పది బిల్లుల ఆమోదానికి జాబితా
పౌర అణు ఇంధన రంగంలో ప్రయివేటు రంగాన్ని ఆహ్వానించే బిల్లు
చండీగఢ్‌ అధికార పరిధి బిల్లుపై ఏకమైన పంజాబ్‌ రాజకీయ పార్టీలు
వెనక్కి తగ్గిన కేంద్ర ప్రభుత్వం
నేడు అఖిలపక్ష సమావేశం
నవతెలంగాణ-న్యూఢిల్లీ బ్యూరో
పార్లమెంటు శీతాకాల సమావేశాలు రేపటి (సోమవారం) నుంచి ప్రారంభం కానున్నాయి. డిసెంబర్‌ 19 వరకు జరిగే ఈ సమావేశాల్లో పది బిల్లులను ఆమోదించుకునేందుకు కేంద్ర ప్రభుత్వం జాబితా చేసింది. మొత్తం 19 రోజులు సాగే ఈ సమావేశాల్లో 15 రోజులు ఉభయసభలు భేటీ కానున్నాయి. సమావేశాలకు ముందు సంప్రదాయంగా నిర్వహించే అఖిలపక్ష సమావేశాన్ని ఆదివారం ఉదయం 11 గంటలకు నిర్వహించనున్నారు. కేంద్ర రక్షణ శాఖ మంత్రి రాజ్‌నాథ్‌ సింగ్‌ అధ్యక్షతన ఈ సమావేశం జరుగనుంది. పార్లమెంటు సమావేశాలు సజావుగా జరిగేలా సహకరించాలని కేంద్రం కోరనుంది.
సోమవారం నుంచి ప్రారంభమయ్యే పార్లమెంటు శీతాకాల సమావేశాల్లో కీలకమైన పౌర అణు ఇంధన రంగంలో ప్రయివేటు రంగానికి ఆహ్వానం పలికేందుకు ఉద్దేశించిన ‘ఆటమిక్‌ ఎనర్జీ బిల్లు-2025’తో సహా పది కీలక బిల్లులు సభ ముందుకు రానున్నాయి. చండీగఢ్‌ కేంద్ర పాలిత ప్రాంతాన్ని రాజ్యాంగంలోని 240వ అధికరణ పరిధిలోకి తెచ్చే బిల్లును పార్లమెంటులో ప్రవేశపెడతామని తొలుత కేంద్ర ప్రభుత్వం నిర్ణయించింది. అయితే పంజాబ్‌లోని అధికార ఆమ్‌ ఆద్మీ పార్టీ (ఆప్‌), ప్రతిపక్ష కాంగ్రెస్‌, శిరోమణి అకాలీదళ్‌ (ఎస్‌ఏడీ) పార్టీలు తీవ్రంగా వ్యతిరేకించాయి. దీంతో కేంద్ర ప్రభుత్వం ఈ బిల్లును పార్లమెంట్‌ ముందుకు తెచ్చే ఆలోచనను ఉపసంహరించుకుంది. ఆ బిల్లును ప్రవేశపెట్టే ఆలోచన ఏదీ లేదని కేంద్ర హౌం మంత్రి అమిత్‌ షానే ప్రకటించాల్సి వచ్చింది.
ప్రతిపక్షాలు లేవనెత్తే అంశాలు
పార్లమెంటు శీతాకాల సమావేశాల్లో పలు అంశాలను లేవనెత్తేందుకు ప్రతిపక్షాలు కసరత్తు చేస్తున్నాయి. ప్రధానంగా దేశవ్యాప్తంగా స్పెషల్‌ ఇంటెన్సివ్‌ రివిజన్‌(సర్‌), అదానీ అంశం, ఢిల్లీ పొల్యూషన్‌ వంటి అంశాలను లేవనెత్తే అవకాశాలున్నాయి. అలాగే హర్యానా, మహారాష్ట్ర, కర్నాటకలలో జరిగిన ఓట్ల చోరీ, ఎన్నికల కమిషన్‌ తీరుపై కేంద్ర ప్రభుత్వాన్ని నిలదీసేందుకు ప్రతిపక్ష పార్టీలు సిద్ధంగా ఉన్నాయి. రైతుల సమస్య, దేశ భద్రత, ఢిల్లీలోని జరిగిన బాంబు దాడి ఘటనపై కేంద్ర వైఫల్యం, నిరుద్యోగం, ధరల పెరుగుదల తదితర అంశాలపై కూడా ప్రశ్నించేందుకు ప్రతిపక్షాలు యోచిస్తున్నాయి.
పార్లమెంట్‌ ముందుకు తీసుకురానున్న బిల్లులు ఇవే..
పార్లమెంటులో ప్రవేశపెట్టనున్న కీలకమైన బిల్లులలో ‘ఆటమిక్‌ ఎనర్జీ బిల్లు-2025’తో పాటు సెక్యూరిటీస్‌ మార్కెట్స్‌ కోడ్‌ బిల్లు (ఎస్‌ఎంసీ)-2025, జాతీయ రహదారుల (సవరణ) బిల్లు, అర్బిట్రేషన్‌, కాన్సిలియేషన్‌ (సవరణ) బిల్లు, ఇన్సూరెన్స్‌ చట్ట (సవరణ) బిల్లు, ఇన్సాల్వెన్సీ, దివాలా కోడ్‌ (సవరణ) బిల్లు, కార్పొరేట్‌ చట్ట (సవరణ) బిల్లు, హైయర్‌ ఎడ్యుకేషన్‌ కమిషన్‌ ఆఫ్‌ ఇండియా బిల్లు-2025, మణిపూర్‌ గూడ్స్‌ అండ్‌ సర్వీసెస్‌ టాక్స్‌ (సవరణ) బిల్లు-2025, జన్‌ విశ్వాస్‌ (నిబంధనల సవరణ) బిల్లు-2025 ఉన్నాయి. సెక్యూరిటీస్‌ అండ్‌ ఎక్స్ఛేంజ్‌ బోర్డ్‌ ఆఫ్‌ ఇండియా చట్టం-1992, డిపాజిటరీస్‌ చట్టం-1996, సెక్యూరిటీస్‌ కాంట్రాక్ట్స్‌ (నియంత్రణ) చట్టం-1956లను విలీనం చేసేందుకు ‘సెక్యూరిటీస్‌ మార్కెట్స్‌ కోడ్‌ బిల్లు-2025’ను కేంద్రం తీసుకువస్తోంది.
జాతీయ రహదారుల విస్తరణ, పొడిగింపు కోసం అవసరమైన భూసేకరణ ప్రక్రియ వేగంగా, అత్యంత పారదర్శకంగా జరిగేందుకు వీలుగా నేషనల్‌ హైవేస్‌ (సవరణ) బిల్లును తెస్తోంది. చేయని తప్పులకు కంపెనీ డైరెక్టర్లు బాధ్యులు అవుతున్నందున అవాంఛనీయ దర్యాప్తు, విచారణల నుంచి రక్షణ కల్పించాలని సుప్రీంకోర్టు ఇచ్చిన ఆదేశాల మేరకు ఆర్బిట్రేషన్‌, కాన్సిలేయేషన్‌ చట్ట సవరణ బిల్లును పార్లమెంటులో కేంద్రం ప్రవేశపెట్టనుంది. దీనిపై సూచనల కోసం కమిటీకి సిఫారసు చేసే అవకాశం ఉంది. కాగా, హయ్యర్‌ ఎడ్యుకేషన్‌ కమిషన్‌ ఆఫ్‌ ఇండియా బిల్లుతో ఏకీకృత ఉన్నత విద్యా కమిషన్‌ ఏర్పాటుకు కేంద్ర ప్రభుత్వం కొత్త బిల్లు తీసుకురానుంది. కాగా… గతంలో శీతాకాల సమావేశాలు సాధారంగా నవంబర్‌ మూడో వారంలో మొదలై, క్రిస్మస్‌ (డిసెంబర్‌ 25)కు ముందు ముగిసేవి. గతేడాది సైతం నవంబర్‌ 25న ప్రారంభమై డిసెంబర్‌ 20న ముగిశాయి.
