మహిళల సంక్షేమం,విద్య,వైద్యానికి మొండి చెయ్యి

బడ్జెట్‌ప్రతిపాదనపై ఐద్వా ఆగ్రహం
నవతెలంగాణ బ్యూరో-హైదరాబాద్‌
2026-27 బడ్జెట్‌ ప్రతిపాదనలో మహిళలు, విద్యా, వైద్యం పట్ల మొండి చేయి చూపాయని ఐద్వా రాష్ట్ర కమిటి విమర్శించింది. ఈ మేరకు ఆ సంఘం రాష్ట్ర అధ్యక్ష, ప్రధాన కార్యదర్శులు ఆర్‌ అరుణజ్యోతి, మల్లు లక్ష్మి శనివారం ఒక ప్రకటన విడుదల చేశారు. ఎన్నికలకు ముందు మహిళల అభివృద్ధే తమ ధ్యేయమంటూ నమ్మబలికారని గుర్తు చేశారు. మహాలక్ష్మి పథకం, ఉచిత సేవలంటూ గొప్పలు చెప్పిన ప్రభుత్వం, బడ్జెట్‌లో మహిళల సంక్షేమాన్ని విస్మరించిందని విమర్శించారు. విద్యకు కేవలం 8.22 శాతం కేటాయించటం విడ్డూరంగా ఉందని ఆందోళన వ్యక్తం చేశారు. ఆరోగ్య రంగానికి మొత్తం బడ్జెట్‌లో 5 శాతానికి తక్కువగా ఉండటం గమనార్హమని పేర్కొన్నారు.

మహిళల ఆర్థిక భద్రతకు అడ్డుగోడగా ప్రచారం చేసిన మహాలక్ష్మి పథకం విషయంలో ప్రభుత్వం పూర్తిగా విఫలమైందని తెలిపారు. రూ. 6,040. కోట్లు అవసరమయ్యే ఈ పథకానికి కేవలం రూ.4,305 కోట్లు కేటాయించారని పేర్కొన్నారు. ఇది మహిళలను మోసం చేయటం తప్ప మరొకటి కాదని పేర్కొన్నారు. సన్నబియ్యం పథకానికి రూ. మూడు వేల కోట్లు కేటాయించగా వాటిలో వడ్డిలకే రూ రెండు వేల కోట్లు పోతాయనీ, రూ.వెయ్యి కోట్లతో సన్నబియ్యం ఎలా అందరికీ అందిస్తారని ప్రశ్నించారు. మహిళా శిశు సంక్షేమ శాఖకు కేటాయించిన నిధులు ఏ మాత్రం సరిపోవని తెలిపారు.ఈ ప్రతిపాదనలు క్షేత్రస్థాయిలో సమస్యలను పరిష్కరించలేవని పేర్కొన్నారు.

ఎన్నికల మేనిఫెస్టోలో మహిళా సంఘాలకు రూ.10 లక్షల వరకు వడ్డీ లేని రుణాలు ఇస్తామని హామీ ఇచ్చి, ఇప్పుడు కేవలం రూ.5 లక్షల లోపు రుణాలకే పరిమితం చేయడమేంటని ప్రశ్నించారు. మహాలక్ష్మి పథకం కింద రూ.2,500 సాయం ఏమైందని నిలదీశారు. ఆశా, అంగన్‌వాడీ కార్యకర్తల వేతనాల పెంపు, ఇతర ప్రయోజనాలపై బడ్జెట్‌లో ఎటువంటి సానుకూల ప్రకటన లేదని తెలిపారు. రాష్ట్రంలో మహిళల పరిస్థితి ఇప్పటికే ఆందోళనకరంగా ఉందనీ, ఎన్‌సీఆర్‌బీ గణాంకాల ప్రకారం ప్రతి ఏడాది వేల సంఖ్యలో మహిళలపై నేరాలు నమోదవుతున్నాయని తెలిపారు. పీఎల్‌ఎఫ్‌ఎస్‌ గణాంకాల ప్రకారం మహిళల శ్రమలో పాల్గొనడం 20-25 శాతం మధ్యే ఉండటం వారి ఆర్థిక స్థితిని స్పష్టం చేస్తోందని పేర్కొన్నారు. ఎన్‌ఎఫ్‌హెచ్‌ఎస్‌-5 ప్రకారం గర్భిణీ స్త్రీలలో 50 శాతం పైగా రక్తహీనతతో బాధపడుతున్నారని తెలిపారు. ఈ పరిస్థితుల్లో మహిళల కోసం ప్రత్యేక కేటాయింపులు పెంచాలని అందుకు తగిన విధంగా బడ్జెట్‌ను సవరించాలని డిమాండ్‌ చేశారు.