– మిజోరం అసెంబ్లీ ఎన్నికల్లో మయన్మార్‌ శరణార్థుల విన్నపం
సిహ్ముయి: దేశంలోని ఈశాన్య రాష్ట్రమైన మిజోరాంలో కొత్త ప్రభుత్వమైనా తమ కష్టాలు తీర్చాలని, తమకు తినడానికి తిండి, పిల్లలకు చదువు కావాలని మయన్మార్‌ శరణార్థులు విన్నవిస్తున్నారు. వీరంతా ఇప్పుడు మిజోరంలో ఐజ్వాల్‌ నగరానికి 30 కిలోమీటర్ల దూరంలో ఉన్న సిహ్ముయి సహాయ శిబిరంలో ఆశ్రయం పొందుతున్నారు.
మయన్మార్‌ శరణార్థులు 2021 ప్రారంభంలో తమ దేశం నుంచి పారిపోయిన అనంతరం సిహ్ముయి శిబిరంలో నివసిస్తున్నారు. తాత్కాలికంగా వెదురు గోడలతో తగరపు పైకప్పు ఉన్న రెండు హాళ్లలో ప్రస్తుతం సుమారు 130 మంది తమ కుటుంబాలను పోషించుకోవడానికి ఉద్యోగాల కోసం వెతుకుతున్నారు. వారు తమ శిబిరంలో ప్రాథమిక వైద్య సంరక్షణ , మెరుగైన సౌకర్యాలను కూడా పొందాలనుకుంటున్నారు.
శిబిరంలో నివసిస్తున్న వారికి రాష్ట్ర ప్రభుత్వం ఆహారం, రేషన్‌, నీరు, ఇతర నిత్యావసర వస్తువులను అందించింది . వీటిని సెప్టెంబర్‌ నుంచి ఆపేసింది. దీంతో ‘గత రెండు నెలలుగా, సహాయక శిబిరంలో జీవితం కష్టంగా ఉంది’ అని మతుపి పట్టణానికి చెందిన కప్తాంగ్‌ చిన్‌ తెలిపారు.
”ఎందుకో మాకు తెలియదు, కానీ ఆ రాష్ట్రంలో జాతి హింస తర్వాత మణిపూర్‌ నుంచి కూడా శరణార్థులు మిజోరానికి వచ్చినందున, ఇక్కడి ప్రభుత్వంపై అధిక భారం పడిందో..లేక రాజకీయ కారణాలో తెలియదు.
మొత్తానికే సహాయం చేయడాన్ని నిలిపివేసింది. కానీ అప్పుడప్పుడు, కొన్ని స్వచ్ఛంద సంస్థలు తమకు రేషన్‌ పంపుతున్నాయి” అని 41 ఏండ్ల మయన్మీరీస్‌ అన్నాడు.
మయన్మార్‌ నుంచి 31,000 మందికి పైగా ప్రజలు మిజోరంలో నివసిస్తున్నారు. రాష్ట్ర ప్రభుత్వం వారికి పలు రకాల సహాయ సామగ్రిని అందించింది. ఈ విదేశీయులు, ఎక్కువగా చిన్‌ రాష్ట్రానికి చెందిన వారు, ఫిబ్రవరి 2021లో పొరుగు దేశంలో జరిగిన సైనిక తిరుగుబాటు తరువాత పారిపోయి వచ్చి ఆశ్రయం పొందుతున్నారు.
మిజోరం మయన్మార్‌తో 510 కిమీ పొడవాటి పోరస్‌ సరిహద్దును కలిగి ఉన్నది. ఈ ఏడాది మేలో పొరుగున ఉన్న మణిపూర్‌లో జాతి ఘర్షణ చెలరేగడంతో 12,000 మందికిపైగా కుకీ ప్రజలు తమ ఇండ్లను విడిచిపెట్టి, ఈ రాష్ట్రంలో ఆశ్రయం పొందారు.
54 ఏండ్ల మయన్మీరీస్‌ వ్యక్తి పెంగా, అసెంబ్లీ ఎన్నికలు ముగిసిన తర్వాత కొత్త మిజోరం ప్రభుత్వం తమ జీవన స్థితిగతులపై కొంత శ్రద్ధ చూపుతుందని ఆశిస్తున్నారు.
”వీలైతే, కొత్త ప్రభుత్వం అధికారంలోకి వచ్చిన తర్వాత తాను పశువులను , కూరగాయల సాగు కోసం కొంత భూమిని ఆశిస్తున్నాను. ఇది నా కుటుంబం సొంతంగా నిలదొక్కుకోవడానికి సహాయపడుతుంది,” అని ఆయన అన్నారు.
”విద్య చాలా అవసరం. దురదష్టవశాత్తు మా పిల్లలకు విద్య అందటంలేదు. కొంతమంది పిల్లలు మిజో మాధ్యమంలో ఉన్న స్థానిక ప్రభుత్వ పాఠశాలలకు వెళ్తున్నారు”.. అని కప్తాంగ్‌ చెప్పారు.
మయన్మార్‌ నుంచి ఆశ్రయం పొందుతున్న వారిలో కొంతమంది ఉపాధ్యాయులతో స్థాపించిన మరో పాఠశాల ఉంది. అక్కడ పొరుగు దేశంలోని మాతభాషలో బోధిస్తున్నారు. అయితే ఆ పాఠశాలకు ఇంకా గుర్తింపు రాలేదని, ప్రభుత్వం ఎలాంటి జీతం లేదా మద్దతు ఇవ్వడం లేదని ఆయన తెలిపారు.
ఇలాంటి భావాలను ప్రతిధ్వనిస్తూ, 38 ఏండ్ల పార్జింగ్‌ మిజోరంలో తన కొడుకు చదువు కోసం మెరుగైన ఏర్పాటు చేయాలని కోరుకుంటున్నానని, తద్వారా ఉపాధి పొందగల యువకుడిగా అభివృద్ధి చెందాలని కోరుకుంటున్నట్లు చెప్పారు.
‘ఇరవై ఏండ్ల వయస్సులో ఉన్న సుయిన్‌, మెగాలిన్‌ ఇద్దరూ తమ శిశువులను తమ ఒడిలో ఉంచుకొని, పిల్లలు పెద్దయ్యాక వారికి సరైన పాఠశాలలు కావాలని చెప్పారు.
మయన్మార్‌, బంగ్లాదేశ్‌ నుండి వచ్చిన శరణార్థుల పిల్లలు, మణిపూర్‌ నుండి అంతర్గతంగా నిర్వాసితులైన 8,119 మంది రాష్ట్రంలోని పాఠశాలల్లో చేరారని మిజోరం పాఠశాల విద్యా మంత్రి లాల్‌చందమా రాల్టే ఈ ఏడాది ఆగస్టులో తెలిపారు. వారిలో 6,366 మంది మయన్మార్‌కు చెందినవారు. 250 మంది బంగ్లాదేశ్‌కు, 1,503 మంది మణిపూర్‌కు చెందినవారు. విద్యార్థులకు ఉచిత పాఠశాల యూనిఫారాలు , పాఠ్యపుస్తకాలు అలాగే స్థానిక విద్యార్థుల మాదిరిగానే మధ్యాహ్న భోజనాన్ని అందజేస్తున్నారు.
సహాయక శిబిరంలో ఉన్న ఇబ్బందుల గురించి మెగాలిన్‌ మాట్లాడుతూ, తాగునీరు, బాత్‌రూమ్‌లు, మరుగుదొడ్ల సౌకర్యాలు సంఖ్యాపరంగా సరిపోవడం లేదని అన్నారు. ”శిబిరంలో మహిళలకు ఎస్‌ఐసీ సౌకర్యం కల్పించాలని, కొత్త ప్రభుత్వం దీని గురించి ఆలోచించాలని తాము కోరుకుంటున్నాము, ”అని ఆమె అన్నారు. ఖైదీలు అనారోగ్యానికి గురైతే వైద్యులను సంప్రదించలేని పరిస్థితి నెలకొందని, మందులు అందుబాటులో లేకపోవడంతో వైద్యం అందక తీవ్ర ఇబ్బందులు పడుతున్నారని కప్తాంగ్‌ తెలిపారు. ‘అలాగే, ఉద్యోగాల కొరత ఉంది. మేము పని చేయడానికి సిద్ధంగా ఉన్నాము, కానీ రోజువారీ కూలి దొరకడం కష్టంగా ఉంది.” అని ఆయన వాపోయాడు.
పని కోసం వెతుకుతున్నప్పుడు వారు ఏవైనా సమస్యలను ఎదుర్కొంటున్నారా అని అడిగినప్పుడు కప్తాంగ్‌ ఇలా అన్నాడు: ”అస్సలు వివక్ష లేదు. మేము ఐజ్వాల్‌కి వెళ్లి అక్కడ కూడా పని చేస్తాము, కానీ ఎవరూ మమ్మల్ని ప్రశ్నించలేదు లేదా మా జాతి లేదా జాతీయత గురించి ఏమీ చెప్పలేదు. మేము ఇంట్లోనే ఉన్నాము” అని తెలిపారు.
40 మంది సభ్యులున్న మిజోరం అసెంబ్లీకి నవంబర్‌ 7న పోలింగ్‌, డిసెంబర్‌ 3న ఓట్ల లెక్కింపు జరగనుంది.
అవకాశం కోసం చూస్తున్నాం
”నా కొడుకు ఐజ్వాల్‌లో ఇంగ్లీషు భాష నేర్చుకుంటున్నాడు.. దీనికోసం నెలకు రూ. 5వేలు ఖర్చు చేస్తున్నాను.. ఓ కంపెనీలో ఎనిమిది నెలలు పని చేసి డబ్బు ఆదా చేశాను. కోర్సు పూర్తయ్యాక ఇతర ప్రాంతాలకు వెళ్లాలని కోరుకుంటున్నాను. భారతదేశంలో మంచి అవకాశాల కోసం ఎదురుచూస్తున్నాం ” అని ఆమె జోడించారు.
మా పిల్లలు ఇంగ్లీష్‌ నేర్చుకోవాలి
”మా పిల్లలు ఇంగ్లీష్‌ నేర్చుకోవాలని మేము కోరుకుంటున్నాము, తద్వారా వారు భవిష్యత్తులో ఉపాధి పొందగలరు. ఇతర ప్రాంతాలకు వెళ్ళగలరు. ఈ అంశాన్ని పరిగణనలోకి తీసుకోవాలని మేము ప్రభుత్వాన్ని అభ్యర్థిస్తున్నాము. చాలా ప్రభుత్వ పాఠశాలలు మిజోలో ఉన్నాయి. మేము మా పిల్లలను ప్రయివేట్‌ ఆంగ్ల మాధ్యమానికి పంపలేము. మేము భారతీయులం కాదు కాబట్టి పాఠశాలలు ఏర్పాటు చేయాలి” అని కప్తాంగ్‌ చెప్పారు.
