బాహుబలి విజయవంతం

నింగిలోకి బ్లూబర్డ్‌ బ్లాక్‌-2 ఉపగ్రహం
కమ్యూనికేషన్‌ రంగంలో విప్లవాత్మక మార్పులు
భవిష్యత్తులో మరిన్ని వాణిజ్య ప్రయోగాలు : ఇస్రో చైర్మెన్‌

వేదిక నుంచి ఎల్‌వీఎం3 ఎం6 రాకెట్‌ ద్వారా ఈ వాణిజ్య ఉపగ్రహాన్ని ప్రయోగించింది. అమెరికాకు చెందిన భారీ కమ్యూనికేషన్‌ ఉపగ్రహం బ్లూబర్డ్‌ బ్లాక్‌-2ను రాకెట్‌ విజయవంతంగా మోసుకెళ్లింది. 15.30 నిమిషాల్లో మూడు దశల్లో రాకెట్‌ ప్రయోగం విజయవంతమైంది. అమెరికాకు చెందిన ఏఎస్‌టీ స్పేస్‌ మొబైల్‌ సంస్థతో కలిసి ఇస్రో వాణిజ్య విభాగం న్యూస్పేస్‌ ఇండియా లిమిటెడ్‌ ఈ ప్రయోగాన్ని నిర్వహించింది. సుమారు 6,100 కిలోల బరువున్న ఈ ఉపగ్రహం ఇస్రో ఇప్పటివరకు ప్రయోగించిన అత్యంత బరువైన వాణిజ్య పేలోడ్‌గా రికార్డు సృష్టించింది. రాకెట్‌ ప్రయోగం విజయవంతం కావడంతో షార్‌లో సంబరాలు చేసుకున్నారు.

కమ్యూనికేషన్‌ రంగంలో విప్లవాత్మక మార్పులు
ఈ ప్రయోగం ప్రపంచ కమ్యూనికేషన్‌ రంగంలో విప్లవాత్మక మార్పులకు బాటలు వేసింది. బ్లూబర్డ్‌ బ్లాక్‌-2 ఉపగ్రహం ద్వారా 4జీ/5జీ సిగల్స్‌ అందుతాయి. దీనితో ఎటువంటి సిగల్స్‌ లేని మారుమూల ప్రాంతాల్లో కూడా మొబైల్‌ సేవలు పొందే వీలుంటుంది. ఆర్బిట్‌లో అతి పెద్ద వాణిజ్య ఉపగ్రహంగా గుర్తింపు పొందిన దీని యాంటీనా విచ్చుకున్న తర్వాత ఏకంగా 223 చదరపు మీటర్ల వైశాల్యం కలిగి ఉంటుంది. ఈ విజయంతో అంతర్జాతీయ వాణిజ్య అంతరిక్ష మార్కెట్లో భారత్‌ మరోసారి తన సత్తా చాటింది.

శాస్త్రవేత్తలకు అభినందనలు తెలిపిన ఇస్రో చైర్మెన్‌
భవిష్యత్తులో మరిన్ని వాణిజ్య ప్రయోగాలు చేపడతామని ఇస్రో చైర్మెన్‌ వి.నారాయణన్‌ తెలిపారు. శ్రీహరికోటలోని మీడియా సెంటర్‌లో విలేకర్ల సమావేశంలో ఆయన మాట్లాడుతూ మానవ రహిత ప్రయోగాలు, నావిగేషన్‌, ఎయిర్‌ స్పేస్‌ స్టేషన్‌, వీనస్‌ ఆర్బిట్‌ ప్రయోగాలు, వాణిజ్య ఒప్పందాలు జరుగుతాయని తెలిపారు. ప్రయోగం విజయవంతం కావడానికి అహర్నిశలు కృషి చేసిన శాస్త్రవేత్తలను ఆయన అభినందించారు.