ఆ వీరుడిని నేనే..

సక్సెస్‌ఫుల్‌ ప్రొడ్యూసర్‌గా దూసుకుపోతున్న నిహారిక కొణిదెల ‘కమిటీ కుర్రోళ్లు’ చిత్రంతో జాతీయ స్థాయిలో నిర్మాతగా మంచి గుర్తింపుని సాధించిన సంగతి తెలిసిందే. ఇక ఇప్పుడు జీ స్టూడియోస్‌ సమర్పణలో తన పింక్‌ ఎలిఫెంట్‌ పిక్చర్స్‌ బ్యానర్‌పై ఉమేష్‌ కుమార్‌ బన్సాల్‌తో కలిసి నిహారిక నిర్మిస్తున్న చిత్రం ‘రాకాస’. మ్యాడ్‌, మ్యాడ్‌ స్క్వేర్‌ చిత్రాల్లో అద్భుతమైన నటనతో ఆకట్టుకున్న హీరో సంగీత్‌ శోభన్‌ ఈ చిత్రంతో మొదటి సారి సోలో హీరోగా తెరపైకి రాబోతున్నారు. ఈ సినిమాకి మానస శర్మ దర్శకత్వం వహిస్తున్నారు. ఈ మూవీని ఏప్రిల్‌ 3న విడుదల చేయబోతున్నారు. తాజాగా ‘రాకాస’ గ్లింప్స్‌ని రిలీజ్‌ చేశారు.

‘యుగయుగాలుగా ప్రతీ కథలో ఒక సమస్య.. ఆ సమస్యను ఛేదించడానికి ఓ వీరుడు పుడతాడు.. ఆ వీరుడు ఎవరో అని తెలిసేలోపే నిశ్శబ్దంగా పని ముగిస్తాడు.. ఈ కథలో ఆ వీరుడిని నేనే’ అంటూ ఓ రేంజ్‌ లెవెల్‌ ఎలివేషన్‌ ఇస్తూ గ్లింప్స్‌ సాగింది. అయితే ఆ తరువాత ఒక్కసారిగా అది కామెడీ, సెటైరికల్‌ టర్న్‌ ఇచ్చుకుంది. ఇక ఇందులో సంగీత్‌ శోభన్‌ తన కామెడీ టైమింగ్‌తో మళ్లీ మెప్పిస్తాడని, అందరినీ ఆకట్టుకుంటాడని ఈ గ్లింప్స్‌తోనే చెప్పేశారు. ఈ ట్రెండ్‌కి తగ్గట్టుగా కొత్త కథతోనే మరో ప్రయోగం చేస్తున్నట్టుగా ఈ గ్లింప్స్‌ చెబుతోంది. ఈ చిత్రానికి కామెడీనే ప్రధాన బలం అని ఈ గ్లింప్స్‌ చెప్పకనే చెబుతోంది. కామెడీతో పాటు ఓ కొత్త పాయింట్‌ను, కొత్తదనాన్ని చూపించేలా కనిపిస్తోంది. అనుదీప్‌ దేవ్‌ సంగీతం సమకూరుస్తున్న దీనికి రాజు ఎదురోలు సినిమాటోగ్రఫీ అందిస్తున్నారు.