– ఐపీఎల్‌ వేలం చరిత్రలో అత్యధిక ధర
– కోల్‌కతా నైట్‌రైడర్స్‌ సొంతం
దుబాయ్: ఆస్ట్రేలియాకే చెందిన సీనియర్‌ ఫాస్ట్‌ బౌలర్‌ మిచెల్‌ స్టార్క్‌ ఐపిఎల్‌ చరిత్రలో అత్యంత ఖరీదైన ఆటగాడిగా సరికొత్త రికార్డు నెలకొల్పాడు. మినీ వేలంలో స్టార్క్‌ను కోల్‌కతా నైట్‌రైడర్స్‌ ఫ్రాంచైజీ కనీవినీ ఎరుగని రీతిలో రూ.24.75 కోట్లకు కొనుగోలు చేసింది. దీంతో గతంలో ఐపీఎల్‌లో ప్యాట్‌ కమిన్స్‌(రూ.20.5 కోట్లు) రికార్డును స్టార్క్‌ బద్ధలు కొట్టాడు. రూ.2 కోట్ల కనీస ధర ఉన్న ఈ యార్కర్‌ కింగ్‌ కోసం కోల్‌కతా నైట్‌ రైడర్స్‌, గుజరాత్‌ టైటాన్స్‌ చివరి వరకు పోటీపడ్డాయి. కానీ, చివరకు కోల్‌కతా భారీ ధరకు స్టార్క్‌ను కొనుగోలు చేసింది. న్యూజిలాండ్‌ ఆల్‌రౌండర్‌ డారిల్‌ మిచెల్‌ రూ.14 కోట్లతో మూడో స్థానంలో ఉన్నాడు. టీమిండియా సీనియర్‌ పేసర్‌ ఉమేశ్‌ యాదవ్‌ను రూ.5.8 కోట్లతో గుజరాత్‌ టైటాన్స్‌ చేజిక్కించుకుంది. ఉమేశ్‌ కనీస ధర రూ.2 కోట్లు. అనూహ్య రీతిలో వెస్టిండీస్‌ పేసర్‌ అల్జారీ జోసెఫ్‌ కోసం ఫ్రాంచైజీలు విపరీతంగా పోటీపడ్డాయి. అతడి కనీస ధర రూ.కోటి కాగా… చివరికి అతడిని రూ.11.5 కోట్లకు . రాయల్‌ . ఛాలెంజర్స్‌ బెంగళూరు(ఆర్సీబీ) దక్కించుకుంది. అల్జారీ జోసెఫ్‌ గత కొన్ని సీజన్లుగా ఐపిఎల్‌లో ఆడుతున్నా… గొప్పగా బౌలింగ్‌ ప్రదర్శన చేసిందేమీ లేదు. అయినా అతడికి కళ్లు చెదిరే ధర లభించడం విశేషం. టీమిండియా టెస్టు జట్టు వికెట్‌ కీపర్‌ కేఎస్‌ భరత్‌ ది విచిత్రమైన గాథ. అతడి కనీస ధర రూ.50 లక్షలు కాగా, అదే ధరకు వేలంలో అతడిని కోల్‌కతా నైట్‌రైడర్స్‌ ఫ్రాంచైజీ కొనుగోలు చేసింది. దక్షిణాఫ్రికా యువ కెరటం ట్రిస్టాన్‌ స్టబ్స్‌కు ఈసారి వేలంలో ఏమంత మంచి ధర లభించలేదు. అతడిని రూ.50 లక్షల కనీస ధరకే ఢిల్లీ క్యాపిటల్స్‌ చేజిక్కించుకుంది.
స్టార్క్‌కు అంత ధర ఎందుకంటే..
ఆస్ట్రేలియా లెఫ్టార్మ్‌ పేసర్‌ స్టార్క్‌ కనీస ధర రూ.2 కోట్లు కాగా… అతడ్ని దక్కించుకొనేందుకు కోల్‌కతా నైట్‌ రైడర్స్‌, గుజరాత్‌ టైటాన్స్‌ తీవ్రంగా పోటీపడ్డాయి. చివరికి కోల్‌కతా ఫ్రాంచైజీదే పైచేయి అయింది.
ఎలాంటి పిచ్‌పై అయినా ప్రభావవంతంగా బౌలింగ్‌ చేస్తాడని స్టార్క్‌కు పేరుంది.
ఆసీస్‌ జట్టులో స్టార్క్‌తో కలిసి ఎన్నో ఏళ్లుగా కొత్త బంతిని పంచుకుంటున్న మరో పొడగరి పేసర్‌ జోష్‌ హేజెల్‌ వుడ్‌ను ఇవాళ్టి వేలం తొలి దశలో ఎవరూ కొనుగోలు చేయలేదు. అతడు అన్‌ సోల్డ్‌గా మిగిలిపోయాడు.
అత్యధిక ధర పలికిన ఆటగాళ్ళ వివరాలు..
మిచెల్‌ స్టార్క్‌ (ఆస్ట్రేలియా) రూ.24.75కోట్లు కోల్‌కతా నైట్‌ రైడర్స్‌
ప్యాట్‌ కమిన్స్‌(ఆస్ట్రేలియా) రూ.20.5కోట్లు సన్‌రైజర్స్‌ హైదరాబాద్‌
డారిల్‌ మిచెల్‌ (న్యూజిలాండ్‌) రూ.14కోట్లు చెన్నై సూపర్‌ కింగ్స్‌
హర్షల్‌ పటేల్‌(భారత్‌) రూ.11.75కోట్లు పంజాబ్‌ కింగ్స్‌
అల్జారీ జోసెఫ్‌ (వెస్టిండీస్‌) రూ.11.50కోట్లు రాయల్‌ చాలెంజర్స్‌ బెంగళూరు
సమీర్‌ రిజ్వి(భారత్‌) రూ.8.40కోట్లు చెన్నై సూపర్‌కింగ్స్‌
షారుక్‌ ఖాన్‌(భారత్‌) రూ.7.40కోట్లు గుజరాత్‌ టైటాన్స్‌
రొవ్‌మన్‌ పావెల్‌(వెస్టిండీస్‌) రూ.7.4కోట్లు ఢిల్లీ క్యాపిటల్స్‌
ట్రావిస్‌ హెడ్‌(ఆస్ట్రేలియా) రూ.6.80కోట్లు సన్‌రైజర్స్‌ హైదరాబాద్‌
ఉమేశ్‌ యాదవ్‌(భారత్‌) రూ.5.8కోట్లు గుజరాత్‌ టైటాన్స్‌
శివమ్‌ దూబే(భారత్‌) రూ.5.8కోట్లు రాజస్తాన్‌ రాయల్స్‌
గెరాల్డ్‌ కోయెట్జీ (దక్షిణాఫ్రికా) రూ.5.0కోట్లు ముంబై ఇండియన్స్‌
యశ్‌ దయాల్‌(భారత్‌) రూ.5.0కోట్లు రాయల్‌ ఛాలెంజర్స్‌ బెంగళూరు
క్రిస్‌ వోక్స్‌ (ఇంగ్లండ్‌) రూ.4.2కోట్లు పంజాబ్‌ కింగ్స్‌
శార్థూల్‌ ఠాకూర్‌ (భారత్‌) రూ.4.0కోట్లు చెన్నై సూపర్‌ కింగ్స్‌
హ్యారీ బ్రూక్‌ (ఇంగ్లండ్‌) రూ.4.0కోట్లు ఢిల్లీక్యాపిటల్స్‌
సుశాంత్‌ మిశ్రా(భారత్‌) రూ.2.2కోట్లు గుజరాత్‌టైటాన్స్‌
రచిన్‌ రవీంద్ర(న్యూజిలాండ్‌) రూ.1.8కోట్లు చెన్నై సూపర్‌ కింగ్స్‌
కుమార్‌ కుషగ్ర రూ.7.20కోట్లు ఢిల్లీ క్యాపిటల్స్‌
