నవతెలంగాణ-హైదరాబాద్ : నీట్ పరీక్ష పత్రం లీకేజీని కమ్యూనిస్ట్ పార్టీ ఆఫ్ ఇండియా (మార్క్సిస్ట్) పొలిట్ బ్యూరో ఖండించింది. ఈ లీక్ వల్ల ప్రభావితమైన దాదాపు 22 లక్షల మంది విద్యార్థులు, తమకు ఏమాత్రం సంబంధం లేని అనవసరమైన మానసిక ఒత్తిడికి ఇప్పుడు గురవుతున్నారు. విద్యార్థుల సమస్యలను ఏమాత్రం పట్టించుకోని అవినీతిపరులు, స్వార్థపరుల కుమ్మక్కు వల్లే పేపర్ లీకేజీలు జరుగుతున్నాయి.
కేంద్ర ప్రభుత్వం పరీక్షల నిర్వహణ బాధ్యతను నేషనల్ టెస్టింగ్ ఏజెన్సీ (NTA)కి అప్పగించిన తర్వాత, పరీక్ష పత్రాలు లీక్ కావడం ఇది మొదటిసారి కాదు. NTAను తక్షణమే రద్దు చేసి, పరీక్షల నిర్వహణను వికేంద్రీకరించాలి. గతంలో మాదిరిగా పరీక్షల నిర్వహణ బాధ్యతను సంబంధిత ప్రభుత్వ సంస్థలకు అప్పగించాలి.
ఈ లీక్పై కేంద్ర ప్రభుత్వం సమగ్ర విచారణ జరపాలని, బాధ్యులకు కఠిన శిక్షలు పడేలా చూడాలని, అలాగే ప్రభావిత విద్యార్థుల భవిష్యత్తు ప్రమాదంలో పడకుండా తక్షణ చర్యలు చేపట్టాలని సీపీఐ(ఎం) డిమాండ్ చేస్తుంది.
