నవతెలంగాణ హైదరాబాద్: ఇటీవల దేశంలోని పలు ప్రాంతాల్లో వరుసగా జరుగుతున్న బస్సు ప్రమాదాలతో ప్రజలు తీవ్ర భయాందోళనకు గురవుతున్నారు. ఈ నేపథ్యంలో ప్రయివేటు బస్సుల్లో భద్రతపై జాతీయ మానవ హక్కుల కమిషన్ రాష్ట్ర ప్రభుత్వాలకు కీలక సూచనలు చేసింది. నిబంధనలకు విరుద్ధంగా ఉన్న స్లీపర్‌ బస్సులను పక్కన పెట్టేయాలని అన్ని రాష్ట్రాల ప్రధాన కార్యదర్శులకు జాతీయ మానవ హక్కుల కమిషన్ మార్గదర్శకాలు జారీ చేసింది.
దూర ప్రాంతాలకు వెళ్లే ప్రయివేటు స్లీపర్‌ బస్సుల్లో ఇటీవల ఘోర ప్రమాదాలు సంభవించడంతో అనేకమంది ప్రాణాలు కోల్పోయారు. భద్రతా ప్రమాణాలు పాటించకపోవడం, తనిఖీలు చేపట్టకపోవడం, అత్యవసర ద్వారాలను మూసేసి, అగ్నిప్రమాదం జరిగితే నియంత్రించే పరికరాలు లేకుండా, ఇష్టానుసారం బస్సులను మార్పులు చేర్పులు (ఆల్ట్రేషన్‌)తో నడపడం వంటి కారణాల వల్లే ఈ ప్రమాదాలు జరిగినట్టు నివేదికలు పేర్కొంటుండడంతో బస్సు ప్రయాణాలపై ప్రజల్లో ఆందోళన నెలకొంటుంది.
కర్నూలు, సౌదీ బస్సు ప్రమాదాల నేపథ్యంలో ట్రావెల్స్ బస్సుల్లో ప్రయాణం ఎంతవరకు సురక్షితమనే ప్రశ్నలు ఎదురవుతున్నాయి. దీంతో నిబంధనలు ఉల్లంఘించి, ప్రయాణికుల ప్రాణాలను పణంగా పెడుతున్న ట్రావెల్స్ సంస్థలపై అధికారులు కఠిన చర్యలు తీసుకుంటున్నారు. ఈ నేపథ్యంలో పలువురు ఫిర్యాదు చేయడంతో మానవ హక్కుల కమిషన్ అన్ని రాష్ట్రాలకు ఆదేశాలు జారీ చేసింది.
ప్రమాదాలకు ఇవీ కారణాలు
- ప్రస్తుతం తిరుగుతున్న బస్సుల్లో 50 శాతం పైగా స్లీపర్‌ ఏసీ బస్సులే ఉంటున్నాయి.
- వీటి లోపల భాగం ఇరుగ్గా ఉంటోంది. అగ్ని ప్రమాదాలు, రోడ్డు ప్రమాదాలు జరిగినప్పుడు వెంటనే బయటకు వచ్చే అవకాశం తక్కువ.
- ప్రతి బస్సులోనూ అగ్ని ప్రమాదాలను నియంత్రించే రక్షణ వ్యవస్థ ఉండాలి. చాలా వాటిల్లో ఇలాంటివి ఉండటం లేదు.
- ట్రావెల్స్ సంస్థలు బస్సుల కండీషన్‌పై ఎప్పటికప్పుడు తనిఖీలు చేపట్టకపోవడం
- అత్యవసర ద్వారం ఉన్నచోట్ల కూడా సీట్లు ఏర్పాటు, అదనపు సీట్ల నిర్మాణంతో ప్రమాద సమయాల్లో ఇవి అంతగా ఉపయోగపడటం లేదు.
- స్లీపర్‌ బస్సుల అడుగు భాగంలో సరకు నిల్వకు ఏర్పాట్లు ఉంటాయి. వీటిలో అగ్ని ప్రమాదాలు జరిగితే నేరుగా ప్రయాణికులపై ప్రభావం చూపుతున్నాయి.
