నవతెలంగాణ – హైదరాబాద్:
చిత్రం: కొత్త మలుపు
జానర్: రొమాంటిక్ కామెడీ – ఫ్యామిలీ ఎంటర్టైనర్
నటీనటులు: ఆకాష్, భైరవి ఆర్థ్యా, రఘుబాబు, పృథ్వీ, ప్రభావతి, సిద్ధు, మహేందర్, ఐశ్వర్య తదితరులు
దర్శకత్వం: శివ కేసనకుర్తి
నిర్మాత: తాటి బాలకృష్ణ
బ్యానర్: తథాస్తు క్రియేషన్స్
సంగీతం: యశ్వంత్ నాగ్
ఛాయాగ్రహణం: సుమంత్ కచర్ల
గాయని సునీత కుమారుడు ఆకాష్ గోపరాజు హీరోగా నటించిన రెండో చిత్రం ‘కొత్త మలుపు’. దర్శకుడు శివ వరప్రసాద్ కేశనకుర్తి తెరకెక్కించారు. శుక్రవారం ప్రేక్షకుల ముందుకు వచ్చిన ఈ సినిమా ఎలా ఉందో ఓసారి చూద్దాం. జీవితాన్ని ఎంజాయ్ చేయడమే లక్ష్యంగా పెట్టుకుని స్నేహితులతో కలిసి హైదరాబాద్లో హ్యాపీగా గడిపే యువకుడు కమల్ (ఆకాష్). ఓ కుటుంబ వివాహ వేడుక కోసం తూర్పు గోదావరి జిల్లాలోని ఓ అందమైన గ్రామానికి వెళ్తాడు. అక్కడ వరలక్ష్మి (భైరవి ఆర్థ్యా) అనే గ్రామీణ యువతిని చూసి ఆకర్షితుడవుతాడు. ఒక రాత్రి అనుకోని పరిస్థితుల్లో అవమానకర స్థితిలో చిక్కుకున్న కమల్ను ఓ యువతి కాపాడుతుంది. అయితే ఆమె ఎవరో తెలియదు. తనను ఆదుకున్న ఆ అమ్మాయి కోసం కమల్ చేసే అన్వేషణలో వరలక్ష్మి అతనికి తోడుగా నిలుస్తుంది. ఈ ప్రయాణంలో ఇద్దరి మధ్య ప్రేమ మొలకెత్తుతుంది. అయితే, తాను వెతుకుతున్న అమ్మాయి వరలక్ష్మినేనని తెలుసుకునేలోపే, ఆమె మరో యువకుడితో ఉన్న ఫోటో కమల్ చేతికి చిక్కుతుంది. దాంతో ప్రేమలో అనుమానాలు, అపార్థాలు చోటుచేసుకుంటాయి. ఆ యువకుడు ఎవరు? వరలక్ష్మికి అతనితో సంబంధం ఏమిటి? ఈ అపార్థాల మధ్య కమల్-వరలక్ష్మి ప్రేమ ఎలాంటి పరీక్షలు ఎదుర్కొంది? చివరికి వారి ప్రేమ గెలిచిందా లేదా? అనేదే ‘కొత్త మలుపు’ కథ.
ప్రేమ, అపార్థాలు, నమ్మకం, గతం-వర్తమానం మధ్య జరిగే భావోద్వేగ సంఘర్షణను దర్శకుడు శివ కేసనకుర్తి చక్కగా తెరపై ఆవిష్కరించారు. గ్రామీణ నేపథ్యంలో సాగే కథకు గోదావరి ప్రాంతం అందాలను జోడించి ప్రేక్షకులకు ఆహ్లాదకరమైన అనుభూతిని అందించారు. సినిమా ప్రారంభం నుంచే ఫ్రెష్ ఫీల్ను కలిగిస్తుంది. పల్లెటూరి వాతావరణం, పెళ్లి సందడి, స్నేహితుల సరదా సంభాషణలు, హీరో-హీరోయిన్ల మధ్య నడిచే సన్నివేశాలు ప్రేక్షకులను కథలోకి తీసుకెళ్తాయి. ముఖ్యంగా మొదటి భాగంలో వచ్చే కామెడీ ఎపిసోడ్స్, గోదావరి ప్రాంతానికి ప్రత్యేకమైన హాస్య శైలి మంచి వినోదాన్ని అందిస్తాయి. రెండో భాగంలో కథ భావోద్వేగాల వైపు మలుపు తిరుగుతుంది. ప్రేమలో అనుమానం ఎంత ప్రమాదకరమో, ఒకరి గతాన్ని పట్టుకుని తీర్పు చెప్పడం ఎంత తప్పో చెప్పే ప్రయత్నం చేశారు. ముఖ్యంగా క్లైమాక్స్లో వచ్చే సందేశం నేటి యువతకు ఎంతో అవసరమైన అంశాన్ని స్పృశిస్తుంది.
‘ప్రతి ఒక్కరికీ ఒక గతం ఉంటుంది. కానీ మన జీవితంలోకి వచ్చిన వ్యక్తి వర్తమానాన్ని అర్థం చేసుకోవడం ముఖ్యం. గతాన్ని తవ్వుకుంటూ భవిష్యత్తును పాడు చేసుకోవద్దు` అనే భావాన్ని దర్శకుడు హృద్యంగా చెప్పగలిగారు.
కమల్ పాత్రలో ఆకాష్ చక్కటి ఈజ్తో నటించాడు. మొదటి భాగంలో ఎనర్జిటిక్ యువకుడిగా, రెండో భాగంలో ప్రేమలో తడబడే యువకుడిగా భావోద్వేగాలను సమర్థంగా పలికించాడు. స్క్రీన్ ప్రెజెన్స్ ఆకట్టుకుంటుంది. ఇక ఈ చిత్రానికి ప్రధాన బలాల్లో భైరవి నటన ఒకటి. వరలక్ష్మి పాత్రలో ఆమె సహజత్వం కనిపిస్తుంది. గ్రామీణ యువతిగా అమాయకత్వం, ప్రేమలోని భావోద్వేగాలను ఎంతో సహజంగా వ్యక్తపరిచింది. క్లైమాక్స్లో ఆమె నటన ప్రత్యేకంగా నిలుస్తుంది. అలాగే రఘుబాబు – పృథ్వీ.. ఈ ఇద్దరి కామెడీ ట్రాక్ సినిమాకు ప్రధాన ఆకర్షణ. గోదావరి యాసలో వచ్చే డైలాగులు, టైమింగ్ ప్రేక్షకులను నవ్విస్తాయి. గోపి పాత్రలో సిద్ధు మంచి నటన కనబరిచాడు. కథకు అవసరమైన మలుపును తీసుకొచ్చే పాత్రను సమర్థంగా పోషించాడు. యశ్వంత్ నాగ్ అందించిన పాటలు కథకు తగ్గట్టుగా ఉన్నాయి. ముఖ్యంగా బ్యాక్గ్రౌండ్ స్కోర్ భావోద్వేగ సన్నివేశాలను మరింత బలపరిచింది. సుమంత్ కచర్ల కెమెరా పనితనం సినిమాకు పెద్ద ప్లస్. గోదావరి ప్రాంతంలోని ప్రకృతి అందాలను అద్భుతంగా చిత్రీకరించారు. ప్రతి ఫ్రేమ్ కళ్లకు ఆహ్లాదాన్ని కలిగిస్తుంది. తథాస్తు క్రియేషన్స్ నిర్మాణ విలువలు కథకు తగిన స్థాయిలో ఉన్నాయి. సినిమా మొత్తం ఒక రిచ్ విజువల్ ఫీల్ను కలిగిస్తుంది.
‘కొత్త మలుపు’ ఒక స్వచ్ఛమైన ప్రేమకథ. గ్రామీణ నేపథ్యంలో అందమైన విజువల్స్, సరదా కామెడీ, హృద్యమైన భావోద్వేగాలు, నేటి యువతకు అవసరమైన సందేశాన్ని కలగలిపిన ఫీల్ గుడ్ ఫ్యామిలీ ఎంటర్టైనర్. ప్రేమలో నమ్మకం ఎంత ముఖ్యమో గుర్తు చేస్తూ ప్రేక్షకులను ఆలోచింపజేసే చిత్రం ఇది. తొలి భాగంతో పోలిస్తే ద్వితీయభాగంలో కొన్ని సాగతీత సన్నివేశాలు, అలాగే ఊహించనట్టే వచ్చే కొన్ని సన్నివేశాలు మినహా కుటుంబ సమేతంగా వీకెండ్లో హాయిగా చూసి ఆస్వాదించదగ్గ సినిమా.
