మధ్యప్రాచ్యంలో ఉద్రిక్తతల వేళ..సౌదీతో అమెరికా అణు ఒప్పందం

వాషింగ్టన్ : అమెరికా, సౌదీ అరేబియా దేశాలు అణు ఒప్పందంపై సంతకాలు చేశాయి. పౌర అణు కార్యక్రమాన్ని అభివృద్ధి చేసుకునేందుకు ఈ ఒప్పందం గల్ఫ్ దేశమైన సౌదీకి వీలు కల్పిస్తుంది. దీనిని ‘శాంతియుత అణు సహకార ఒప్పందం’గా అమెరికా ఇంధన శాఖ అభివర్ణించింది. సౌదీ అణు ఇంధన కార్యక్రమాలలో అమెరికా కంపెనీలకు ఈ ఒప్పందం గొప్ప ప్రవేశం కల్పిస్తుందని తెలిపింది. ఒప్పందానికి సంబంధించిన పూర్తి వివరాలను అమెరికా బయటపెట్టలేదు. అయితే భవిష్యత్‌లో యురేనియంను శుద్ధి చేసుకునేందుకు ఈ ఒప్పందం సౌదీ అరేబియాను అనుమతిస్తుందని అమెరికా మీడియా చెబుతోంది. శుద్ధి చేసిన యురేనియంను విద్యుత్ ప్లాంట్లకు ఇంధనంగా, అణు బాంబుల తయారీకి ఉపయోగించవచ్చు. కాగా ఇప్పటికే అస్థిరంగా ఉన్న మధ్యప్రాచ్యంలో ఈ ఒప్పందం కారణంగా భవిష్యత్‌లో అణువ్యాప్తి జరగవచ్చునని నిపుణులు అభిప్రాయపడ్డారు.

భద్రతా ఒప్పందం కూడా…
అణు సహకార ఒప్పందంతో పాటు ద్వైపాక్షిక భద్రతా ఒప్పందంపై కూడా రెండు దేశాలు సంతకాలు చేశాయి. అనేక ఆర్థిక, వ్యూహాత్మక లక్ష్యాలను ముందుకు తీసుకొని వెళ్లే భాగస్వామ్యానికి ఈ ఒప్పందాలు చట్టపరమైన పునాదిని వేస్తాయని ఇంధన శాఖ ఓ ప్రకటనలో తెలియజేసింది. గత నవంబరులో తమ నేత వాషింగ్టన్‌లో జరిపిన పర్యటన కారణంగానే ఈ ఒప్పందం కుదిరిందని, ఇంధన రంగంలో ఇరు దేశాల మధ్య ప్రస్తుతం నెలకొన్న సహకారానికి ఇది కొనసాగింపు అని సౌదీ ప్రభుత్వం తెలిపింది.

మిత్ర దేశానికి చేయూత
ఒకవేళ ఇరాన్ అణు బాంబులు తయారు చేస్తే తాము కూడా అదే బాట పడతామని సౌదీ అరేబియా పాలకుడు, యువరాజు మహమ్మద్ బిన్ సల్మాన్ చాలా కాలం క్రితమే చెప్పారు. అమెరికా`ఇరాన్ మధ్య పోరు తీవ్రమవుతున్న సమయంలో ఈ ఒప్పందంపై ప్రకటన వెలువడడం గమనార్హం. అమెరికాకు సౌదీ దీర్ఘకాల మిత్రదేశం. ఆ దేశంలో అనేక అమెరికా సైనిక స్థావరాలు ఉన్నాయి. అమెరికా నిర్మించిన యురేనియం శుద్ధి కేంద్రంలో ఇంధనాన్ని ఉత్పత్తి చేయడానికి, తన సొంత గడ్డ పైనే యురేనియంను శుద్ధి చేయడానికి సౌదీకి అవకాశం లభిస్తుంది. దీనివల్ల అమెరికా ఖజానాకు దండిగా ఆదాయం లభిస్తుంది.