జీతం ఎంత వచ్చినా సరిపోవడం లేదా? ఖర్చులు విపరీతంగా పెరిగిపోతున్నాయా? అయితే సంపాదన ప్రకారం ఖర్చులను ప్లాన్‌ చేసుకుంటూ ఉండాలి. ముఖ్యంగా మహిళలు… అందునా సింగిల్‌ మదర్స్‌ ఈ విషయాన్ని కచ్చితంగా పాటించాలి. ఫైనాన్షియల్‌గా స్ట్రాంగ్‌గా ఉండాలంటే ఎన్నో రకాల జాగ్రత్తలు తీసుకోవాలి. బడ్జెట్‌ విషయంలో ఎప్పుడైతే నిర్ణయాలు కరెక్ట్‌గా తీసుకుంటారో అప్పుడే ఎటువంటి ప్రాబ్లమ్స్‌ లేకుండా ఉండగలుగుతారు. ఎక్కువ శాతం మందికి సరైన ప్లానింగ్‌ లేకపోవడం వల్ల నెలాఖరికి శాలరీ మొత్తం ఖర్చు అయిపోతోంది. దాంతో తిరిగి అప్పు చేయాల్సి వస్తుంటుంది. మరి ఎలాంటి జాగ్రత్తలు తీసుకుంటే మీ ఫైనాన్షియల్‌ స్టేటస్‌ బాగుంటుందని తెలుసుకుందాం…
బడ్జెటింగ్‌ అనేది ప్రతి ఒక్కరూ పాటించాలని నిపుణులు చెబుతారు. ఎప్పుడైతే మనం చేసేటువంటి ఖర్చులపై అవగాహన ఉంటుందో అప్పుడే మన ఖర్చులు తగ్గే అవకాశాలు ఉంటాయి. పైగా బడ్జెట్‌ కూడా మేనేజ్‌ చేసుకోగలుగుతారు. కొంత మంది ఖర్చులు పెట్టడానికి ఎంతగానో ఆలోచిస్తారు. ఇలా పిసినారిగా ఆలోచించడం వలన లైఫ్‌లో ఎన్నో మిస్‌ అవ్వాల్సి ఉంటుంది. అలాగే కొందరు అతిగా ఖర్చు పెడతారు. ఇది కరెక్ట్‌ కాదు. బడ్జెట్‌కు మించి అతిగా ఖర్చు పెట్టడంతో తర్వాత మీరే బాధపడాల్సి ఉంటుంది. కాబట్టి ఖర్చు చేసే ముందు ఆలోచించి సరైన డెసిషన్‌ తీసుకొని అప్పుడే ఖర్చు చేయండి.
లైఫ్‌ స్టైల్‌
ఎప్పుడూ ఫ్యాన్సీ, పోష్‌గా లైఫ్‌ స్టైల్‌ని మెయింటెన్‌ చేయాలను కుంటే మీకు డబ్బులు ఖర్చవుతూనే ఉంటాయి. పైగా దానికి ఎలాంటి అదుపు ఉండదు. ముఖ్యంగా చాలా మంది బ్రాండెడ్‌ ఐటమ్స్‌ కోసం చాలా ఖర్చు పెడుతారు. వాటివల్ల కేవలం స్టేటస్‌ పెరుగుతుంది. కానీ ఫైనాన్షియల్‌ సమస్యలు ఎన్నో తలెత్తుతాయని గుర్తుంచుకోండి. ఎప్పుడైనా లైఫ్‌ స్టైల్‌ కోసం ఖర్చు పెట్టడం మొదలు పెడితే దానికి ఎటువంటి ముగింపు ఉండదని ఫైనాన్షియల్‌ అడ్వైజర్స్‌ చెబుతున్నారు.
సేవింగ్స్‌
ఈ ఆధునిక యుగంలో రకరకాల కారణాలతో ఖర్చులు పెరిగిపోతున్నాయి. దాంతో సేవింగ్స్‌ అనే కాన్సెప్ట్‌నే చాలామంది మర్చిపోతున్నారు. కానీ సేవింగ్స్‌ చేయకపోతే భవిష్యత్తులో ఎన్నో సమస్యలను ఎదుర్కోవాల్సి ఉంటుంది. సడన్‌గా ఏదైనా సమస్య వస్తే దాన్ని పరిష్కరించుకోడానికి సేవింగ్స్‌ అనేవి అవసరమని గుర్తుంచుకోండి. మీ రిటైర్మెంట్‌ అయ్యే సరికి కొంత సేవింగ్స్‌ ఉండడం ఎంతో అవసరం. కాబట్టి మీ సంపాదనలో కొంత భాగాన్ని సేవింగ్స్‌కు చేర్చండి.
ఇన్వెస్ట్‌మెంట్‌
ఇన్వెస్ట్‌మెంట్‌కు ఎలాంటి రూల్స్‌ ఉండవు. ఎవరైనా, ఎప్పుడైనా ఇన్వెస్ట్‌ చేయవచ్చు. మీరు కేవలం కొద్ది అమౌంట్‌తో అయినా మొదలు పెట్టి చాలా తెలివిగా ఇన్వెస్ట్‌ చేయండి. ఇన్వెస్ట్‌మెంట్‌ నుండి పొందిన లాభాలను గమనిస్తూ ఉండండి. దాంతో రోజు రోజుకు వాటిపై పెరుగుతూ వస్తుంది. దీనివల్ల మీకు ఎలాంటి నష్టం ఉండదు. రిస్క్‌ తీసుకుని అయినా ఇన్వెస్ట్‌ చేయొచ్చొని అనుకుంటే స్టాక్‌ మార్కెట్‌ వంటివి కూడా మంచి ఎంపికే. అయితే పూర్తి అవగాహనతో ఇన్వెస్ట్‌మెంట్‌ గురించి అన్ని విషయాలను తెలుసుకొని మాత్రమే ఇన్వెస్ట్‌మెంట్‌ చేయండి.
ఎమర్జెన్సీ ఫండ్‌
ఎమర్జెన్సీ ఫండ్‌ అనేది ఎంతో ముఖ్యమైనదిగా చెప్పుకోవచ్చు. సుమారు ఆరు నెలలు పాటుగా ఖర్చులు తగ్గించుకుని ఆ అమౌంట్‌ను సేవ్‌ చేసుకుని దాన్ని ఎమర్జెన్సీ ఫండ్‌ ఎకౌంట్‌కు చేర్చుకోవాలి. దీనివల్ల ఎప్పుడైనా ఏదైనా అవసరం అయినప్పుడు ఆ అమౌంట్‌ను ఉపయోగించవచ్చు. ఈ మధ్యకాలంలో చాలా మంది దీన్ని పాటించడానికి ఇష్టపడుతున్నారు. ఎందుకంటే సేవింగ్స్‌లేని సమయంలో ఈ ఎమర్జెన్సీ ఫండ్‌ అనేది ఎంతగానో ఉపయోగపడుతుంది అనే చెప్పవచ్చు.
క్రెడిట్‌ కార్డ్స్‌
చాలా శాతం మంది క్రెడిట్‌ కార్డులను ఎక్కువగా ఉపయోగిస్తుంటారు. అయితే క్రెడిట్‌ కార్డ్స్‌ ఉపయోగించడంతో పాటుగా బిల్‌ కట్టడం ఎంతో అవసరం. అయితే సమయం లేకపోవడం, ఇతర కారణాల వలన క్రెడిట్‌ కార్డ్‌ బిల్స్‌ సరైన సమయంలో క్లియర్‌ చేయకపోవడం వల్ల అవి ఎక్కువైపోతూ ఉంటాయి. కాబట్టి వీలైనంత త్వరగా తక్కువ అమౌంట్‌ ఉన్నప్పుడే క్లియర్‌ చేసేయాలి. ఎందుకంటే చివరికి ఎక్కువ అమౌంట్‌ అయితే క్రెడిట్‌ కార్డు బిల్‌ పేమెంట్‌ చేయడానికి ఇబ్బంది అవుతుంది. కనుక క్రమంగా క్రెడిట్‌ కార్డు బిల్స్‌ క్లియర్‌ చేసుకుంటూ ఉండడం ఎంతో మంచిదని గుర్తుంచుకోండి. ఒకవేళ మీరు క్రెడిట్‌ స్కోర్‌ని బాగా మెయింటైన్‌ చేయాలని అనుకుంటే మల్టిపుల్‌ క్రెడిట్‌ కార్డ్స్‌ మీకు ఉపయోగపడతాయి. ఇలా ఉపయోగించడం వల్ల మంచి అడ్వాంటేజ్‌ కూడా ఉంది. మీరు కేవలం ఒక క్రెడిట్‌ కార్డు మాత్రమే ఉపయోగిస్తూ ఉంటే క్రెడిట్‌ స్కోర్‌ దెబ్బతినే అవకాశాలు ఉంటాయి. కాబట్టి మల్టిపుల్‌ క్రెడిట్‌ కార్డ్స్‌ ఉపయోగించి మీ క్రెడిట్‌ స్కోర్‌ పెంచుకోండి.
ఇన్సూరెన్స్‌
ప్రతి ఒక్కరి జీవితంలో ఇన్సూరెన్స్‌ అనేది చాలా అవసరం. ఎప్పుడూ కూడా హెల్త్‌ ఇన్సూరెన్స్‌కు కొంత అమౌంట్‌ ఖర్చు పెట్టండి. ఇలా చేయడం వలన ఎమర్జెన్సీ సమయంలో ఎక్కువ అమౌంట్‌ ఖర్చు పెట్టాల్సిన అవసరం ఉండదు.
బడ్జెటింగ్‌
మీరు ఖర్చు చేసే అమౌంట్‌ను ఎప్పటికప్పుడు ట్రాక్‌ చేసుకోండి. అలా చేయడం వల్ల అనవసరమైన ఖర్చులు ఏమైనా చేస్తున్నారా? లేదా క్రమంగా దేనిపై ఎక్కువ ఖర్చు పెడుతున్నారనేది తెలుస్తుంది. దాన్నిబట్టి క్రమంగా మీ అలవాట్లను మార్చుకుంటూ ఖర్చులు తగ్గించుకుంటూ ఉండాలి.
