– డూప్లికేట్ పేర్లు, లింగం తప్పులు
– అధికారులు నిర్లక్ష్యంపై విమర్శలు
– ప్రజల్లో ఆందోళన
– ఒక్కరికే నాలుగు ఓట్లు – గువ్వలోనిపల్లిలో సంచలనం
నవతెలంగాణ – ఉప్పునుంతల
గ్రామ పంచాయతీ ఎన్నికల నిమిత్తం అధికారులచే సిద్ధం చేసిన తాజా ఓటర్ జాబితా లోపాల పర్వంగా మారింది. మండలంలోని 27 గ్రామ పంచాయతీలలో మొత్తం ఓటర్ల సంఖ్య 30,876. అందులో పురుషులు 15,171, మహిళలు 15,705. అయితే అధికారుల నిర్లక్ష్యం, సిబ్బంది అసమగ్ర సర్వే కారణంగా ఈ జాబితా పూర్తిగా తప్పులతో నిండిపోయినట్లు బయటపడింది.
తప్పులు ఇలా ఉన్నాయి
మరణించిన వారి పేర్లు తొలగించకుండా జాబితాలో కొనసాగించారు. ఒక్కరికే ఒకే వార్డులో వరుసగా నాలుగు ఓట్లు పెళ్లైన మహిళలు అత్తారింటికి వెళ్లినా పేర్లు తొలగించడం మరిచారు. మహిళలను పురుషులుగా, పురుషులను మహిళలుగా నమోదు చేసిన విచిత్రాలు ఒక గ్రామానికి చెందిన వారిని మరో గ్రామంలో పూర్తిగా తొలగించని లోపాలు ప్రధానంగా గువ్వలోనిపల్లి, సదగోడు, పిరాట్వాని పల్లి, మామిళ్లపల్లి, రాయిచేడ్, ఉప్పునుంతల వంటి పంచాయతీల్లో ఈ తప్పులు అధికంగా ఉన్నట్లు వెల్లడి అయింది.
జిల్లా ఎన్నికల యంత్రాంగం “తప్పులు లేని జాబితాను తయారు చేయాలి” అని స్పష్టం చేసినప్పటికీ, విడుదలైన జాబితా ఆదేశాలకు విరుద్ధంగా ఉంది.
సిబ్బందితో ఇంటింటి సర్వే జరిపించామని అధికారులు చెప్పినా, యథావిధిగా తప్పులతో కూడిన జాబితా విడుదల కావడంతో ప్రజలు తీవ్ర అసంతృప్తి వ్యక్తం చేస్తున్నారు. ఈ పరిస్థితులను పరిశీలిస్తూ ప్రజలు అధికారులు మరింత నిర్లక్ష్యంగా వ్యవహరిస్తున్నారని ఆగ్రహిస్తున్నారు.
బోగస్ ఓట్ల పై ముందే వినతిపత్రం ఇచ్చాం
మండలంలో చోటుచేసుకున్న బోగస్ ఓట్ల తొలగింపుపై ఎంపీడీవో కార్యాలయంలో ఎంపీడీవో కు రెండు నెలల క్రితం వినతి పత్రం అందజేశాను ఓటర్ జాబితా తప్పులు లేకుండా జాబితాను సిద్ధం చేసి స్థానిక ఎన్నికలలో ఎలాంటి లోటుపాతులు లేకుండా సజావుగా నిర్వహించేలా ఇప్పటికైనా నిర్లక్ష్యం వెంటనే తగ్గించి, ప్రజలకు అన్యాయం కాకుండా తప్పులులేని పారదర్శక ఓటర్ జాబితాను విడుదల చేయాలి
– చింతల నాగరాజు, సీపీఐ(ఎం) మండల కార్యదర్శి
డిలీట్ ఆప్షన్ మా పరిధిలో లేదు
బోగస్ ఓట్లను తొలగించడం, తప్పులను సరిదిద్దడం మా పరిధిలో లేదు గత అసెంబ్లీ ఎలక్షన్ లో వచ్చిన ఓటర్ జాబితానే వచ్చింది. బోగస్ ఓట్ల ఉన్న ఓటర్లను ఒకే ఓటు వినియోగించుకునేలా చూస్తాం
– ఎంపీడీవో వరుణ్ తేజ్, ఉప్పునుంతల.
