ప్రపంచంలోనే తొలి ‘సైలాజిస్ట్’గా గుర్తింపు
నవతెలంగాణ హైదరాబాద్: ప్రముఖ న్యాయ నిపుణులు, దిశా లా ఫర్మ్ వ్యవస్థాపకులు, సీఈఓ అడ్వకేట్ నాగేశ్వర్ రావు పూజారికి ప్రతిష్ఠాత్మక లండన్ బుక్ ఆఫ్ వరల్డ్ రికార్డ్స్ నుంచి అరుదైన అంతర్జాతీయ గుర్తింపు లభించింది. దేశీయ వివాదాల పరిష్కారం, ముఖ్యంగా వైవాహిక మరియు కుటుంబ వివాదాల పరిష్కారంలో చేసిన విశిష్ట కృషికి గుర్తింపుగా ఆయనను ప్రపంచంలోనే తొలి ‘సైలాజిస్ట్’ (Psylawgist)గా, భారతదేశ ప్రముఖ మ్యాట్రిమోనియల్ లీగల్ నిపుణుడిగా గుర్తిస్తూ సర్టిఫికేట్ ఆఫ్ అప్రిసియేషన్ను అందించారు.
14 ఏళ్లుగా న్యాయ రంగంలో సేవలందిస్తున్న అడ్వకేట్ నాగేశ్వర్ రావు పూజారి తెలంగాణ, ఆంధ్రప్రదేశ్తో పాటు దేశంలోని వివిధ కోర్టుల్లో 5,160 విడాకుల కేసులను దాఖలు చేసి, పరిష్కరించినట్లు తెలిపారు. ఈ విశిష్ట అనుభవం కారణంగా ఆయనకు ‘డివోర్స్ కింగ్’ అనే ప్రత్యేక గుర్తింపు లభించింది.
సాధారణ న్యాయ సేవలకు భిన్నంగా, సంక్లిష్టమైన వైవాహిక మరియు కుటుంబ వివాదాలను మరింత సున్నితంగా, సమర్థవంతంగా పరిష్కరించేందుకు న్యాయ పరిజ్ఞానాన్ని మానసిక వ్యూహాలతో సమన్వయం చేస్తూ ‘సైలాజిస్ట్’ అనే వినూత్న విధానాన్ని ఆయన అభివృద్ధి చేశారు. ఈ విధానం ద్వారా చట్టపరమైన అంశాలతో పాటు కుటుంబ సంబంధాలు, భావోద్వేగ పరిస్థితులను పరిగణనలోకి తీసుకుని వివాదాల పరిష్కారానికి కృషి చేస్తున్నారు.
తెలుగు రాష్ట్రాల్లో అతిపెద్ద మ్యాట్రిమోనియల్ లా ప్రాక్టీస్ను నిర్మించిన అడ్వకేట్ పూజారి, తదుపరి తరం న్యాయవాదులకు మార్గదర్శకంగా నిలుస్తున్నారు. ఇప్పటివరకు 1,000 మందికి పైగా జూనియర్ అడ్వకేట్లకు శిక్షణ అందించారు. ప్రస్తుతం ఆయన సంస్థలో 100 మంది జూనియర్ అడ్వకేట్లు ప్రత్యక్షంగా పనిచేస్తుండగా, తెలంగాణ మరియు ఆంధ్రప్రదేశ్లో 150 మందికి పైగా అసోసియేట్ లాయర్ల నెట్వర్క్ను నిర్వహిస్తున్నారు.
అంతర్జాతీయ స్థాయిలోనూ తన సేవలను విస్తరించిన ఆయన అమెరికా, యూకే, దుబాయ్లలో కార్యాలయాలను ఏర్పాటు చేసి, ఎన్ఆర్ఐలకు సంబంధించిన వైవాహిక వివాదాల పరిష్కారంలో అంతర్జాతీయ స్థాయి సేవలను అందిస్తున్నారు.
LBOWRE6020129 సర్టిఫికేట్ నంబర్తో జారీ చేసిన ఈ అధికారిక గుర్తింపును లండన్ బుక్ ఆఫ్ వరల్డ్ రికార్డ్స్ యూరోపియన్ యూనియన్ హెడ్ (రిపబ్లిక్ ఆఫ్ క్రొయేషియా) డా. ఇవాన్ గాసినా, ఇంటర్నేషనల్ చైర్మన్ (ఇండియా) డా. అవినాష్ డి. సకుండే అందించారు. న్యాయ రంగంలో ఆయన చేసిన విశిష్ట సేవలు, మానవ ప్రేరణకు అందించిన కృషి, అంతర్జాతీయ స్థాయి న్యాయ సేవలకు గుర్తింపుగా ఈ గౌరవం లభించింది.
