‘స్థానిక’ షెడ్యూల్ పై ఎడతెగని ఉత్కంఠ..
పోటీ చేసేందుకు ఆశావాహులు సిద్ధం..
నవతెలంగాణ – మల్హర్ రావు
స్థానిక సంస్థల ఎన్నికల రిజర్వేషన్లపై తీవ్ర ఉత్కంఠ నెలకొంది. ప్రభుత్వ ఆదేశాల మేరకు అధికారులు వార్డు, సర్పంచ్, ఎంపీటీసీ, జెడ్పీటీసీ రిజర్వేషన్లు దాదాపు ఖారారు చేసినట్లు తెలుస్తోంది. గోప్యత పాటించడంతో ఆశావహుల్లో తీవ్ర ఆందోళన నెలకొంది. ఎన్నికల్లో పోటీ చేయడం కోసం రెండు, మూడేళ్లుగా కొందరు ప్రజల్లో ఉంతున్నారు. మరికొందరు టైం వరకు ఎంత ఖర్చుపెట్టియినా పదవి దక్కించుకోవాలని చూస్తున్నారు.
ప్రస్తుతం ప్రభుత్వం బీసీలకు 42 శాతం రిజర్వేషన్లు కల్పించాలనే ఆలోచనతో ఉండడంతో గ్రామ స్ధాయిలో ఉండే పోటీదారుల్లో టెన్షన్ మొదలైంది.రిజర్వేషన్లు కలిసొస్తాయో.. లేదోనని ఆందోళన చెందుతున్నారు. మండలంలో ఏ గ్రామం నుంచి వార్డు సభ్యుడిగా, సర్పంచ్, ఎంపీటీసీగా, జెడ్పీటీసీగా గెలిపాం దినా మంచి పలుకుబడి ఉంటుందని,స్థానిక ఎన్నికల్లో గెలుపొందితే తమ ఫ్యూచర్ కూడా మారుతుందని ఆశలపల్లకీలో ఉన్నారు. మండలంలో మొత్తం 128 వార్డులు, 7 ఎంపిటిసిలు,15 సర్పంచ్ లు,ఒక జెడ్పిటిసి, ఒక ఎంపిపి ఉండగా పోలింగ్ కేంద్రాలు 46,బిఎల్ఓ 24,ఓట్లు మొత్తం 22,461 ఉన్నాయి.
ఇప్పటికిప్పుడు షెడ్యూల్ వస్తే..
రెండేళ్లుగా ఊరిస్తున్న స్థానిక సంస్థల ఎన్నికలను త్వరలో నిర్వహిస్తామని ప్రభుత్వం గ్రీన్ సిగ్నల్ ఇవ్వడంతో ఆశావహుల్లో ఒకింత ఆందోళన.. మరోవైపు ఆశలు కంటికి కునుకు లేకుండా చేస్తున్నాయి. నేడో రేపో రిజర్వేషన్లు ప్రకటించి,. రెండు, మూడు రోజుల్లో ఎంపీటీసీ, జెడ్పీటీసీ షెడ్యూల్.. ఆ వెంటనే పంచాయతీల షెడ్యూల్ ప్రకటించి ఎన్ని కలు నిర్వహించాలని ప్రభుత్వం ఆలోచనలో ఉన్నట్లు సమాచారం. ఇప్పటికిప్పుడు షెడ్యూల్ వస్తే పోటీలో ఉండడానికి కొందరు సై అంటుండగా..మరికొందరు నై అంటున్నారు. యూరియా కొరత,పింఛన్ల పెంపు తరహా సమస్యలు అధికార పార్టీ నేతలను కలవర పెడుతుండగా,ప్రభుత్వ వ్యతిరేకత కలిసొస్తుందని బీజేపీ, బీఆర్ఎస్ నేతలు ఆశతో ఉన్నారు.
అప్పుల వేట..
రిజర్వేషన్లు కలిసొచ్చి.. పోటీ తట్టుకోవాలంటే దీటుగా ఖర్చు చేయాల్సి ఉంటుందని భావిస్తున్నారు. ఈ మేరకు పోటీకి ఉత్సాహం చూపు తున్న ఆశావహులు డబ్బుల వేటలో పడ్డారు. వడ్డీ వ్యాపారుల వద్దకు క్యూ కడుతున్నారు. కొందరు తమకున్న వ్యవసాయ భూములు, ప్లాట్లు, ఇతర ఆస్తులను అమ్మకానికి పెడుతున్నారు. ఇదే అదనుగా వ్యాపారులు భారీగా ‘వడ్డి’లకు సిద్ధమైనట్టు తెలుస్తోంది.మరి రిజర్వేషన్లు ఎవరికి అనుకూలి స్థాయో.. ఎవరికి నిరుత్సాహం మిగులుస్తాయో వేచి చూడాలి.
