– ఇన్ సర్వీస్ ఉపాద్యాయులకు టెట్ మినహాయింపునివ్వాలని డిమాండ్
నవతెలంగాణ – అశ్వారావుపేట
ప్రస్తుతం ఇన్ సర్వీసులో ఉన్న సీనియర్ ఉపాధ్యాయులకు, 2010 కంటే ముందు నియామకం అయిన వారికి టెట్ నుంచి మినహాయింపు ఇవ్వాలని టీఆర్టీఎఫ్ జిల్లా అధ్యక్షులు గట్టిగుండ్ల దుర్గయ్య ప్రభుత్వాన్ని డిమాండ్ చేసారు. అశ్వారావుపేటలోని తన నివాసంలో శనివారం జరిగిన విలేకర్ల సమావేశంలో ఆయన మాట్లాడారు.
సర్వీసులో ఉన్న సీనియర్ ఉపాధ్యాయులు సర్వీస్ లో కొనసాగాలన్నా, ఉపాధ్యాయ అర్హత పరీక్ష “టెట్” క్వాలిఫై కావాలనడం అసమంజసమని,గతంలో నిర్వహించిన డీఎస్సీ నోటిఫికేషన్ లో సర్వీస్ లో ఉన్న ఉపాధ్యాయులకు టెట్ ప్రస్తావన లేదని 20 నుండి 30 ఏండ్లు సర్వీసును కలిగిన సీనియర్ ఉపాధ్యాయులను ఇప్పుడు టెట్ క్వాలిఫై కావాలనడం అన్యాయం అని,కేంద్ర,రాష్ట్ర ప్రభుత్వాలు నేషనల్ కౌన్సిల్ ఫర్ టీచర్ ఎడ్యుకేషన్ (ఎన్. సి. టి. ఈ ) నిబంధనలను మార్చి సీనియర్ ఉపాధ్యాయులకు ఉపశమనం కలిగించాలని కోరారు.
అనంతరం రాష్ట్ర అసోసియేట్ అధ్యక్షులు ధరావత్ రాములు ఎన్నికల అధికారిగా జిల్లా నూతన కమిటీని ఏకగ్రీవంగా ఎన్నుకున్నారు. భద్రాద్రి కొత్తగూడెం జిల్లా అధ్యక్షులుగా గట్టిగుండ్ల దుర్గయ్య, జిల్లా ప్రధాన కార్యదర్శిగా కర్నె సంపత్ కుమార్, కార్యదర్శులుగా సుంచు బాలకృష్ణ, సి.హెచ్. మురళీ ధరరావులను ఎన్నికయ్యారు.
