పొరుగు దేశాల్లో ఈ కార్యకలాపాలపై ఆ దేశ వార్తా సంస్థ ఇన్ఫోగ్రాఫిక్‌ను ప్రచురణ
హార్ముజ్‌ వ్యూహంపై పునరాలోచిస్తున్న అమెరికా
వాషింగ్టన్‌/టెహ్రాన్‌: ఎలాన్‌మస్క్‌ యొక్క స్టార్‌లింక్‌ శాటిలైట్‌ ఇంటర్నెట్‌ నెట్‌వర్క్‌ను ఇరాన్‌ తన ప్రాంతీయ లక్ష్యాలలో ఒకటిగా గుర్తించింది. బహ్రెయిన్‌, కువైట్‌, యునైటెడ్‌ అరబ్‌ ఎమిరేట్స్‌ వంటి పొరుగు దేశాల్లో స్టార్‌లింక్‌ కార్యకలాపాలు నిర్వహిస్తున్నట్టు హైలైట్‌ చేస్తూ, ఆ దేశ అధికారిక వార్తా సంస్థ ఫార్స్‌ ఒక ఇన్ఫోగ్రాఫిక్‌ను ప్రచురించింది. ఇరాన్‌లో స్టార్‌లింక్‌ను ఉపయోగిస్తే గరిష్టంగా రెండేండ్ల జైలు శిక్ష విధించే నిబంధన ఉన్నప్పటికీ ఈ పరిణామం చోటుచేసుకుంది. అయినప్పటికీ అక్కడి ప్రభుత్వం విధించిన ఇంటర్నెట్‌ ఆంక్షలను అధిగమించడానికి చాలా మంది ఇరానీయులు ఈ సేవపై ఆధారపడుతుంటారు. ఇరాన్‌ పట్ల అమెరికా వైఖరిలో ఒక ముఖ్యమైన మార్పుగా, హార్ముజ్‌ జలసంధి మూసుకుపోయి ఉన్నప్పటికీ, దానిని తిరిగి తెరిచేందుకు చేపట్టే సైనికచర్యను వాయిదా వేయవచ్చని అధ్యక్షుడు డోనాల్డ్‌ ట్రంప్‌ తన సహాయకులకు చెప్పినట్టు సమాచారం. అటువంటి ఆపరేషన్‌ ఆరు వారాలకు మించి కొనసాగవచ్చని , భరించలేని ఆర్థిక వ్యయాలను విధించవచ్చని ట్రంప్‌ నిర్ధారణకు వచ్చినట్టు వైట్‌ హౌస్‌ వర్గాలను ఉటంకిస్తూ వాల్‌ స్ట్రీట్‌ జర్నల్‌ నివేదించింది. ఈ అంశాలే ఈ పునఃసమీకరణకు దారితీసినట్టు కనిపిస్తోంది. హార్ముజ్‌ జలసంధి మూసి ఉన్నప్పటికీ, ఇరాన్‌పై సైనిక దాడిని ముగించాలని ట్రంప్‌ యోచిస్తున్నారని కూడా ఆ నివేదిక చెబుతోంది. దీనికి ప్రతిగా స్టార్‌లింక్‌ను టార్గెట్‌ చేస్తామని ఐఆర్‌జీసీ హెచ్చరిక చేసింది.