ప్రేక్షకులకు కృతజ్ఞతలు

విజన్‌ మూవీ మేకర్స్‌ బ్యానర్‌పై రూపొందిన క్లీన్‌ ఫ్యామిలీ ఎంటర్టైనర్‌ ‘సుమతి శతకం’. సాయి సుధాకర్‌ కొమ్మాలపాటి నిర్మాణంలో,ఎం.ఎం. నాయుడు దర్శకత్వంలో తెరకెక్కింది. అమర్దీప్‌ చౌదరి, శైలి చౌదరి జంటగా నటించిన ఈ చిత్రం ఈనెల 6న మైత్రి మూవీ మేకర్స్‌ ద్వారా విడుదలైంది. ప్రేక్షకుల నుండి మంచి స్పందన తెచ్చుకున్న నేపథ్యంలో ఈ చిత్ర సక్సెస్‌మీట్‌ అంగరంగ వైభవంగా జరిగింది. దర్శకుడు ఎం.ఎం.నాయుడు మాట్లాడుతూ,’మా సినిమా ఇంత మంచి విజయం సాధించడం నాకు చాలా సంతోషంగా ఉంది. దానికి కారణమైన ప్రేక్షకులకు ధన్యవాదాలు. మా నిర్మాత సాయి సుధాకర్‌ ప్రతి విషయంలో అండగా ఉన్నారు. అమర్దీప్‌ ఎన్ని కష్టాలు వచ్చినా ఎక్కడ వెనకడుగు వేయకుండా ఉన్నారు. సినిమా కోసం చాలా కష్టపడ్డారు. అలాగే హీరోయిన్‌ శైలి తెలుగు రాకపోయినా కూడా సినిమా కోసం తెలుగు నేర్చుకుంటూ పని చేశారు’ అని తెలిపారు. ‘కొత్త వారితో ఒక చిన్న సినిమాగా మొదలై, ఈరోజు ఇంత మంచి విజయం సాధించి మీ ముందుకు వచ్చింది.

సినిమా చూసిన అందరూ కుటుంబ సమేతంగా చూడదగిన చిత్రం అని అంటున్నారు. ఈ సినిమాలో నటించిన అందరికీ ఒక సంతృప్తి ఉంది’ అని నిర్మాత సాయి సుధాకర్‌ కొమ్మాలపాటి చెప్పారు. హీరోయిన్‌ శైలి చౌదరి మాట్లాడుతూ,’ఈ రోజు నాకు చాలా ఆనందంగా ఉంది. మేము పడ్డ కష్టానికి ప్రతిఫలం దక్కింది. ప్రేక్షకులకు, మమ్మల్ని సపోర్ట్‌ చేసిన మీడియా వారికి ధన్యవాదాలు’ అని అన్నారు. ‘నన్ను నమ్మి నాకు ఈ సినిమాలో అవకాశం ఇచ్చిన నా దర్శకుడు నాయుడుకి, నా నిర్మాత సాయి సుధాకర్‌కి ధన్యవాదాలు. మీ అందరి సపోర్ట్‌ ఉండబట్టి ఈ సినిమా ఇంత మంచిగా వచ్చింది. ప్రేక్షకులను మెప్పించేందుకు నాకు తెలిసిన ప్రతి విషయంలోనూ కష్టపడి పని చేశాను. కష్ట పడితేనే ఫలితం వస్తుందని మా నాన్న నాకు నేర్పించారు, నేను అదే పాటిస్తున్నాను. మరొకసారి నా సినిమాకు సపోర్ట్‌ చేసిన ప్రతి ఒక్కరికి, ఒక్క ఛాన్స్‌ అడిగినందుకు అవకాశం ఇచ్చిన ప్రేక్షకులకు పేరుపేరునా ధన్యవాదాలు. మరింత మంచి సినిమాలతో మీ ముందుకు వస్తాను’ అని హీరో అమర్దీప్‌ తెలిపారు.