– ఎస్ఎఫ్ఐ రాష్ట్ర నాయకుడు ముందస్తు అరెస్ట్
నవతెలంగాణ-కామారెడ్డి : విద్యా రంగ సమస్యలను తక్షణమే పరిష్కరించాలని కోరుతూ ఎస్ఎఫ్ఐ ఆధ్వర్యంలో నిర్వహించనున్న “చలో అసెంబ్లీ” కార్యక్రమానికి ముందు పోలీసులు చర్యలు చేపట్టారు. ఈ సందర్భంగా కామారెడ్డి జిల్లా ఎస్ఎఫ్ఐ రాష్ట్ర నాయకుడు ముదాం అరుణ్ను పోలీసులు ముందస్తుగా అరెస్ట్ చేశారు.
చలో అసెంబ్లీ పిలుపులో భాగంగా రాష్ట్రవ్యాప్తంగా విద్యార్థి సంఘాలు పెద్ద ఎత్తున పాల్గొననున్న నేపథ్యంలో శాంతి భద్రతల పరిరక్షణ దృష్ట్యా పోలీసులు ఈ చర్యలు తీసుకున్నట్లు తెలిపారు. అరెస్ట్ సందర్భంగా ఎస్ఎఫ్ఐ నాయకులు, కార్యకర్తలు నిరసన వ్యక్తం చేశారు. ఈ సందర్భంగా ఎస్ఎఫ్ఐ నాయకులు మాట్లాడుతూ, విద్యా రంగంలో ఉన్న సమస్యలను ప్రభుత్వం నిర్లక్ష్యం చేస్తోందని ఆరోపించారు. విద్యార్థుల సమస్యలు పరిష్కరించేందుకు చలో అసెంబ్లీ కార్యక్రమాన్ని నిర్వహిస్తున్నామని తెలిపారు. నాయకుల అరెస్టులు ప్రజాస్వామ్య హక్కుల ఉల్లంఘన అని విమర్శించారు.
ముందస్తు హౌజ్ అరెస్టులు..
– గిరిజన వ్యతిరేక బడ్జెట్పై అసెంబ్లీ ముట్టడి పిలుపు
కామారెడ్డి లంబాడి హక్కుల పోరాట సమితి పిలుపు మేరకు మార్చి 25న అసెంబ్లీ ముట్టడికి సిద్ధమవుతుండగా పలువురు నాయకులను పోలీసులు ముందస్తుగా హౌజ్ అరెస్టు చేశారు. తెలంగాణ బడ్జెట్ గిరిజనులకు అన్యాయం చేసిందని సమితి ఆరోపించింది. 2026 –27 బడ్జెట్లో గిరిజన సంక్షేమానికి కేవలం రూ.7,937 కోట్లు మాత్రమే కేటాయించారని విమర్శించారు. చేవెళ్ల డిక్లరేషన్ హామీల అమలుకు రూ.25,000 కోట్లు అవసరమని పేర్కొన్నారు. గతంలో రూ.10,158 కోట్లు కేటాయించి అందులో కేవలం రూ.3,700 కోట్లు మాత్రమే ఖర్చు చేశారని అన్నారు. గిరిజన సబ్ప్లాన్ కింద గత ఏడాది రూ.17,168 కోట్లు ఉండగా ఈ ఏడాది రూ.15,274 కోట్లకు తగ్గించారని విమర్శించారు. ట్రైకార్కు గతంలో రూ.300 కోట్లు ఇచ్చి ఈసారి నిధులు కేటాయించలేదని తెలిపారు. గిరిజన యువ వికాసానికి గత ఏడాది రూ.1,360 కోట్లు కేటాయించి ఖర్చు చేయలేదని అన్నారు. ప్రభుత్వం హామీలు అమలు చేయలేదని ఆరోపిస్తూ ‘నగారా భేరి’ పేరుతో ముట్టడికి పిలుపునిచ్చారు. రాష్ట్రవ్యాప్తంగా గిరిజనులు పెద్ద ఎత్తున పాల్గొనాలని కోరారు.
