ప్రజల మధ్య చిచ్చుకు కుట్ర

బీజేపీ, టీఎంసీ మత ప్రయోగం : సీపీఐ(ఎం) పశ్చిమబెంగాల్‌ రాష్ట్రకార్యదర్శి ఎండీ సలీం
ఫాసిజానికి వ్యతిరేకంగా పోరాటాన్ని బలోపేతం చేయాలి
ఇందుకు లౌకిక, ప్రజాస్వామ్య వామపక్ష శక్తులకు మద్దుతు ఇవ్వాలని విజ్ఞప్తి

కోల్‌కతా : ప్రజల్ని విభజించటానికి బీజేపీ, టీఎంసీ పార్టీలు ”మత కార్డు”ను ప్లే చేస్తున్నాయని సీపీఐ(ఎం) పశ్చిమబెంగాల్‌ రాష్ట్రకార్యదర్శి ఎండీ సలీం అన్నారు. ‘ఫాసిజం’కు వ్యతిరేకంగా పోరాటాన్ని బలోపేతం చేయడానికి లౌకిక, ప్రజాస్వామ్య వామ పక్ష శక్తులకు మద్దతు ఇవ్వాలని పౌరులను కోరారు. కూచ్‌ బెహార్‌ జిల్లాలోని తూఫాన్‌గంజ్‌లో శనివారం పార్టీ శ్రేణులతో జరిగిన సమావే శంలో సలీం మాట్లాడుతూ.. 1980, 1990ల్లో మతతత్వం పెరిగిన సమయం లో ‘నా హిందూ రాష్ట్రం, నా ఖలిస్తాన్‌. ఏక్‌ రహేగా హిందూస్తాన్‌’ అనే నినాదం తో, వామపక్షాలు ప్రతిఘటించాయని గుర్తుచేసుకున్నారు. అప్పటినుంచి ‘ఎలాంటి అరమరికల్లేకుండా మనమందరం ఐక్యంగా ఉన్నాం’ అని అన్నారు.

‘మనందరికీ తెలుసు, ఆయా వర్గాలకు దేవాలయాలు, మసీదులు, చర్చీలు, ఇతర ప్రార్థనా స్థలాలు ఉన్నాయి. అయితే ఎన్నికలు సమీపిస్తున్నప్పుడు కొన్ని పార్టీలకు చెందిన కొంతమంది వ్యక్తులు మత విభజన నినాదాన్ని లేవనెత్తు తున్నారు. అలాంటి నేతలు పశ్చిమ బెంగాల్‌, భారతదేశం యొక్క నైతికత, బహుళ సంప్రదాయాలకు వ్యతిరేకంగా ఉన్నారు’ అని వివరించారు.
రాష్ట్రంలో ఆర్‌ఎస్‌ఎస్‌-బీజేపీ ప్రవేశానికి సీఎం మమతా వీలు కల్పించారని ఆయన ఆరోపించారు. వామపక్షాలు అధికారంలో ఉన్నప్పుడు ‘మత శక్తులకు మార్గం సుగమం చేయడంలో” ఆమె పాత్ర గురించి మార్క్సిస్ట్‌ పితామహుడు , మాజీ ముఖ్యమంత్రి జ్యోతి బసు హెచ్చరించారని ఆయన పేర్కొన్నారు.

”గుర్తుంచుకోండి, మమత ప్రతిపక్షంలో ఉన్నప్పుడు ఆర్‌ఎస్‌ఎస్‌ ద్వారా ‘మా దుర్గ’గా అభివర్ణించబడింది” అని ఆయన అన్నారు. ”మమతా బెనర్జీ, ఆమె అనుచరులు ‘లాల్‌ హటావో, దేశ్‌ బచావో’ అనే నినాదాన్ని సృష్టించారు, రాష్ట్రం టీఎంసీ పాలనలో శాంతిభద్రతలు క్షీణించి, అవినీతిలో ”ఉత్తరప్రదేశ్‌ , బీహార్‌” స్థాయికి దిగజారింది” అని సలీం పేర్కొన్నారు. బంగ్లాదేశ్‌, మయన్మార్‌ నుంచి చొరబాట్లపై బీజేపీ, ఒక వర్గం మీడియా తప్పుడు కథనాలను వ్యాప్తి చేస్తున్నాయని పేర్కొంటూ ”స్పెషల్‌ ఇంటెన్సివ్‌ రివిజన్‌ (సర్‌), మైనారిటీ పౌరుల పేర్లను తొలగించడం, విభజన తర్వాత దశాబ్దాల క్రితం భారతదేశానికి వలస వచ్చిన వారి పేర్లను తొలగించడం ద్వారా వారు ప్రజలను భయపెడుతున్నారు” అని సలీం అన్నారు.