నవతెలంగాణ – హైదరాబాద్ : ఐపీఎల్ చరిత్రలోనే ఒక కీలకమైన ప్లేయర్ ట్రేడ్ జరిగింది. లక్నో సూపర్ జెయింట్స్ మాజీ కెప్టెన్ రిషబ్ పంత్, తన పాత జట్టు అయిన ఢిల్లీ క్యాపిటల్స్ గూటికి తిరిగి చేరాడు. ఈ బ్లాక్బస్టర్ ట్రేడ్ ఒప్పందంలో భాగంగా ఢిల్లీ క్యాపిటల్స్ స్టార్ స్పిన్నర్ కుల్దీప్ యాదవ్ లక్నో జట్టులోకి బదిలీ అయ్యాడు. ఈ మార్పును ఐపీఎల్ యాజమాన్యం ధ్రువీకరించింది. రెండు సీజన్ల క్రితం రికార్డు స్థాయిలో రూ. 27 కోట్లకు లక్నో జట్టు పంత్ను కొనుగోలు చేసింది. కానీ ఆటగాడిగా, కెప్టెన్ గా ఆశించిన స్థాయిలో రాణించలేదు. దాంతో జట్టులో అతడి స్థానం ప్రశ్నార్థకమైంది. ఈ క్రమంలోనే ట్రేడింగ్ చోటుచేసుకున్నట్టు తెలుస్తోంది. అయితే, సొంత జట్టు ఢిల్లీకి తిరిగి వచ్చేందుకు పంత్ తన జీతంలో భారీగా కోత విధించుకోవడం గమనార్హం. ఢిల్లీ క్యాపిటల్స్లో పంత్ ఏడాదికి రూ. 15 కోట్లు అందుకోనున్నాడు. మరోవైపు కుల్దీప్ యాదవ్ రూ. 13.50 కోట్ల కాంట్రాక్ట్పై లక్నోతో చేరాడు. ఐపీఎల్ చరిత్రలోనే ఇది అత్యంత ముఖ్యమైన ట్రేడ్లలో ఒకటని ఐపీఎల్ మీడియా ప్రకటనలో పేర్కొంది.
2025 సీజన్లో లక్నో ఫ్రాంచైజీకి కెప్టెన్గా ఎంపికైన పంత్, రెండేళ్ల పాటు ఆ జట్టుతో నిరాశాజనకమైన ప్రదర్శన కనబరిచాడు. 2025, 2026 సీజన్లలో అతను వరుసగా 269, 312 పరుగులు మాత్రమే చేయగలిగాడు. ఓపెనర్గా, ఫినిషర్గా వివిధ బ్యాటింగ్ స్థానాల్లో ప్రయత్నించినప్పటికీ, తన రికార్డు ధరను ఏమాత్రం సమర్థించుకోలేకపోయాడు. 2026 ఐపీఎల్లో పేలవ ప్రదర్శన తర్వాత లక్నో కెప్టెన్సీ నుంచి కూడా తప్పుకున్నాడు. పంత్ తన ఐపీఎల్ కెరీర్ను 2016లో ఢిల్లీ ఫ్రాంచైజీతోనే ప్రారంభించాడు.
2024లో ఆ జట్టును వీడే వరకు కీలక ఆటగాడిగా కొనసాగాడు. ఢిల్లీ తరఫున అత్యధికంగా 111 మ్యాచ్లు ఆడిన రికార్డు పంత్ పేరిట ఉంది. దాదాపు దశాబ్ద కాలం పాటు జట్టుకు ముఖ్య ఆటగాడిగా ఉంటూ, 2021 నుంచి 2024 వరకు నాలుగు సీజన్ల పాటు 43 మ్యాచ్లకు కెప్టెన్గా వ్యవహరించాడు. ఇక, కుల్దీప్ యాదవ్ విషయానికొస్తే, ఢిల్లీ క్యాపిటల్స్తో ఐదు సీజన్ల పాటు విజయవంతంగా కొనసాగాడు. 2022లో జట్టులో చేరినప్పటి నుంచి 65 మ్యాచ్లలో 72 వికెట్లు పడగొట్టి టోర్నమెంట్లో అగ్రశ్రేణి స్పిన్నర్లలో ఒకడిగా నిలిచాడు. ప్రస్తుతం ఢిల్లీలో రూ. 13.25 కోట్లు అందుకుంటున్న కుల్దీప్, లక్నోకు మారడంతో జీతంలో స్వల్ప పెరుగుదల పొందాడు.
