార్యదర్శి టి.స్కైలాబ్‌ బాబు డిమాండ్‌ చేశారు. సూర్యాపేట జిల్లా కోదాడ గాంధీ నగర్‌లోని కర్ల రాజేష్‌ తల్లి, తమ్ముడిని శనివారం కేవీపీఎస్‌ జిల్లా నాయకులతో కలిసి ఆయన పరామర్శించారు. రాజేష్‌ మృతికి సంబంధించిన వివరాలు అడిగి తెలుసుకున్నారు. రాజేష్‌ చిత్రపటానికి పూలమాల వేసి నివాళులర్పించారు. ఈ సందర్భంగా స్కైలాబ్‌బాబు మాట్లాడుతూ.. సీఎం రిలీఫ్‌ ఫండ్‌లో అక్రమాలు జరిగాయనే పేరుతో రాజేష్‌పై కేసు నమోదు చేయకుండా నాలుగు రోజులు విచారణ పేరుతో చిలుకూరు, కోదాడ పోలీసులు వేధింపులకు గురి చేశారని తెలిపారు. రిమాండ్‌ చేయకముందే అనారోగ్యంతో బాధపడుతున్న రాజేష్‌కు సకాలంలో మెరుగైన చికిత్స అందించకపోవడంతో మృతిచెందాడని అన్నారు.

కేసు నమోదై.. పోలీసుల విచారణను ఎదుర్కొన్న రాజేష్‌ను జైల్లో నుంచి ఆస్పత్రికి తరలించాక మృతిచెందితే.. కనీసం ప్రభుత్వ అధికారులు ఆ కుటుంబాన్ని పరామర్శించకపోవడం దుర్మార్గమన్నారు. జిల్లా కలెక్టర్‌, ఎస్పీ బాధిత కుటుంబాన్ని పరామర్శించాలని, కుటుంబానికి ప్రభుత్వం నుంచి కోదాడ రూరల్‌లో ఐదెకరాల భూమి ఇవ్వాలని, ఇందిరమ్మ ఇల్లు మంజూరు చేయాలని డిమాండ్‌ చేశారు. రాజేష్‌ తల్లి లలితకు ప్రభుత్వ ఉద్యోగం, కుటుంబానికి రూ.25లక్షల ఎక్స్‌గ్రేషియా ఇవ్వాలని కోరారు. పోలీసులపై ఎస్సీ, ఎస్టీ అట్రాసిటీ చట్టంతో పాటు హత్యానేరం కింద కేసులు నమోదు చేసి అరెస్టు చేయాలని డిమాండ్‌ చేశారు. ఈ పర్యటనలో ఆయన వెంట కేవీపీఎస్‌ జిల్లా ప్రధాన కార్యదర్శి కోట గోపి, ఉపాధ్యక్షులు పిండిగ నాగమణి, నాయకులు జంగపల్లి శ్రీను,సాయికుమార్‌, బాను, గణేష్‌, పాటల గోపి ఉన్నారు.