కేంద్రమంత్రి నిర్మలా సీతారామన్‌కు ఎంపీ, సీపీఐ(ఎం) నాయకులు జాన్‌ బ్రిట్టాస్‌ లేఖ
న్యూఢిల్లీ: విదేశీ ఆర్థిక సంస్థల నుంచి భారతీయ బ్యాంకుల రక్షణకు జోక్యం చేసుకోవాలని కోరుతూ ఆర్థిక మంత్రి నిర్మలా సీతారామన్‌కు ఎంపీ, సీపీఐ(ఎం) నాయకులు డాక్టర్‌ జాన్‌ బ్రిట్టాస్‌ లేఖ రాశారు. బ్యాంకింగ్‌ రంగంలో ఎఫ్‌డీఐ ఆమోద చట్రాన్ని సమీక్షించాలని, కాథలిక్‌ సిరియన్‌ బ్యాంక్‌ (సీఎస్‌బీ) ఉద్యోగులు తమ సేవా పరిస్థితుల రక్షణతో పాటు చట్టబద్ధంగా తప్పనిసరి బీపీఎస్‌-అనుసంధాన జీత సవరణలు పొందేలా చర్యలు తీసుకోవాలని ఆయన కోరారు. సీఎస్‌బీతో పాటు, లక్ష్మీ విలాస్‌ బ్యాంక్‌, యెస్‌ బ్యాంక్‌, ఆర్‌బీఎల్‌ బ్యాంక్‌, ఐసీఐసీఐ బ్యాంక్‌, హెచ్‌డీఎఫ్‌సీ బ్యాంక్‌ , యాక్సిస్‌ బ్యాంక్‌తో సహా అనేక బ్యాంకులు ఇప్పుడు పూర్తి లేదా పాక్షిక విదేశీ పెట్టుబడులను కలిగి ఉన్నాయని అన్నారు. కెనడాకు చెందిన ఫెయిర్‌ఫాక్స్‌ గ్రూప్‌ సీఎస్‌బీని కొనుగోలు చేయడం భారతదేశ బ్యాంకింగ్‌ విధానంలో ఆందోళనకరమైన మార్పును, ఈ రంగంలోకి విదేశీ చొరబాటు విస్తృత ధోరణిని సూచిస్తుందని ఆయన హై లైట్‌ చేశారు.
ఇది భారతీయ బ్యాంకుల జాతీయం చేయబడిన స్వ భావాన్ని మారుస్తోందని అన్నారు. ‘ఒకప్పుడు చిన్న రుణగ్రహీతలు, రైతులు, వ్యవస్థా పకులకు సేవలందించిన ప్రజల బ్యాంకు అయిన సీఎస్‌బీ, వ్యవసాయ, విద్య, గృహ నిర్మాణం, చిన్న వ్యాపార రుణాలను గణనీయంగా తగ్గించింది. అదే సమయంలో కార్పొరేట్‌ రంగానికి రుణాన్ని విస్తరిస్తోంది. పొదుపు ఖాతాను తెరవడానికి బ్యాంకులో కనీసం రూ.10వేలు డిపాజిట్‌ చేయవలసి ఉంటుందని నివేదికలు సూచిస్తున్నాయ’ని బ్రిట్టాస్‌ పేర్కొన్నారు. ‘గత తొమ్మిదేండ్లలో కాంట్రాక్టు నియామకాలు పెరగడం, శాశ్వత నియామకాలు లేకపోవడంతో సీఎస్‌బీ శాశ్వత సిబ్బంది సంఖ్య 2015 లో 2,906 నుంచి 906కి తగ్గింది. విదేశీ టేకోవర్‌ తర్వాత, అధికారుల పదవీ విరమణ వయస్సు 60 నుంచి 58కి తగ్గించింద’ని అన్నారు. జాతీయ ఆర్థిక స్థిరత్వానికి కీలకమైన బ్యాంకులపై విదేశీ సంస్థలు నియంత్రణ సాధించకుండా నిరోధించడానికి అవసరమైన చర్యలు తీసుకోవాలని బ్రిట్టాస్‌ ఆర్థిక మంత్రిని కోరారు.
