నవతెలంగాణ-హైదరాబాద్ : భారతదేశపు ప్రముఖ ఆర్థిక సేవల సంస్థ అయిన ఛాయిస్ ఇంటర్నేషనల్ లిమిటెడ్, దక్షిణ కొరియాకు చెందిన ప్రసిద్ధ ఆర్థిక సంస్థ ఎన్.హెచ్ ఇన్వెస్ట్మెంట్ & సెక్యూరిటీస్ (ఎన్హెచ్ఐఎస్) తో ఒక కీలక వ్యూహాత్మక భాగస్వామ్యాన్ని కుదుర్చుకున్నట్లు నేడు ప్రకటించింది. ఇందులో భాగంగా ఛాయిస్ గ్రూప్నకు చెందిన బ్రోకింగ్ మరియు వెల్త్ మేనేజ్మెంట్ విభాగమైన ‘ఛాయిస్ ఈక్విటీ బ్రోకింగ్ ప్రైవేట్ లిమిటెడ్’ (సిఇబిపిఎల్) లో ఎన్.హెచ్ ఫైనాన్షియల్ గ్రూప్ అనుబంధ సంస్థ అయిన ఎన్హెచ్ఐఎస్ రూ. 9,000 మిలియన్ల భారీ పెట్టుబడిని పెట్టనుంది.
ఈ వ్యూహాత్మక పెట్టుబడి ఛాయిస్ సంస్థ వృద్ధి ప్రయాణంలో ఒక ముఖ్యమైన మైలురాయిగా నిలవడమే కాకుండా, భారతదేశంలో నెక్స్ట్-జనరేషన్ ఆర్థిక సేవల ప్లాట్ఫామ్ను నిర్మించాలన్న ఛాయిస్ దార్శనికతపై దక్షిణ కొరియా అగ్రగామి ఆర్థిక సంస్థకు ఉన్న నమ్మకాన్ని ప్రతిబింబిస్తుంది.
భారతదేశ మూలధన మార్కెట్లలో రిటైల్ పెట్టుబడిదారుల భాగస్వామ్యం, డిజిటల్ వినియోగం మరియు పెట్టుబడిదారుల్లో అవగాహన వేగంగా పెరుగుతున్న నేపథ్యంలో ఈ భాగస్వామ్యం ప్రాధాన్యత సంతరించుకుంది. కంపల్సరీ కన్వర్టిబుల్ ప్రిఫరెన్స్ షేర్స్ (సిసిపిఎస్) రూపంలో ఎన్హెచ్ఐఎస్ ఈ నిధులను సమకూర్చనుంది. ఈ పెట్టుబడిని ఎమ్టీఎఫ్ (ఎంటిఎఫ్) బుక్ వృద్ధితో పాటు సాంకేతికత, కస్టమర్ల సాధన, నైపుణ్యాభివృద్ధి, నూతన ఉత్పత్తుల ఆవిష్కరణలు మరియు వ్యాపార విస్తరణ కోసం వృద్ధి మూలధనంగా ఛాయిస్ వినియోగించనుంది.
ఈ భాగస్వామ్యం ద్వారా భారతీయ మార్కెట్లో ఛాయిస్ సంస్థకున్న బలమైన పట్టుకు, ఆసియాలోనే అత్యంత అధునాతన మార్కెట్లలో ఒకటైన ఎన్హెచ్ఐఎస్ యొక్క అంతర్జాతీయ స్థాయి నైపుణ్యం, సాంకేతిక ఆపరేటింగ్ మోడల్ తోడవనున్నాయి. సంస్థాగత బ్రోకింగ్, రీసెర్చ్, క్యాపిటల్ మార్కెట్స్, రిస్క్ మేనేజ్మెంట్, కంప్లయన్స్ వంటి విభాగాల్లో ఇరు సంస్థల మధ్య విజ్ఞాన మార్పిడికి ఇది వీలు కల్పిస్తుంది. ఈ వ్యూహాత్మక మద్దతుతో రాబోయే మూడేళ్లలో తమ బ్రోకింగ్, డిస్ట్రిబ్యూషన్ వ్యాపారాల్లో 5 రెట్ల వృద్ధిని సాధించాలని సిఇబిపిఎల్ లక్ష్యంగా నిర్దేశించుకుంది.
ఈ పరిణామంపై ఛాయిస్ ఇంటర్నేషనల్ లిమిటెడ్ సీఈఓ మరియు ఎగ్జిక్యూటివ్ డైరెక్టర్ శ్రీ అరుణ్ పొద్దార్ మాట్లాడుతూ, ఈ పెట్టుబడి తమ వృద్ధి ప్రయాణంలో ఒక ముఖ్యమైన మైలురాయి అని, తమ వ్యాపార నమూనా, భవిష్యత్ సామర్థ్యంపై అగ్రగామి ప్రపంచవ్యాప్త ఆర్థిక సంస్థకు ఉన్న నమ్మకానికి ఇది ప్రతీక అని అన్నారు. భారతదేశ ఆర్థిక రంగం ఒక కీలక మలుపులో ఉందని, పెరుగుతున్న పెట్టుబడిదారుల అవసరాలను తీర్చడానికి ఈ భాగస్వామ్యం సహాయపడుతుందని ఆయన పేర్కొన్నారు. వికసిత్ భారత్ 2047 లక్ష్యాల దిశగా దేశం పయనిస్తున్న తరుణంలో, నూతన ఆవిష్కరణలను ప్రోత్సహించడానికి, కస్టమర్ల అనుభవాన్ని మెరుగుపరచడానికి మరియు నాణ్యమైన ఆర్థిక సేవలను అందరికీ చేరువ చేస్తూ భారతదేశ ఆర్థిక సమ్మిళిత అజెండాకు ఈ భాగస్వామ్యం ఎంతగానో తోడ్పడుతుందని వివరించారు.
ఎన్.హెచ్ ఇన్వెస్ట్మెంట్ & సెక్యూరిటీస్ ప్రెసిడెంట్ మరియు సీఈఓ శ్రీ షిన్ జే వూక్ ఈ భాగస్వామ్యం గురించి స్పందిస్తూ, తమ గ్లోబల్ బిజినెస్ పోర్ట్ఫోలియోను మరింత బలోపేతం చేయడంలో ఈ వ్యూహాత్మక పెట్టుబడి ఒక కీలక అడుగు అని పేర్కొన్నారు. ఛాయిస్ గ్రూప్తో భాగస్వామ్యం ద్వారా, ఇరు సంస్థల బలాలను ఏకం చేసి వినియోగదారులకు విభిన్నమైన ఆర్థిక సేవలను అందిస్తామని, అలాగే తమ గ్లోబల్ వ్యాపారానికి సుస్థిరమైన దీర్ఘకాలిక వృద్ధి వనరులను నిర్మిస్తామని ఆయన స్పష్టం చేశారు.
