సోలార్‌ రేడియేషన్‌తో పెను ముప్పు
నిలిచిపోనున్న 6 వేలకు పైగా ఎయిర్‌బస్‌ విమానాలు
న్యూఢిల్లీ : విమానాలకు వడదెబ్బ ఏమిటని ఆలోచిస్తున్నారా? ఇది నిజం. సూర్యుని నుండి వెలువడే అతి నీల లోహిత కిరణాలు, విద్యుదయస్కాంత తరంగాల ప్రభావం (సోలార్‌ రేడియేషన్‌ ) కారణంగా ప్రపంచవ్యాప్తంగా ఆరు వేలకు పైగా ఎయిర్‌బస్‌ విమానాలు నిలిచిపోనున్నాయి. వినడానికి ఆశ్చర్యంగానే వున్నా ఇది నిజం. ఎయిర్‌బస్‌కు చెందిన విమానాల్లో సాఫ్ట్‌వేర్‌ను ఆధునీకరించాల్సి వుందని స్వయంగా ఆ సంస్థే ఒక ప్రకటన చేసింది. గత 55ఏళ్ళ ఎయిర్‌బస్‌ చరిత్రలో ఇలా ఇన్ని విమానాలను నిలిపివేయడం ఇదే తొలిసారి. ఇటీవల జరిగిన ఒక సంఘటనలో ఎయిర్‌ బస్‌ విమానం తీవ్రమైన సౌర రేడియేషన్‌కు గురైందని, దాని వల్ల విమానం ఎగిరేందుకు, నియంత్రించేందుకు అవసరమైన కీలక వ్యవస్థల డేటా కరప్ట్‌ అయిపోయిందని, అందుకే విమానాలను నిలిపివేయాలని భావించినట్లు ఎయిర్‌బస్‌ తెలిపింది.
అక్టోబరు 30న మెక్సికోలోని కాన్‌కన్‌ నుండి అమెరికాలోని న్యూయార్క్‌కు బయలుదేరిన జెట్‌ బ్లూ ఎ320 విమానంలో వున్నట్టుండి సాంకేతిక సమస్య తలెత్తింది. ఒక్కసారిగా విమానం ప్రయాణిస్తున్న ఎత్తు 35వేల అడుగుల మేరా పడిపోయింది. వెంటనే అప్రమత్తమైన పైలట్లు విమానాన్ని దారి మళ్ళించి అత్యవసరంగా ఫ్లోరిడాలోని థంపా విమానాశ్రయంలో దించేశారు. ఒక్కసారిగా విమానం వేల అడుగులు కిందకు రావడంతో ఆ విమానంలో కొంతమంది ప్రయాణికులు కూడా గాయపడ్డారు. దాంతో ఫెడరల్‌ ఏవియేషన్‌ అడ్మినిస్ట్రేషన్‌ ఈ ఘటనపై దర్యాప్తు చేసింది. ఎలివేటర్‌ ఎలిరాన్‌ కంప్యూటర్‌ (ఇఎల్‌ఎసి) వ్యవస్థలో సాఫ్ట్‌వేర్‌ దెబ్బతిన్నట్లు గుర్తించింది. దీనికి సోలార్‌ రేడియేషన్‌ కారణమని కూడా గుర్తించారు. ఈ సాఫ్ట్‌వేర్‌ విమానం ఎత్తును, ఇతర వ్యవస్థలను నియంత్రిస్తుంది. సౌర జ్వాలల కారణంగా ఎత్తైన ప్రదేశాల వద్ద ఒక్కసారిగా ఈ డేటా కరప్ట్‌ అయిపోతుంది. దీనివల్ల నావిగేషన్‌, ఫ్లైట్‌ కంట్రోల్‌ డేటా వంటివి చెరిగిపోతాయి.
అటువంటి సమయాల్లో విమానాల భద్రతకు ముప్పు వాటిల్లుతుంది. మనకు తెలిసి జరిగిన సంఘటన ఇదొక్కటే అయినా దీనిపై విశ్లేషణ జరిపిన నేపథ్యంలో ఎ320 సియో, ఎ320 నియో వేరియంట్ల విమానాలకు విస్తృతంగా ముప్పు పొంచి వుందని వెల్లడించింది. ఈ పరిస్థితుల్లో ముందు జాగ్రత్త చర్యగా అన్ని ఎయిర్‌ బస్‌ ఎ320 విమానాలకు ఇటువంటి సాఫ్ట్‌వేర్‌ను అప్‌డేట్‌ చేయడం అవసరమని సంస్థ భావించింది. దాదాపు ఆరువేల విమానాలు నిలిచిపోనున్న నేపథ్యంలో అమెరికన్‌ ఎయిర్‌లైన్స్‌, డెల్టా, ఇండిగో వంటి విమానయాన సంస్థలు తీవ్రంగా ప్రభావితం కానున్నాయి. పైగా హాలిడే సీజనులో ఇలా జరగడం వల్ల ఇబ్బంది మరింత పెరగనుంది. అయినా ప్రయాణికుల భద్రతకు ప్రాధాన్యమిచ్చి ఎయిర్‌బస్‌, ఇఎఎస్‌ఎ(యురోపియన్‌ యూనియన్‌ ఏవియేషన్‌ సేఫ్టీ ఏజెన్సీ)లు నవంబరు 28న అత్యవసర ఆదేశాలు (ఎమర్జన్సీ ఎయిర్‌వర్దీనెస్‌ డైరెక్టివ్స్‌-ఇఎడి) జారీ చేశాయి. తిరిగి కార్యకలాపాలు ప్రారంభించడానికి ముందుగా అవసరమైన మరమ్మత్తులు చేపట్టాలని ఆదేశించాయి. సరైన ఇఎల్‌ఎసి యూనిట్‌ను ఏర్పాటు చేసి సాఫ్ట్‌వేర్‌ లేదా హార్డ్‌వేర్‌ను మార్చాల్సి వుంటుంది. సాఫ్ట్‌వేర్‌ను అప్‌డేట్‌ చేయడానికి కొద్ది గంటలు సరిపోతుంది. ఒకవేళ హార్డ్‌వేర్‌ను మార్చాల్సివస్తే మాత్రం కొంచెం ఆలస్యమవుతుందని పేర్కొంది.
