నాకూ ఓ ప్రయోగం లాంటిదే..

బాలకృష్ణ, డైరెక్టర్‌ బోయపాటి శ్రీను కాంబినేషన్‌లో తెరకెక్కిన చిత్రం ‘అఖండ 2’. 14 రీల్స్‌ ప్లస్‌ బ్యానర్‌ మీద ఎం తేజస్విని నందమూరి సమర్పణలో రామ్‌ ఆచంట, గోపి ఆచంట నిర్మించిన ఈ మూవీని డిసెంబర్‌ 5న విడుదల చేయబోతున్నారు. ఈ నేపథ్యంలో శనివారం నటుడు ఆది పినిశెట్టి మీడియాతో ముచ్చటించారు. బోయపాటి శ్రీను దర్శకత్వంలో నేను ‘సరైనోడు’ చిత్రంలో వైరం ధనుష్‌ అనే పాత్రను పోషించాను. అందులోని పాత్రకి ‘అఖండ 2’లో నేను పోషించిన కారెక్టర్‌కు చాలా తేడా ఉంటుంది. ఇలాంటి పాత్రను పోషించడం నాకు కూడా కొత్తే. మంత్ర తంత్రాల చుట్టూ తిరిగే పాత్రలు నేను చేయలేదు. నేను కథ వినకుండా ఓకే చేసిన మొదటి చిత్రం ఇది. బోయపాటి మీద నాకు చాలా నమ్మకం ఉంది. బాలయ్యకి ఎదురుగా అంటే సరిపోతానా? అని అడిగాను. పర్‌ఫెక్ట్‌గా ఉంటారు అని ఆయన అన్నారు.

బోయపాటి నా పాత్రను వివరించిన తరువాత చాలా కన్ఫ్యూజ్‌ అయ్యాను. వైరం ధనుష్‌ లాంటి పాత్రలు అయితే సొంతంగా ఊహించుకుని చేసుకోవచ్చు. కానీ ఇందులో పోషించిన పాత్ర మాత్రం నాకూ ఓ ప్రయోగం లాంటిదే. నా పాత్రకు ప్రేక్షకులు ఎలాంటి రెస్పాన్స్‌ ఇస్తారో అని ఆసక్తిగా ఎదురు చూస్తున్నాను. బాలయ్య గురించి బయట చాలా వింటుంటాం. కానీ సెట్‌లో ఆయన ఎనర్జీ వేరేలా ఉంటుంది. మా నాన్నతో వర్క్‌ ఎక్స్‌పీరియెన్స్‌ని కూడా నాతో పంచుకున్నారు. ఆయన ఎనర్జీని మ్యాచ్‌ చేయడం చాలా కష్టం. ‘అఖండ’ కంటే ‘అఖండ తాండవం’లో హై మూమెంట్స్‌ ఎక్కువగా ఉంటాయి. బాలయ్య యాక్షన్‌, బోయపాటి మేకింగ్‌, తమన్‌ మ్యూజిక్‌, ఎలివేషన్స్‌ని చూస్తే పదివేల వాట్స్‌ కరెంట్‌ షాక్‌ కొట్టినట్టుగా ఉంటుంది. వావ్‌ అనిపించేలా, ఆశ్చర్యపోయేలా ఎన్నో అంశాల్ని చూపించబోతున్నారు. అదే ‘అఖండ 2’కి ప్లస్‌ పాయింట్‌.

ఇందులో భారీ యాక్షన్‌ సీక్వెన్స్‌లు ఉంటాయి. మరీ ముఖ్యంగా రెండు మేజర్‌ సీక్వెన్స్‌లు ఉంటాయి. ఓ సీక్వెన్స్‌ను ఎండాకాలంలో 15 రోజుల పాటు నిర్విరామంగా షూటింగ్‌ చేశాం. మధ్యాహ్నం వరకు చాలా మంది ఎండదెబ్బకు పడిపోయారు. కానీ బాలయ్య మాత్రం ఆ ఎండలోనే అలా నిల్చుండేవారు. కనీసం గొడుగు కూడా పట్టుకుని ఉండేవారు కాదు. సినిమా పట్ల ఆయనకు ఉండే ప్రేమ, పిచ్చి నాకు అప్పుడు అర్థమైంది. తమన్‌ మామూలుగా కొడితేనే బాక్సులు బద్దలు అవుతుంటాయి. ఇక బాలయ్య సినిమాకి తమన్‌ ఏ రేంజ్‌లో కొడతారో చెప్పాల్సిన పని లేదు. నా సీన్లకు కూడా ఈసారి మ్యూజిక్‌ అదిరిపోతుంది. తమన్‌ తన ఆర్‌ఆర్‌తో అదరగొట్టబోతున్నారు. ఎన్నో డిఫరెంట్‌ లొకేషన్స్‌లో ఇంత భారీ బడ్జెట్‌తో సినిమాను నిర్మించడం మామూలు విషయం కాదు. 14 రీల్స్‌ మాత్రం ఎన్నో జాగ్రత్తలు తీసుకుని ఈ మూవీని గొప్పగా నిర్మించింది. ఇలాంటి ప్రొడక్షన్‌ కంపెనీ, రామ్‌ ఆచంట, గోపీ ఆచంట వంటి నిర్మాతలతో మళ్లీ మళ్లీ పని చేయాలని కోరుకుంటున్నాను.
‘థండర్‌’ అనే స్పోర్ట్స్‌ డ్రామాని తమిళ, తెలుగు భాషల్లో చేస్తున్నాను. ‘మరకతమణి’ సీక్వెల్‌ చేస్తున్నాను. కార్తీతో కలిసి ‘మార్షల్‌’ మూవీని కూడా చేస్తున్నాను.